瘋狂鏡粉大戰食人喪屍: （30）

Eric就好似一隻餓咗三日嘅豺狼，撲上去女HR面前，捉住對方條頸嚟咬。

呢個時候，志偉亦都從樓上追到落嚟樓下。

大家一場舊同事，當然有福齊齊享，志偉圍埋去同Eric一齊分屍，隊冧咗個女HR。

平時呢啲濕鳩HR成日問埋啲濕鳩問題，刁難啲見工人士，根本死不足惜。

Eric同志偉好開心咁享用緊個女HR，但開講有話「螳螂捕蟬，黃雀在後」，突然間有一條大繩網從天而降，將佢地兩個完全包圍。





下一秒就有大約十個鏡粉，衝上去圍毆佢地。

呢班鏡粉之中有煙傾、何b仔同埋洛克人嘅粉絲，佢地一路逐條街逐條街咁消滅喪屍，啱先搞掂咗隔籬街，依家就嚟到呢條街。

佢地十個人分別揸住鐵鑊、砧板、水喉通仲有士巴拿。

佢地當正Eric同志偉係殺父仇人，出盡力係咁毆。

雖然佢地啲武器無槍火大炮咁猛，但勝在出手夠狠，而且又夠疊馬。





俾十個人圍住嚟砌，Eric同志偉根本無還手之力。

佢地十個人二十隻手，一人打一下都足以令佢地收皮。

「嘭！」「嘭！」「嘭！」「嘭！」

班鏡粉一路打，Eric同志偉啲血就係咁標。

結果佢地兩個最後就俾呢班鏡粉，大大力圍毆至死。





樂觀啲咁睇，佢地啲喪屍嘅痛覺比正常人弱，所以死嘅時候雖然頭破血流，但應該唔係好痛苦。

而且對佢地嚟講，死又未必係一個悲劇，至起碼以後佢地都唔使再為搵工而感到煩惱。

搞掂完兩隻喪屍，呢十個鏡粉繼續出擊，對付埋呢條街其他嘅喪屍。

老實講，鏡粉最大嘅優勢係佢地人夠多。

就算佢地大部分人都只係個師奶仔，但所謂「蟻多嬲死象」，幾十萬個鏡粉對住十幾廿十萬隻喪屍，人數可以話佔據絕大優勢。

再加上佢地出手果斷，又快又狠又準，啲喪屍真係俾佢地打到走夾唔抖。

當中講到最狼死嘅fan屎，應該就要數到方濟各。

其他鏡粉仲用緊菜刀、鐵通，佢地方濟各已經出動埋爆炸品。





佢地買咗一箱又一箱嗰啲打邊爐用嘅細細樽石油氣罐。

只要加條引再點火掟出去，咁就會BOOM一聲爆炸，而且威力相當驚人。

之前啲人話「寧得罪女人，莫得罪鏡粉」，呢句說話真係講得無錯。

成千上萬個方濟各，聚集喺灣仔至金鐘一帶，佢地一路Boom Boom Boom，見到喪屍就炸，炸唔死就用棍或者用刀，Bang Bang Bang猛烈攻擊喪屍個頭。

總之啲喪屍唔死就打到佢死為止。