瘋狂鏡粉大戰食人喪屍: （31）

依家班鏡粉殺得性起，成個香港家下七國咁亂。

眼見情況越嚟越失控，政府當然唔可以坐視不理。

特首下令所有紀律部隊，包括懲教、海關等全力出動，連同警隊組成特別行動部隊，務求用盡一切手段都要平息呢次嘅「鏡粉喪屍大亂鬥」。

而喺特別行動部隊正式出動之前，街上面只係得一班軍裝警察應付鏡粉同喪屍。

平時啲軍裝警察都係行下咇，簽下簿仔咁，從未遇到呢啲咁嘅場面。





佢地個個手騰腳震，對住鏡粉同喪屍完全束手無策。

譬如就喺灣仔298電腦特區對出嘅軒尼詩道一帶，有十個軍裝警察，嘗試阻止一班方濟各同喪屍。

當中五個警員企喺馬路中心，用槍指住二十幾個方濟各，並且喝止對方停手。

「你班死差佬無腦架？竟然攞槍指住我地，而唔係同我地一齊對方喪屍！」其中一個揸住石油氣罐炸彈嘅方濟各，好激動同五個差佬講。

「呢壇嘢係你地班鏡粉搞出嚟架，我地勸你地快啲停手！」警員A勸告對方。





「無錯！如果你地再唔停手，咁就咪怪我地唔客氣。」警員B作出警告。

見到自己俾人用槍指住，班方濟各一時間都唔敢輕舉妄動。

喺同一時候，另外嗰五個差佬就負責對付喪屍。

喪屍嘅數量唔算好多，大概得十二隻左右。

嗰五個差佬舉起槍對住班喪屍，不斷「砰砰砰」咁開槍。





但如果要徹底殺死啲喪屍，咁最好就係爆頭。

問題就係，呢班差佬騰曬雞，手震腳震，根本連瞄準都瞄唔到。

砰砰砰砰砰砰砰—

佢地每人開咗十幾廿槍，但一隻喪屍都辣唔低，最後仲反過嚟俾班喪屍包圍。