瘋狂鏡粉大戰食人喪屍: （15）

家陣香港經濟唔好，過去一個月，佢地各自send咗百幾份CV出去，但都無回音。

直至到今日，志偉先遇到有公司肯俾佢面試。今朝晨咁早佢就搭車出門口趕去interview。

相反阿華就連interview嘅機會都無。

最弊係無工返之餘，阿華仲要俾個老婆日哦夜哦，煩到佢就嚟人都癲。

Eric就選擇馬死落地行，既然未搵到工，咁唯有送住外賣先，幫補生計。





做咗咁多年人，佢地都知道做人真係好撚辛苦。

有工返又煩，無工返又煩，總之每一日都要為生活而煩惱。

相比之下，做隻無腦喪屍似乎更輕鬆，想咬人就咬人，想發洩就發洩，而且個個人見到都怕咗你。

今次投票佢地都投咗Alton，就係睇中佢唱歌唱得夠難聽。

佢地三個希望對方有機會再一展歌喉，令佢地再一次變成喪屍。





最起碼變成喪屍之後，佢地可以徹底忘記失業嘅煩惱。

之前都有提過，佢地三個人為咗幫Alton助選，專登開咗個群組。

個group嘅成員人數由最開初嘅三位數，慢慢增加到六位數。

裡面除咗有本身Alton嘅歌迷，亦都有好多連登仔，以及一大班想再次變成喪屍嘅人。

然而，從投票走勢嚟睇，大熱依然都係薑毛同教宗，唔知有無機會出現爆冷呢？