瘋狂鏡粉大戰食人喪屍: （23）

喺薑毛同教宗以死相搏嘅同時，經理人草草以及其餘十個鏡仔，成功逃離現場。

佢地搭𨋢由十樓落到酒店大堂，跟住再由酒店嘅保安護送到安全嘅地方。

其中喺投票中拎得最高票數嘅I仁，就自己一個靜靜雞搭𨋢落到去地下一層。

嚟到酒店嘅停車場，佢上咗一架車牌號碼以「AM」開頭嘅白色私家車。

車上面已經有人等緊佢。





「I仁bb你嚟啦！恭喜你贏到第一名！」

「多謝你，全靠你我先可以贏到今次嘅投票。」

「唔好咁講，你嘅事咪即係我嘅事。」

「總之好多謝你，你有咩要求即管提出，我一定會滿足你。」

「咦~人地點諗，乜你仲唔清楚咩？」





「咁…不如去我屋企？」

「喂呀~你好衰架~」

之後嗰架白色私家車就離開酒店，出發到I仁屋企。

至於喺車上面同I仁卿卿我我嘅嗰個人，正正就係當初嗰位喺政府會議上，大力反對封殺鏡團嘅女高官。

咁多個鏡仔之中，佢最癡迷、最鍾意、最迷戀嘅就係I仁。





I仁之所以能夠喺公投中攞到第一名，亦都係因為有佢暗中出手相助。

喺開票前一晚，呢位女高官殺入雙葉電台總部，突然要求驗票

理論上，咁樣係唔啱規矩，只不過高官開到聲，雙葉電台點敢say no。

之前都有講過，嗰班鏡粉為咗幫自己嘅偶像增加選票，出動到用「死人票」呢一招。

果然一驗票就查到曬出嚟，而且數量仲唔少。