瘋狂鏡粉大戰食人喪屍: （18）

「喂你有無搞錯啊！開罐汽水都唔識開！」教宗即刻用紙巾抹一抹塊面。

「Sorry囉。」

「一句sorry大曬呀？」

「咁你仲想點呀？使唔使我跪喺度同你叩頭認錯？」

「你肯叩，我肯受呀！不過你個肚腩咁大，我驚你連腰都彎唔到。」





「你收皮啦！死乸型！」薑毛好惡咁鬧教宗。

「唔夠人講就人身攻擊，真係無品！」

「你係死乸型啊！我有講錯咩！」

「咁你個死肥仔係咪要同我叩頭道歉，係就快啦！」

「我叩你個屎忽啊！」





「你講還講，唔好咁粗鄙拎人個屎忽嚟講！」

「我係鍾意講呀！我叩你個屎忽！叩你個屎忽！」

「收嗲啦你！」教宗一時激動起上嚟，一手拍走薑毛手上嗰罐可樂。

見到成罐可樂倒瀉曬喺地下，薑毛嬲到爆炸，一拳盅埋去教宗度：「我頂你個肺！我罐可樂淨係飲咗一半喳！」

教宗避唔切，心口食咗一槌，跟住佢向對方講咗句四個字嘅粗口，然後起飛腳還拖。





其實佢地兩個不嬲都唔啱牙，大家一直都睇對方唔順眼，橫掂家陣成隊鏡都要解散，咁就無需要再忍，直接隻揪隻打過。

換轉係以前，草草或者都會阻止下佢地，不過呢兩個人，好快就唔係公司旗下嘅藝人，所以佢費鬼事勞氣，靜靜雞食口煙好過，由得佢地打餐飽。

洛克人就睇唔過眼，主動上前勸交。

不過拳腳無眼，佢一行埋去就唔知俾邊個肘頭批到個鼻，當堂爆曬缸流鼻血。

結果佢勸交唔成，佢仲要其他人幫返佢止鼻血。

「你個死肥仔，我忍你好耐啦！」

「哼！我都忍你好耐啦死乸型！」

薑毛同教宗兩條友攬埋一舊喺度打爛仔交。





佢地一個扠人條頸，一個就扯人頭髮，

雖然薑毛體型肥胖，但肥唔代表大力。

相反教宗一路有keep fit，身手比較敏捷。

教宗用力扯住薑毛嘅頭髮，跟住扯扯下突然間鬆開手，反過嚟捉住對方嘅手臂，然後嚟一招過肩摔，將薑毛狠狠咁撻落地。

「砰」一聲，薑毛背脊撻落地，痛到佢忍唔住大嗌咗一聲：「仆你個街！好痛啊！」

之後教宗仲未肯收手，想再衝埋去質多對方兩槌。

薑毛見自己唔夠抽，驚到拿拿臨扒起身調頭走。





佢打開門想離開會議室，殊不知一開門就見到有十幾個老薑捕住喺門口。

薑毛打咗個突，嚇咗一跳。

佢呢班死忠fan屎唔知喺邊度收到風，知道咗班鏡仔藏身喺呢度，於是就偷偷地鼠入嚟。