我嘅大學生涯 (有甜): 第五日

阿蓉：「你捨得起身未呀？」
 
我半夢半醒咁打開眼，個亮度光到好似朝早打開窗簾，直接比太陽射落塊面一樣。
 
我：「哇...幫幫手閂返個窗簾先...」
 
阿蓉：「唔幫呀，你快啲同我起身呀。」佢夾硬拉起我個人。
 
我係自己個房到，無數錯嘅話今日已經係第五日，我完全唔知呢五日到底發生咩事，只係知五日見咗五個人。
 


我：「點解你會係到？又有人叫你黎？」
 
阿蓉：「我係你女朋友，係你間房到出現唔係好正常咩？」
 
我：「正常？我呢幾日過得好唔正常喎，比人困咗係間勁黑嘅房到，跟住又飛咗去以前間中學到。」
 
阿蓉：「肯定係你發夢啦，頭先我叫極你都唔醒，快啲出去刷牙洗面食早餐啦。」佢打開房門行出去。
 
實在太好啦，我終於返黎現實世界，結果之前所有野都只係一場夢。
 


佢叫咗M記早餐，起身有得食塊薯餅真係一個Good morning黎，咁幸福得唔得。
 
阿蓉：「你到底發咩夢發到可以唔捨得起身。」
 
我：「我都唔知呀，不過係夢入面見到好多識嘅人，同佢地傾計傾咗好耐。」
 
阿蓉：「咁好傾唔見你同我傾下。」
 
我：「同你日日都傾架啦，咩都知道哂仲有啲咩好傾。」
 


阿蓉：「係咩，咁點解當初我叫你唔好唔要我嘅時候，你都係選擇唔要？」
 
我：「因為我覺得你唔值得浪費時間係我身上。」
 
阿蓉：「我同你講無論發生咩事，我都願意等你返黎，結果你都係決定離開我，我都唔知點解我要對你咁好。」
 
我：「係我對你唔住，我辜負咗你，我係仆街冚家剷。」
 
我係一個好鍾意睇返以前啲對話記錄嘅人黎，次次睇返都覺得自己早知今日何必當初，又或者覺得應該有更好嘅處理方法。
 
正如之前所講，當我睇返同你之間嘅對話記錄，係我個陣太壞太衰，對唔住。
 
雖然我真係無資格講呢句說話，不過至少我諗我同你都經一事長一智。
 
我愈黎愈覺得每個人嘅相識都係一種緣份，我唔信佛但係我覺得呢句好有道理。


 
前世五百次嘅回眸先換得今世一次擦肩而過。
 
正如啲人所講，你每日都會遇到唔同嘅人，但唔係每個人都可以認識做到朋友，甚至有發展空間。(印象原句好似係 唔係每個人會陪你返屋企)
 
你嘅出現教識咗我以後要好好處理每一段關係，無論係屋企人，朋友定另一半。
 
時間沖淡咗好多野，見到你話你原諒咗我個刻，我個心亦都安落咗唔少。
 
另一個人無話原唔原諒我，但係見到你已讀咗我，我都覺得己經好足夠。
 
做錯要認打就要企定，雖然我呢個道歉遲咗好多，但要道歉嘅始終都要道歉。
 
我比人傷害過，亦都傷害過人，人際關係係一生嘅課堂，我相信無人夠膽話自己可以完美咁處理每段關係。
 


惟有每次都從錯誤中學習，念茲在茲，希望你地都一樣。
 
以前嘅我一直都諗緊點解自己會比人排斥，明明大家都一齊玩，但偏偏出街或者食飯嘅時候唔會叫埋你。
 
相信大家都明白係IG見到啲朋友約出黎，但你就係屋企一個人，諗緊佢地做咩唔叫我一齊。
 
以前嘅我一直都對呢樣野好上心，對佢地好失望，甚至開始思考佢地有無當我係朋友。
 
直到宜家我先知朋友呢樣野係無得強求，有啲人表面上當你係朋友，但實際上佢地根本就唔care你。
 
呢個世界無話無咗邊個唔得，因為世界太大啦，總有人勁過你叻過你，甚至可以取代埋你。
 
就好似一段識咗十年嘅關係，都未必比得上識咗一個月嘅關係。
 
所以我覺得要識得分邊啲係真朋友同假朋友，同埋唔好覺得無朋友係一件慘事。


 
事實就係你出街嘅時候，望下周圍嘅人有幾多個係自己一個人行街，你就會發現孤獨嘅唔止你一個。
 
比起其他人，識得同自己相處更重要，因為無人可以陪到你死，除咗你自己。
 
沒有一聲再見 沒有半聲嗟怨
淡淡去但無言 過去終於過去
留下了當初一切在懷念
 
我：「多謝你，希望你之後過得一切安好。」
 
阿蓉：「嗯你都係。」

https://www.youtube.com/watch?v=5hN-kEv3TWw