瘋狂鏡粉大戰食人喪屍: （27）

兩隻喪屍頭骨俾人扑到頭骨都裂埋，腦漿飛曬出嚟，但係班方濟各仲未肯停手，一直扑到兩隻喪屍摞低為止。

與此同時，車頂嗰兩套音響一直唔停咁播放住「焫著焫著焫著焫著」，啲聲傳到成條馬路以及兩邊行人路都聽到。

當有人或者有車經過，而嗰啲人又曾經變成過喪屍，咁一聽到鏡嘅歌聲就會立即再次變成喪屍。

拿！呢頭講完，嗰頭行人路就有三條金毛mk全身發羊吊，準備變喪屍。

咁啱有五個著住雀巢安偶像Tee嘅女人，經過行人路。





佢地手上一人揸住一把鋒利嘅菜刀。

趁呢兩條mk仔未完全變成喪屍，佢地用最快嘅速度跑過去，然後好似劏雞咁，眼都唔眨，手起刀落一嘢批咗三條mk仔個頭落嚟。

三個金毛人頭跌落地下，頸上面嘅切口如噴泉般湧出大量鮮血。

嗰五個雀巢安嘅歌迷，抹走菜刀上面嘅血漬，然後向住企喺馬路中間嘅方濟各，舉起三隻手指，表示喪屍數目減3。

投票結果公佈完之後，呢班鏡粉心愛嘅偶像輸咗。佢地全部人都覺得好唔忿氣。





佢地無辦法接受自己嘅偶像要永遠退出娛樂圈。

對佢地嚟講，以後都見唔到自己嘅偶像喺台上唱歌跳舞，呢種感覺簡直比死更難受。

所以無論用咩方法，佢地都一定要保住自己隻「仔」。

政府同市民擔心鏡仔嘅歌聲會令人變成喪屍，因而危害到社會安全。

既然係咁，只要消滅曬啲喪屍，咁咪唔使驚班喪屍喺度搞搞震，而且班鏡仔又可以留喺舞台上，繼續為大家奉獻精彩嘅表演。





呢班鏡粉就係抱住呢種諗法，主動出擊，消滅喪屍。

佢地咁多個fans club事前都無夾過，但又不約而同，好有默契咁call齊人馬，一齊對付喪屍。

佢地嘅策略好簡單，就係將當日頒獎典禮嗰首《焫著》，播到全個香港都聽到，搵曬啲喪屍出嚟，然後將佢地逐一消滅。

只要啲喪屍死曬，咁就天下太平，佢地嘅偶像就可以好似以前咁，繼續喺舞台上載歌載舞。

警方事前預計過班鏡粉輸咗之後，可能會搞事，但就完全估唔到佢地會搞出咁大件事。

事情超出預期，班差佬一時之間騰曬雞，都唔知點算好。

總之喺呢一刻，鏡粉同喪屍遍佈成個香港，整個城市徹底陷入咗一片混亂同暴力之中。