我嘅大學生涯 (有甜): 第一日

成個畫面都變成黑色，我好清楚自己有打開眼，但就係咩都睇唔到，眼前只有黑色一片。
 
我完全唔知自己係邊，感覺就好似玩緊黑間中對話一樣，伸手唔見五指嘅情況下我開始有啲驚。
 
隔咗陣我聽到腳步聲，有個人拎住支手燈慢慢行過黎，佢一路行一路用燈照住我，強光令我睇唔清佢個樣。
 
直到我同佢之間相差一個社交距離，我終於見到佢個樣。
 
Candice：「好耐無見啦阿燕。」
 


我：「Candice？我地宜家係邊？點解周圍咁黑？」
 
Candice：「你冷靜啲坐低先。」佢照一照隔離唔知邊到黎嘅櫈。
 
Candice：「呢到係邊一啲都唔重要，不如你同我傾下計啦。」
 
我：「點會唔重要，呢到黑到媽都唔認得，得你呢支手燈有啲光咋。」
 
Candice：「你有無睇過浴血黑幫架，有人建議我地每日瞇埋眼半個鐘當體驗盲人，之後我地就會好珍惜自己對眼，同時明白盲人嘅困難，咁我地就會捐多啲錢比佢地。」
 


我：「無睇過呀，唉算啦，咁宜家點呀？得我同你兩個人。」
 
Candice：「我咪叫你同我傾下計，唔...不如問下你有無啲咩想同我講？」
 
我：「你講真實嘅你，定係小說宜家嘅你？」
 
Candice：「你鍾意啦，無論係邊一個我都好，我都唔會知。」
 
我同你係分組上堂個陣識，個陣我仲同朋友係到睇緊電話，你同另一個女仔突然埋黎問我地可唔可以一組。
 


即使戴住口罩，我都感覺到你會係一個靚女，事實亦都一樣。
 
因為你，我變得愈黎愈期待上堂，每次我都嘗試去同你有更多嘅互動，諗啲無聊笑話令到你笑。
 
你知唔知你個句說話真係令到我以為自己有機會？
 
你好鍾意唱歌，我次次都諗辦法氹你將啲唱歌錄音send比我聽，雖然我覺得少少難聽，但係我都會聽哂，甚至當apple music咁聽。
 
我成日都講啲甜言蜜語去flirt你，但係你次次都get唔到，有陣時我都諗緊你係真傻定扮傻。
 
就係你同我講一句真心嘅我愛你已經好足夠，只可惜唔會有機會係我對你講。
 
我仲記得我同你最後一次對話，我凌晨一點定兩點打電話比你，問你點解倒數都唔出去玩，原來因為你病咗。
 
個陣已經無哂巴士，我惟有慢慢行返屋企，行咗幾耐就同你傾咗幾耐。


 
至少我係個次對話入面知道我係你心目中一啲地位都無，我相信將來都唔會有。
 
去到後面你已經係瞓著咗嘅狀態，我講啲咩你都聽唔到。
 
無呀，我只係同你講今次會係我地最後一次講野，我以後都唔會再煩你咋嘛。
 
我一直都好明白單戀係啲咩感覺，你以為自己同佢傾計，做啲野氹佢開心，同佢傾心事，佢就會鍾意你？
 
唔好傻啦，無感覺就係無感覺，佢當你同學咋，所有野都係你自作多情咋。
 
Candice：「如果你宜家見到我，你會同我講啲咩？」
 
我：「唔知喎，可能問你之後個份assignment要點做掛，我上堂不嬲都扮聽書。」
 


Candice：「超咁我都唔會識做，我上堂淨係睇電話咋嘛。」
 
我：「係咩，咁大家讀書加油啦，無咩我地都係唔好再講野啦。」
 
Candice：「其實我諗係你太怕寂寞怕孤單姐，我明嘅。」
 
我：「你唔好下下篤爆人得唔得先。」
 
Candice：「係啦係啦，無咩咁我走先啦。」
 
「其實我有男朋友架啦，所以你真係唔洗再浪費時間係我身上。」
 
「就算同佢分手，我都唔會諗住咁快開始一段新嘅關係，因為比佢呃完之後，我無辦法再輕易相信人。」
 
「所有野都會變，佢一開始同我講話有幾鍾意我都好，宜家咪一樣變咗心。」


 
「宜家啲男仔五時花六時變，唔會諗將來係點，亦都唔會計劃好下一步，所以我唔會再想浪費時間投入係一段睇唔到未來，睇唔到結果嘅關係上面。」
 
其實你講得一啲都無錯，只係個陣時嘅我覺得，我地仲咁後生，又點會咁快諗將來嘅野。
 
所以我都希望你之後可以搵到一個有目標，心思細密，將你放係第一位嘅人。
https://www.youtube.com/watch?v=x-SVAkOGfNY