我嘅大學生涯 (有甜): 第二日

間房比琴日光咗少少，如果琴日能見度係0%，咁今日應該有20%，起碼我見到自己啲手手腳腳。
 
不過都係好黑，而且我到宜家都唔知自己到底係邊。
 
同琴日一樣我又聽到腳步聲，今次呢個人隻手拎住小王子嘅夜燈行過黎。
 
我：「係你呀麻呼，傾計之前可唔可以答我到底我地係邊？」
 
麻呼：「我都唔知喎，頭先有人話你有野搵我，我先過黎咋嘛。」
 


我：「吓？邊個咁大整蠱，我極度懷疑佢困住我係到。」
 
麻呼：「唔緊要啦，宜家有我同你一齊困係到，佢放我地出去之前我地傾下計先啦。」
 
點解大家可以咁冷靜，明明我地有可能比人綁架緊，點解仲可以話傾下計先。
 
我：「咁你有啲咩想傾呀？」
 
麻呼：「或者你有無啲咩說話想同我講？」
 


又係呢句？又係問我有無野想同佢講，乜我宜家比奇異博士用時間寶石輪迴緊咩？
 
我：「琴日有個女仔又係咁樣問我，到底發生咩事姐。」我好激動咁彈起身。
 
麻呼：「你冷靜啲先，或者佢同我一樣，好想知你到底諗緊啲咩姐。」
 
我：「好！你地咁想知我諗咩我就話比你地知！」
 
你只不過係我幻想出黎嘅理想情人，一個好體貼好溫柔，咩都以我為先嘅女朋友。
 


 結果現實嘅你同我幻想嘅係完全相反，事實就係你根本唔care我感受。
 
有日我同學話想介紹一個女仔比我識，我見張相影到個女仔都幾得意，自自然然就話可以。
 
一開始我地都係用wts對話，然後我問你拎snapchat，因為snapchat儲火嘅話每日都要影一張相比對方，所以我就係啲相到問下你去咗邊到玩，咁樣去打開話題。
 
好快我地就熟咗，我亦都沉咗，膽粗粗走去sit你堂，不過太怕羞傾得唔算太多。
 
直到有日我問你要唔要出去玩，但係我完全無計劃過要做啲咩，亦都唔知去邊。
 
最後我同你決定去睇戲，結果就係戲院到撻著咗，我係個到拖住你隻手，成套戲幾乎無睇過咁滯。
 
當初拖實你是我犯了錯
 
你生日個陣我送咗隻戒指比你，你問我係咪有啲咩暗示，係咪唔應該收，我同你講，除咗你之外，無人值得收。


 
因為我同你生日只係隔咗大約一個禮拜多啲，到我生日嘅時候，你專登黎我屋企樓下搵我，送咗隻公仔比我。
 
我諗個次生日可能係我過得最開心嘅一次生日。
 
同你去科學館到玩，人生第一次去酒bar飲酒，夜晚同你行返屋企，係地鐵站到攬住你，你考試太大壓力乜春都唔識，我不嬲諗辦法去氹你。
 
可惜係我太著緊，佔有慾太強，一有男仔嘗試埋你身我就好緊張，叫你同佢講你有男朋友但係你唔肯，因為你一直都唔肯比「男朋友」呢個身份我。
 
我知自己唔係一個好情人，又或者係我對你太無信心，對唔住，因為我對自己都無信心。
 
但係我已經當咗你係我女朋友。
 
所以陳蕾唱嘅，其實係我。
 


「是我不懂愛 讓你感到沒自由 寧願放手
太多的爭拗 讓愛逼進絕路 怎向前走」
 
去到聖誕節，我有嘗試約你，但結果你係IG到Po話幾時先有人陪我過聖誕，去到個陣我開始思考緊，我對你黎講到底係啲咩。
 
最後我終於得出一個結論，所有野都係假嘅，一切都只不過係虛情假意，根本由拖手攬實都唔係男女朋友嘅關係個刻，我應該就要明白，我應該就要get到，我應該就要知你根本唔鍾意我。
 
你只不過享受緊拍拖嘅感覺，而唔係鍾意我。
 
所以去到最後我同你講「不如算啦，趁大家仲未認真嘅時候，我地做下朋友就算。」，但其實我已經認真到無得再認真。
 
我後悔我踩咗入去 當我想轉身 我發覺無得後退
 
「對唔住，唔係你嘅錯。」
 


「但係我宜家心態未調整好，仲係玩下玩下咁。」
 
「或者我同你仲係未了解清楚，所以做住朋友都好嘅。」
 
不過唔緊要啦，對我黎講所有野都已經唔重要。
 
我：「多謝你教識我，以後當我發覺自己無機會，或者對方玩下玩下嘅時候，我就會及早離場，唔會再比自己受到傷害。」
 
麻呼：「知就好啦，要記住呢個世界最壞罪名叫太易動情，千祈唔好喜歡這罪名呀。」
https://www.youtube.com/watch?v=9g3XXXdnjqY