瘋狂鏡粉大戰食人喪屍: （17）

呢幾年薑毛搵埋搵埋啲錢，基本上都夠佢退休嘆世界，家陣攞正牌唔使做，佢不知幾開心。

不過教宗就完全相反，呢刻佢面上嘅表情，完全流露出心底嗰份沮喪同失望。

雖然呢幾年佢賺嘅錢都唔少，但錢對嚟佢講並唔係最重要，最重要係佢好熱愛舞台，好享受喺台上面表演。

所以佢真係好唔甘心自己要以咁嘅形式退出娛樂圈。

「恭喜你地，你地實至名歸。」





輸咗嘅雀巢安就好識做，主動去恭喜I仁同埋Alton。

I仁點一點頭，以一個禮貌嘅微笑回應。

Alton就仲未反應到過嚟，佢以為自己發緊夢，完全唔敢相信自己贏咗。

而坐喺佢隔籬嘅何b仔就傷心過度，忍唔住大聲喊咗出嚟：「嗚嗚~~以後我都無得唱歌啦~嗚嗚~」

身為隊長嘅洛克人安慰對方：「傻仔嚟嘅，唔好喊啦。」





反觀「遮米」、「老虎機」、「赤柱」、「法蘭基」，呢幾個無乜人氣嘅成員，得知結果後嘅反應就相對平靜。

或者佢地都知自己本身人氣唔高，都預咗贏唔到，所以無期望就無失望。

呢個投票結果就令經理人草草有少少跌眼鏡，佢估唔到Alton居然會贏到。

按照承諾，公司會同贏到嘅嗰兩個人續約。

雖然結果同公司預期有少少偏差，不過依家都無其他選擇，只能遵守承諾同I仁以及Alton續約。





「哈哈終於退休啦！」薑毛飲完一罐可樂，又開一罐，慶祝自己功成身退。

但唔知係咪呢罐可樂入面太多氣，佢一打開個蓋，啲汽水就噴曬出嚟。

咁啱教宗坐正喺佢隔籬，就俾啲汽水彈到一面都係。