17歲的夏天，被開發的過程: 二十、結局

我諗睇到呢度，你一定會諗：「睇死你呢個淫娃蕩婦都係同返佢一齊啦。」啱咗一半，我同阿軒最後係做咗一次愛。佢太熟悉我嘅身體，喺受到性慾支配同對佢仲有60%愛嘅情況下，我犯咗天下間人類都會犯嘅錯，同前度打分手炮，但我清楚呢次扑嘢只係扑嘢，唔代表我哋已經復合。

「星期六得唔得閒？」阿軒間中就會約我，有幾次因為我功課太忙，夾唔到時間所以推咗。我冇深究佢約我嘅目的係咩，我哋嘅交流亦只限於講音樂、電影同近況，同普通朋友冇分別。有人同我講過，要同前度做得成朋友，就只有兩種可能性：一係大家仲愛大家；二就係大家冇愛過大家。我唔知我哋係屬於邊個情況，但我慶幸仲可以維持聯絡，因為我哋有好多共同興趣，我想像唔到如果有一日冇咗佢，我可以同邊個分享。

我哋食完飯之後去咗市鎮公園傾偈，講下大家最近過成點，回憶下拍拖嗰陣會經過呢條路一齊返屋企。阿軒不時都忙於覆電話，原來係佢女朋友。我有一刻嬲佢點解唔一早同我講，咁我可能會選擇唔應約，但我又諗佢明知自己有女朋友都約我，責任根本唔喺我度。

「你有女朋友點解仲要約我？」返到屋企樓下，我忍唔住問佢。
「我控制唔到唔諗起你。」阿軒認真嘅神情令我諗起當初同我一齊、同我講過好想同我一世嘅嗰個佢。
「你真係咁愛我嘅話，點解當日分手又咁捨得？」我將由分手到而家，一直累積落嚟但又得唔到釋放嘅不解、失望一次過爆發，發洩返喺佢身上。「分手係你講，有女朋友嗰個又係你，而家又同我講唔捨得，你想點啫？」阿軒冇答我，而係直接攬住我，無論我推開佢、打佢都好，佢都只係攬得我好緊好緊。



嗰晚之後，我哋維持住會拍拖做愛嘅關係，我亦都清楚自己由佢嘅前度，變成咗佢同佢女朋友之間嘅第三者。我哋每一兩星期就會約會，開房上床，重溫過去兩年幾以來最熟悉嘅節奏同體溫，對於對方嘅敏感帶瞭如指掌，對大家嘅喜好心照不宣。我可以繼續同曾經最愛嘅男人做愛嘅歡愉，佢得到繼續征服我嘅成功感，解決性需要，各取所需。
「我哋咁樣會唔會唔係幾好？」始終我係第三者，當我尚餘半點理性嘅時候，我都會感受到良心責備。
「你唔想繼續？」阿軒又拋返個波俾我做決定。
「其實你係唔愛我定唔愛佢？」我想知一個有女朋友，但係又要搵返前度做愛嘅人係咩心態。
「我愛你啊。」阿軒好爽快咁答。我問呢個問題真係好白痴，既然佢想長屌長有，又點會肯同我講真話，佢唔愛個女朋友嘅話佢哋一早分咗手啦。

自此我唔再過問佢同女朋友嘅事，我怕知得太多反而更難抽身，或者妄想自己終有一日可以令阿軒回心轉意。既然我只係一個第三者，我做好本份就足夠。然後，可能係阿軒懶得再兼顧多一個女人，又或者係我開始將注意力轉移到身邊其他人身上，我哋呢段關係先至無疾而終。

呢段經歷距離而家已經相隔十年以上，我曾經有段時間好想知道呢個人而家過成點，好有衝動想聯絡佢。直至我知道佢嘅近況，見到佢嘅近照，我先發現其實我係掛住回憶入面嗰個佢，嗰個仲著住中學校服、一臉稚氣、對我最真誠包容嘅佢，嗰段曾經無憂無慮、簡單快樂嘅時光。生命中遇到嘅每個人都有佢嘅角色，完成咗佢嘅責任就會離開，然後將你交付俾下一位。阿軒嘅角色就係陪我度過咗中學時期最重要嘅兩年，教識我愛一個人應該係點，喺做愛方面開發咗我，亦令我體驗到點樣去放低一個喺曾經對你嚟講好重要嘅人，好好收藏起嗰段回憶。