我和六合彩發生了一段不可告人的（性）關係: 【6】

喺迪士尼玩足成日，九點幾我地卒之返到屋企。

連續兩日由朝玩到晚，攰撚到仆街。

我打開雪櫃開罐啤酒，攤落張床度抖下。

至於36號就依然精力旺盛，兼且意猶未盡，猛咁話好想再去多幾次。

呢個時候，我忍唔住叫佢快啲講出六合彩嘅秘密。





36號坐上張摺檯上面，對我講：「好，我依家就話你知。」

我立即坐返正個人，豎起耳仔認真聽。

「你知唔知你地人類眼中嘅攪珠機，底裡其實係一個戰場。而每一期嘅六合彩攪珠，實際上係一場拳腳交鋒嘅戰鬥。」

「Um…即係點？」我眉頭一皺，唔係好聽得明佢講乜。

「點同你解釋好呢...？咁啦，我嚟問你，你平時睇到嘅六合彩攪珠係點樣嘅？」





「咪就係有49個波喺部機入面攪下攪下咁囉。」

「你所見到嘅呢個畫面，只係攪珠機投射出嚟嘅影像，事實上，喺攪珠機入面存在住一個人類肉眼睇唔到嘅空間，而我地1至49號就喺嗰個空間入面互相戰鬥，角逐六個勝利席位。」

佢一邊講，一邊舉出「6」嘅手勢：「嗰六個勝利者，就代表嗰期六合彩嘅開獎結果。」

Wow！佢呢番說話，簡直顛覆咗我對六合彩嘅認知。

簡單啲嚟講，第一，六合彩波並唔一件死物。





佢地係有自我意識，而且仲識得講嘢。

第二就係攪珠機入面存在住另一個次元，係一個類似羅馬鬥獸場嘅空間。

每逢六合彩開獎嘅日子，49個波就會集合埋一齊。

表面上我地只係見到49個波不停咁攪轉，但實際上裡面卻係進行緊一場49人嘅大混戰。

而每次喺決戰中勝出嘅六位贏家，就係每一期攪珠開出嚟結果。

總結完對方所講嘅說話，最後我有一個問題一定要問。

我相信每一個買過六合彩嘅人，都一定有呢個疑問——

究竟六合彩有無「造馬」？