瘋狂鏡粉大戰食人喪屍: （21）

「救…救…救…命…」

雀巢安全身血肉模糊，佢攤喺地下，奄奄一息，發出最後嘅哀嚎。

如此血淋淋嘅場面，可以話相當恐怖，在場每一個人見到都覺得好反胃。

何b仔同Alton直頭頂唔順，當場嘔咗出嚟。

只不過，依家並唔係嘔嘅時候，趁住三隻喪屍享用緊雀巢安，經理人草草以及其他鏡仔，拿拿臨逃離現場。





教宗都想跟埋佢地一齊走，但係薑毛第一時間擋住喺門口，唔俾佢走。

「喂！咁急想走去邊呀？」

「死肥仔，唔好喺度阻頭阻勢！」

「我係唔讓開呀，你吹咩！」

「咁就唔好怪我唔客氣！」





教宗想郁手推開薑毛，點不知突然間有人從後捉住佢。

三隻老薑變成喪屍，同時有一班無變成喪屍嘅老薑，都想出一份力，幫薑毛對付教宗。

「放手啊！你地快啲放開我！」教宗俾成班老薑捉住，想走又走唔到，想郁又郁唔到。

「哈哈走唔到啊？你個死乸型，呢次仲唔死！」

薑毛一聲令下，叫Amy佢地三隻喪屍行過嚟咬教宗。





「Raughhh！！！」

分完雀巢安條屍，三隻喪屍滿口鮮血，一步一步咁向住教宗行過去。

儘管教宗不停咁用力掙扎，但都係無法掙脫。

佢心諗自己今鋪死梗啦。

佢瞇埋眼等住俾喪屍咬死，殊不知就喺呢個咁危急嘅生死關頭，突然出現救兵！

平時佢地啲明星，最憎嘅就係嗰啲去邊跟到邊嘅私追fan屎，不過今次呢班人就嚟得及時。

十幾個方濟各入到嚟會議室，見到自己嘅偶像有事，即刻諗都唔諗就去救人。

佢地用手上嘅燈牌，大大力扑落去薑毛同埋嗰班老薑個頭度。





忽然間俾人從後偷襲，班老薑同埋薑毛始料不及，馬上縮開手，掩住自己個頭。

跟住一班方濟各就趁呢個機會拉走教宗。

三隻喪屍衝埋嚟撲咗個空，兼且仲唔小心叉錯腳仆咗落地。

成功甩身之後，教宗先多謝救咗自己一命嘅fan屎，然後問佢地：「你地呢度有無人曾經變過喪屍？」

「我！」

喺呢十幾個方濟各之中，又有三個人舉手，話自己做過喪屍。

「咁就麻煩你地幫我一個忙！」





教宗拿拿臨攞部電話出嚟，打開當日鏡喺頒獎典禮上嘅演出片段，並將音量較到最大。

「我肥到無法想象~最愛這樣~~Oh Yeah~」

教宗播放嘅都係《焫著》，不過呢段係嗰日薑毛唱嘅部分。