瘋狂鏡粉大戰食人喪屍: （22）

三個方濟各同頭先嗰三位老薑一樣，一聽到當其時鏡嘅演出，立即全身抽搐兼反白眼。

搖身一變，佢地就變成三隻喪屍。

「死肥仔！你把死人聲咪一樣聽到啲人變喪屍！」

播完首歌，教宗收返埋部電話，然後叫自己三隻喪屍攻擊薑毛：「你地三個同我上，同我咬死個死肥仔！」

「Rauugghhh！！！」





隨即三隻方濟各喪屍張牙舞爪，一齊衝前攻擊薑毛。

十幾個老薑仲有三隻老薑屍，當然唔會俾偶像有事。佢地第一時間企出嚟保護薑毛。

十幾個老薑舉起自製嘅燈牌，組成一面盾，擋住三隻方濟各喪屍，同時Amy連同兩隻老薑屍就負責還擊。

結果六隻喪屍摞埋咗一齊，互相攻擊。

Amy用牙咬斷一隻方濟各喪屍嘅手掌，但同時又俾另一隻方濟各喪屍，咬到佢小腿成忽肉無咗。





呢刻變成喪屍嘅佢地，痛覺會減弱，因此俾人咬都唔會覺得痛。

不過就算係痛，佢地都唔會介意。皆因為咗自己嘅偶像，佢地會不惜一切， 就算犧牲都在所不辭。

就係咁，呢班滿口鮮血嘅喪屍，我咬你一啖，你咬我一啖，仲要每一啖都出盡力，咬到對方流曬血甚至斷手斷腳。

就喺成班喪屍大戰緊嘅時候，教宗同一班方濟各擸起架撐，去攻擊薑毛同老薑。

教宗今次擸起兩張櫈，當做武器，想去撞開老薑用燈牌圍起嘅盾牌。





點不知薑毛趁機偷襲，用佢龐大嘅身軀反過嚟將教宗撞落地下。

見到教宗俾人撞低，班方濟各嬲到仆街，揸住燈牌衝上前圍毆薑毛，之後班老薑又加入戰團。

「死肥仔，今日唔係你死就係我亡！」

「錯啦！今日係得你死，我係唔會亡嘅！」

薑毛同教宗雖然無變成喪屍，但佢地嘅表情一樣都係咬牙切齒，非常兇狠。

佢地雙方埋身肉搏，展開咗一場你死我活嘅大混戰。