瘋狂鏡粉大戰食人喪屍: （19）

「你…你地點解會喺度架？」薑毛好愕然咁問呢十幾個老薑。

「投票結果出咗嚟，我地驚你唔開心，所以特登想嚟安慰你。」

Amy係其中一位擅闖入嚟酒店會議室嘅老薑。

「多…多謝關心…」薑毛心諗自己根本無唔開心。

「哎呀陰功囉，點解你塊面瘀咗嘅？」





「係囉點解咁嘅？」

「瘀成咁，一定好痛啦。」

班老薑見到薑毛塊面俾人打瘀咗，一齊圍埋去關心自己嘅偶像。

薑毛唔鍾意俾人摸身摸勢，於是佢立即退後兩步話自己無事。

同時佢摸一摸褲袋，發現自己部電話唔見咗。





隨即佢周圍望一望，見到部電話跌咗喺地下。

唔使問，一定係頭先俾教宗撻落地嗰陣，跌咗部電話出嚟。

佢推開班老薑，拿拿臨行去執返起部機。

部電話個mon裂咗少少，薑毛㩒咗幾下，睇下部機仲著唔著到。

結果部機無壞到，但薑毛就唔小心將當日頒獎典禮，佢地喺台上表演嗰條back up片開咗出嚟。





呢條片佢地每個人手上都有back up，大家有時見到面，得閒就會拎出嚟笑下邊個人唱得唔好。

而佢地當日表演嘅曲目係年度冠軍歌《焫著》。

除咗合唱嗰部分，佢地十二個人每人都有自己嘅一小段。

呢個時候，薑毛唔小心開咗條片出嚟，咁啱就播緊教宗唱歌嗰一part：

「Whoa~Yeah~由得我愛情裡等Joe Yeung~~~」

作為老薑嘅Amy曾經變成過喪屍。此時此刻，當佢再聽到當時鏡嘅呢段演出，大腦馬上受到刺激。

佢成個人好似鬼上身咁，身體抽搐，雙眼反白，全身上下嘅皮膚青筋暴現。

佢呢個樣就同當日喺頒獎典禮現場，變成喪屍嗰陣個樣一模一樣。





除咗Amy之外，原來同場仲有兩個老薑都係喪屍。

「Raughhhhh！！！」

佢地三個面目猙獰，發出可怕嘅咆哮。

薑毛第一下反應係好驚，之後第二下反應就係好得戚咁同教宗講：「拿！你睇到啦，啲人就係聽到你把死人聲，所以先變成喪屍架！」

講完呢句，下一秒，薑毛就命令班喪屍去攻擊教宗。

「你地三個同我衝過去，咬死呢個死乸型！」

「Raughhhhh！！！」





老薑變成喪屍，依然都係老薑，就算喪失理智，但依然認得到偶像把聲。

只要薑毛叫到，佢地一定會照做。