瘋狂鏡粉大戰食人喪屍: （26）

佢地架車行行下，突然身邊傳嚟一陣好熟悉嘅歌聲。

「焫著焫著焫著焫著焫~著」

佢地望一望隔籬車道，見到前後有兩架黑色寶馬駛過，車頂各自放咗一套音響。

每架車入面有四個人，全部著住粉紅色T-shirt，心口仲印住教宗個樣。

好明顯呢八個人全部都係方濟各。





「焫著焫焫著著焫著焫~著」

兩架車車頂上面嗰套音響，將首《焫著》播完一次又一次。

I仁同女高官覺得好奇怪，唔知發生咩事。

跟住過咗無幾耐，忽然間有一架Tesla失控，從後撞埋去I仁佢地架車度。

「砰」一下好大聲，架Tesla以時速100嘅速度撞埋嚟，I仁佢地成架車失控，撞埋去石壆，然後成架車上下翻側，倒臥喺馬路中心。





同電視嘅啲老土劇情一樣，架車炒咗，燃油洩漏跟住發生大爆炸。

Boom！！！佢地成架車爆開兼焫著，燒出熊熊烈火。

上一秒，I仁同女高官喺車入面甜甜蜜蜜、依依泣泣，下一秒佢地就俾人撞到炒車，並困喺車入面活生生被燒死。

雖然佢地兩個無法同年同月同日生，但總算可以同年同月同日死，都稱得上係一對浪漫淒美嘅亡命鴛鴦。

至於嗰架撞到人嘅Tesla，停低之後，有兩隻青筋暴現、面目猙獰嘅喪屍，行出車外。





其中一隻喪屍係個司機。

啱先佢聽到嗰首《焫著》，即刻全身抽搐變成喪屍，亦都係因為咁，而導致架Tesla失控撞埋去I仁佢地度。

車頂播放緊《焫著》嗰兩架黑色寶馬，呢個時候急速剎停。

下一秒，車上面嗰八個方濟各，一人揸住一碌鐵通行落車。

佢地個個凶神惡煞，急步衝埋去嗰兩隻喪屍面前，用鐵通圍毆對方。

「嘭！」「嘭！」「嘭！」「嘭！」

八個方濟各當正啲喪屍係仇人咁，用碌棒球棍咁粗嘅鐵通，對住喪屍個頭係咁扑。

有睇過喪屍片都知，若要徹底殺死喪屍，咁就一定要打佢地個頭。





仲有千其唔好睇少班師奶，惡起上嚟唔係人咁品。