瘋狂鏡粉大戰食人喪屍: （28）

* * *

「喂阿華你有無搞錯呀！失咗業成個月，你仲有心情攤喺梳化碌電話嘅？」

「我啱先做完曬啲家務，諗住hea下啫。」

「好心你唔好淨係識得hea，俾啲心機搵工啦！」

「咁我前前後後都send咗成百幾份CV出去，但份份都無回音，咁我可以點啫？」





「咁你咪再send多百幾份出去囉，實有一份中架！」

自從阿華咬死咗自己個老細，到依家已經失咗業一個月。

佢失業咁耐，佢老婆就哦足佢咁耐。

講真，俾老婆日哦夜哦，呢種感覺真係仲衰過返工對住老細。

「我一早叫你學Ivy個老公咁，考多幾個牌旁下身，增值下自己，咁先唔會俾呢個社會淘汰，但你就成日懶懶閒，淨係識得打機、碌連登，家下搞到連工都搵唔到，真係無鬼用！」





阿華俾老婆省到一棟都無，條氣chok住chok住，

而就喺呢個時候，窗外傳嚟一陣歌聲：「焫著焫著焫著焫~著」

佢地屋企位於低層而且對住馬路，時不時都會聽到汽車駛過嘅聲音。

依家就有架鏡粉嘅車，用喇叭好大聲咁播住鏡嘅歌。

「喂你棟喺度做咩呀！出面咁嘈，快啲閂窗啦！嗰陣我都叫你唔好貪平買低層架啦，你睇Ivy佢地買到三十樓咁高，都貴幾十萬渣嘛…」





「Rauuughhh！！！！！」

阿華一秒之間變成喪心病狂嘅喪屍。

佢咆哮一聲，對住自己老婆飛擒大咬。

「死佬你做咩啊！」

「Rauuughhh！！！！！」

阿華變成喪屍之後，淨係識得咆哮，但佢心入面其實係講緊：「仆街死啦八婆！」

佢將老婆撲跌喺地下，然後擘大口，對住對方個鼻，一啖咬落去。

「啊！！！」





佢老婆成個鼻俾阿華咬甩咗出嚟，流出嘅鮮血噴曬落阿華塊面度。

從結婚嗰日開始，直到近排失業，基本上每一日對住老婆都係家嘈屋閉，阿華呢啖氣忍咗咁耐，今次佢終於都可以一振夫綱！

「Rauuughhh！！！！！」

阿華怒喝一聲，心諗死八婆我忍撚夠你啦！

之後佢哄個頭埋去，對住對方條頸係咁咬，最後就鑒生咬死咗自己老婆。