我嘅大學生涯 (有甜): 第六日

我再次打開眼，仲係間房入面，但阿蓉已經唔係到。
 
原來場夢仲未發完，我已經分唔清我到底係現實世界定係夢入面。
 
有一把好熟悉同時亦都好陌生嘅聲音同我講野，佢坐咗係我張書枱到，兩隻眼望住部電腦，隻手不斷係鍵盤到禁禁禁。
 
蔡煒燕：「終於醒啦？我幫你打好今日要出嘅文啦。」
 
我：「比我睇下...哇你寫乜鳩呀？玩Ocamp玩到一開波就扑野，之後又落老蘭，你想像力會唔會太豐富？」
 


蔡煒燕：「唔豐富嘅話男神個故就唔會咁多人睇啦，想當年我每日一起身，諗都唔洗諗，直接憑感覺打二千字出黎。」
 
我：「我知四年前呀嘛，但宜家寫一篇文都要諗幾日先寫得出啦。」
 
蔡煒燕：「唉歲月真係不留人，你知唔知當年我好多粉絲架，唔似宜家你寫咁耐都無人理無人睇。」
 
我：「無人睇咪無人睇囉，我一啲都唔care呀，我寫故係興趣唔係為咗點擊次數。」
 
蔡煒燕：「你只係唔願意承認我好過你姐，我人又靚仔過你，寫嘅野又好睇過你，女都多過你呀。」
 


我：「你咪又係我創造出黎，無我你會咁靚仔咁多女？」
 
蔡煒燕：「你創造我嘅目的只不過係為咗逃避現實，現實中嘅你只係一個毒撚，一個成日扮emo嘅on9仔。」
 
蔡煒燕：「你問下你自己有啲咩係叻？係讀書讀到大學，但又唔係最top個3間，係識打波，但又唔係打得勁，係打機唔差，但積分又上唔到高rank，係識好多人，但真係當你係朋友嘅又有幾多個？」
 
我：「唔好再講啦...」
 
蔡煒燕：「你一直都希望自己可以成為一個特別嘅人，可以得到其他人嘅關注，但事實就係你根本做唔到，就連識女仔你都只係得把口，約人出街嘅勇氣都無，你根本無一樣野係做得好。」
 


周身刀無把利，個人無任何目標，無任何興趣，無任何主見，咩都無所謂，咩都隨波逐流。
 
每次都話自己會改變，但每次都係原地踏步，應承自己下次唔會再咁做，但結果又係重蹈覆轍。
 
有時候我係到思考到底自己生存嘅意義係啲咩，個天整我出黎係為咗啲咩，講笑話希望自己聽日就比車撞死，但發現原來唔係笑話黎。
 
有睇男神個故就知蔡煒燕係一個自信心好高，好靚仔好有人氣，好識溝女嘅一個男仔。
 
我將呢個故嘅主角叫做魏煒燕，代表嘅係一個偽造品，一個翻版。
 
一個好想成為蔡煒燕嘅男仔，但係我幾盡力去模仿都好，都係做唔到。
 
回望返呢四年，我有無做啲咩係值得驕傲，有嘅如果GPA過3都計嘅話。
 
每日都渾渾噩噩，得過且過咁過日子，望住IG啲人好風光，心入面除咗羨慕之外咩都做唔到。


 
Inside out入面我最鍾意嘅就係阿慕，除咗佢得意之外，更重要嘅係代表我心入面個種羨慕。
 
大學我無住Hall，無上莊，無拍拖，淨係做咗讀書同返Part-time。
 
我唔知我呢個大學生涯到底做咗啲咩，做咗好多野但同時又好似咩都無做過咁。
 
成日都問自己你甘心過啲咁嘅生活咩？同你同年嘅人日日去蒲，日日去玩，日日拍拖，而你仲成條柒頭咁咩都無變。
 
唔甘心但係我無辦法，因為我只係一個拒絕自己平凡嘅平凡人。
 
我發現自己忘記咗好多野，快樂嘅感覺，心動嘅感覺，傷心嘅感覺，我已經感覺唔到好多野。
 
一方面懷念過去，同一時間又想抽離過去，真係好矛盾。
 


如果問我有咩想同四年前嘅自己講，我諗我會叫佢唔好寫故，唔好亂搞男女關係，諗清楚自己到底想要啲咩。
 
不過我諗我都係會走去寫故，人就係咁犯賤。
 
我阿媽同我講，出生個陣幫我算命條友話我第時靠把口搵食。
 
或者我宜家死淨把口都係天注定。
 
從相簿中跟我又再會面 輕翻起每一片
十八歲再度浮面前
也許一切在變 又或者始終沒打算
我與我分開已很遠很遠 在浪潮兜兜轉轉
 
今章係我同自己嘅對話，下一章會係最後一日，我同你地之間嘅對話。



https://www.youtube.com/watch?v=S7iYug_j5tI