瘋狂鏡粉大戰食人喪屍: （29）

然而呢刻變成喪屍嘅唔止阿華一個，仲有佢個friend兼舊同事志偉。
 
志偉見見下工，突然變成咗喪屍。
 
「戴志偉先生，你覺得我地公司點解要請你？」HR部一名中年女員工同志偉面試。
 
「過去幾年，我一直都從事同銷售相關嘅工作，所以有絕對足夠嘅經驗，同埋我過往嘅業績都唔差，有我嘅加入，一定可以幫貴公司爭取更多生意…」
 
「咁你介唔介意OT架？因為我地公司其實都幾忙幾多嘢做，有時啲嘢做唔曬，我地啲同事都會主動留喺度加班。」
 




「我個人唔係好介意OT，不過我想問如果OT嘅話，會唔會有OT錢補呢？」志偉問。
 
「我地公司OT就無補水嘅，不過如果你工作表現好嘅話，年尾都會有花紅嘅。」
 
「無補水…」
 
「如果你唔ok嘅話，咁都無所謂嘅。係啦，陣間我仲有其他candidates要見，不如呢個面試就到此為止啦好嗎？」
 
志偉聽到對方咁講，心入面就知今次面試又衰咗。
 




正當佢準備起身離開座位之際，office所位處嘅商業大廈其廣播系統，突然俾鏡仔嘅歌聲「焫著」咗。
 
「焫著焫著焫著焫著焫~著」
 
古有將領聞歌起舞，今有常人聞歌變喪屍。
 
「Rauuugghhhh！！！」
 
喺一瞬間之內，志偉俾呢首歌焫著咗，變成喪屍。
 




佢一嚟就住捉住個女HR隻手，然後擘大口，用牙撕開對方手臂嘅肉。
 
「啊！！！」
 
個女HR發出極痛苦嘅叫聲，並不斷咁用力掙扎。
 
志偉隻手一時捉唔實，結果俾對方用腳一下踢開咗。
 
個女HR成功甩身後，佢掩住受傷嘅手臂，衝出會議室。
 
滿口鮮血嘅志偉，第一時間從會議室追出去。
 
Office內嘅其他員工見到佢地全身血淋淋，全部都驚到匿埋曬。
 
女HR一路流緊血，一路亡命狂奔。




 
佢用平生最快嘅速度，衝出公司門口，再經後樓梯從五樓跑到落地下，以為咁樣就可以甩難。
 
殊不知落到樓下，第一眼佢就見到有兩條死咗嘅差佬，攤咗喺地下。
 
同時間，佢聽到四周圍都播緊鏡嘅嗰首《焫著》。
 
之後佢再環顧四周，見到一街都係喪屍，追啲人通街咬。
 
「啊~~唔好咬我啊~~」
 
喺距離女HR二十米嘅路邊，就有一個軍裝警察俾兩隻喪屍㩒喺地下，咬斷曬啲手手腳腳。
 
另外，對面街又有三個地盤佬，俾五個著住中學校服嘅學生哥追住嚟咬。
 




面對住眼前一片混亂又暴力嘅場面，個女HR嚇到腳到軟埋，心諗究竟發生咩事？
 
而就喺下一秒，一個拎住「Pandaroo」外賣袋嘅喪屍，從後撲跌咗佢。
 
個女HR嚇到大叫咗一聲，成個人仆落地下。
 
至於呢隻攞住外賣袋嘅喪屍，正是失業之後去咗做外賣仔嘅Eric。
 
啱先佢喺附近送送下外賣，聽到首歌，於是就變咗喪屍。