瘋狂鏡粉大戰食人喪屍: （20）

「Raughhhhh！！！」

三隻「老薑屍」大叫一聲，擘大口向住教宗衝埋去。

情急之下，教宗隨手拎起身邊一張櫈，然後用力一嘢飛埋去。

張櫈「啪」一聲打中Amy，但佢面不改容，並連同另外兩隻喪屍，一齊飛身向前撲。

教宗就用佢平時跳舞練返嘅敏捷身手，一個彎腰再加180度轉身避開。





與此同時，鏡嘅其他成員以及經理人草草，個個都嚇到雞飛狗走。

佢地依家所身處嘅會議室，面積大概五百呎，中間擺放住一張長檯，同埋有十幾張櫈。

「加油！快啲咬佢！」薑毛一路喺側邊幫三隻喪屍吶喊助威。

面對住三隻喪屍窮住猛打，教宗驚慌失措。佢不停咁左閃右避，班喪屍撲向左邊，佢就匿去右邊，喪屍撲向前，佢就向後退。

直到退無可退，逼不得已之下教宗想匿入去檯底躲避。





「喂！你唔好入嚟啦，陣間引曬啲喪屍過嚟就弊架啦！」

搶先一步匿喺檯底嘅雀巢安，不停叫教宗走開，兼且仲出腳𨅝開對方。

不過教宗死都捉實雀巢安，點都唔肯走。

過咗一陣，三隻喪屍合力將成張檯反開。

雀巢安同教宗隨即就毫無遮擋，完全暴露喺三隻喪屍嘅眼前。





「Rauuugh！」

三隻喪屍張開血盆大口，飛身撲落地。

教宗反應好快，好似個滾筒咁即刻喺地下碌走。

雀巢安就慢咗半拍走唔切，結果就俾三隻喪屍擒上去，㩒住喺地下。

「救命啊！救命啊！」雀巢安一邊奮力掙扎，一邊大嗌救命。

鏡雖然準備解散，但話曬都係一場隊友，無理由見死不救。

洛克人同煙傾猶豫咗半秒，然後挺身而出想去救雀巢安。

只可惜佢地遲咗半步。





Amy大大啖咬穿咗雀巢安嘅喉嚨。一瞬間，紅色嘅鮮血就好似爆水渠咁，射到周圍都係。

另外兩隻老薑屍，就用口鑒生咬開雀巢安個肚，仲將裡面啲大腸、小腸挖曬出嚟。