瘋狂鏡粉大戰食人喪屍: （16）

等咗咁耐，時間終於都嚟到十點正。

投票結果正式公佈。

收音機、Youtube同步直播，由雙葉電台嘅著名DJ林九宣佈結果。

呢一刻，經理人草草以及十二個鏡仔，仲有一大班鏡粉，緊張到幾乎抖唔到氣。

DJ林九用認真嚴肅嘅語氣，公佈票數：





「今次由政府及本台聯合舉辦嘅投票中，合共有520萬名市民投咗票，投票率約為75%。當中得票最多者係『I仁』，佢一共獲得80萬9千票。第二位係『Alton』，總得票係72萬5千。」

「根據規定，得票率最高嘅頭兩名，將可獲准繼續留喺娛樂圈，因此我喺度代官方宣佈，I仁同Alton可以繼續留低，其餘十位成員就必須退出，從此以後不得再參與任何幕前工作。」

嘩！呢個結果實在令人大跌眼鏡！

估唔到薑毛同教宗居然大熱倒灶，I仁同Alton以黑馬嘅姿態爆冷勝出！

呢個消息一公佈，聚集喺尖沙咀街頭嘅一班I仁歌迷，開心到大聲歡呼，並即場開香檳慶祝。





而Alton嘅fan屎直頭係喜出望外，佢地點估都估唔到，自己嘅偶像嘅竟然贏到薑毛同教宗！

相反，雀巢安、煙傾、何b仔等人嘅一眾歌迷，感到極之傷心，好多都忍唔住喺條街度喊咗出嚟。

而最失望嘅一定係嗰班老薑同方濟各，明明從投票嘅走勢，薑毛同教宗一直領先，但最後結果出到嚟竟然係咁。

佢地對呢個結果感到極度沮喪同不忿。

一班方濟各迫爆成條軒尼詩道，一路高舉燈牌，一路憤怒咁大嗌：「還我教宗！還我教宗！還我教宗！」





喺另一邊廂，霸佔咗成個銅鑼灣嘅老薑，就衝出馬路，直接用行動宣洩對賽果嘅不滿。

然而比起老薑嘅憤怒，薑毛本人就輕鬆得多。

知道結果之後，薑毛鬆咗一口氣，第一時間開返罐可樂慶祝：「Yeah！終於可以名正言順退休lu~」