17歲的夏天，被開發的過程: 十九、陌生

「轉換新環境 情侶最易分手」、「入唔同U分硬手 有辦你睇」、「條女入咗U就唔理我」……個個都話情侶如果入咗唔同大學，就有99.99%機會分手，係咪真架？不過數數手指，阿軒同我已經冷戰咗一個星期，我哋以前嗌交都未試過咁耐冇搵對方，而家算係分咗手定係點？

「喂……」我有啲緊張，好驚阿軒一聽電話就會發火。
「點？」佢把聲好平靜，但態度好冷漠，好似當我係陌生人咁。
「你喺屋企？」我只係想解決而家尷尷尬尬嘅狀態，始終無論係繼續一齊定分手都要有一個了斷。
「出嚟傾。」阿軒約咗我喺樓下公園，希望我哋唔會嗌交收場。

我哋坐咗喺長櫈上好耐，佢不時覆電話，我一直望住公園嘅細路、行人，大家都唔想做開口嗰個。
「你唔講我就走喇。」阿軒收起電話，冷冷地拋低呢一句。我唔明點解去到分手邊緣，佢仲可以一副高高在上嘅姿態去處理我哋嘅問題。
「你覺得我哋而家咁，全部都係我嘅錯？」我有啲驚訝，佢真係唔覺得自己都有責任？


「你有體諒過我咩？我忙唔係我想，我唔係去溝女，我真係有正經嘢做。」阿軒望住我，唔明點解佢女朋友咁蠻不講理。
「咁邊個體諒我？我有男朋友等如冇，見又見唔到，打俾你又講唔夠兩句，你一次搵我唔到就好似捉姦咁嬲？你平時放我飛機又唔見你諗下我感受？」果然不出我所料，傾唔夠十分鐘就要嗌交，或者我哋真係唔適合喺埋一齊。
「分手啦。」阿軒終於都講出口，佢甚至冇一刻猶疑呢個決定究竟啱唔啱，應該係一早就決定好。我冇回應，只係默默睇住佢離開。

人哋話如果一對情侶分手，通常女人喺分手後嘅頭一個月會最難捱，然後好快就會放低；而男人就係相反，一分手會覺得好輕鬆，時間耐咗先開始傷心。Year 1嘅生活令我好快就放低咗呢件事，每日都認識新嘅人，加上宿舍好多活動，分散咗我嘅注意力，我唔敢獨處，亦都冇勇氣處理分手之後應該有嘅情緒。我怕我會崩潰，或者一時軟弱而忍唔住聯絡阿軒。

大約過咗兩個月，有一個好熟悉嘅電話號碼sms我。
「我想俾返啲嘢你。」真係阿軒。分手當日我喺電話刪除晒所有sms同佢嘅號碼，我天真地以為只要我del咗佢電話，我就會忘記。
「星期六兩點，你樓下等。」我唔想同佢一來一回約時間，既然佢當初咁決絕，我都唔需要拖拖拉拉。



當日我上到阿軒屋企，發現一屋都係紙箱，原來佢屋企租約完結，準備緊搬去新屋。一個曾經我兩三日就上嚟一次、當咗係半個自己屋企嘅地方，已經唔再關我事，突然覺得好唏噓。阿軒遞咗一個紙袋俾我，係我之前留喺佢屋企嘅衫同借俾佢嘅幾本書。
「你搬去邊啊？」我坐喺床邊，見到佢間房仲係好雜亂，我諗佢呢排應該好攰。
「都係附近啫。」佢好似唔想答我。
「咁我走喇。」佢嘅態度令我覺得當初分手係啱嘅，我唔想再浪費時間關心呢個人。

正當我企起身想走嘅時候，阿軒拉住我。
「我好掛住你。」佢雙手從後攬住我，聲線帶點震動。我轉過身望住佢，覺得眼前呢個人熟悉得嚟又帶點陌生。曾經同我朝夕相對、我最信任嘅人，突然間話唔愛就唔愛，分手之後再見反而又變返當初嘅模樣。
「唔好走。」佢再一次抱緊我，然後小心翼翼地錫我。我冇將佢推開，反而好享受咁回應佢嘅吻。我好掛住佢嘅嘴唇，好掛住佢嘅呼吸聲、佢嘅身體、佢嘅撫摸。