我嘅大學生涯 (有甜): 逝去

第二日瞓醒見到呢則新聞，我唔識得反應，只係好無力咁坐係張床到。
 
成件事太突然，我真係無辦法相信，我打開Hanna個IG，啲Post嘅留言全部都係RIP，但即使係咁我都唔相信。
 
直到則新聞Po埋Hanna個樣，我先強迫自己接受個嗰真係佢黎。
 
我諗唔明點解佢要自殺，佢已經成功離開咗個嗰男仔，亦都搵得更加多錢，我唔明...我真係唔明...
 
我打電話比明仔，佢無聽，我惟有Wts同佢講我想約佢出黎見面，隔咗幾分鐘之後佢話ok。
 


明仔：「yo，頭先塞車遲咗少少，今日有咩搞呀老友。」佢跳下跳下咁行過黎。
 
我：「點解...？乜你唔知Hanna走咗咩...？」點解你宜家仲可以嬉皮笑臉咁...？
 
明仔：「我知呀，我都估唔到佢咁睇唔開。」
 
我：「你可唔可以話比我聽，點解佢要自殺？」
 
明仔：「呢點我又唔知喎，可能係我話同佢分手，佢接受唔到而自殺掛。」
 


我：「分手？點解你要同佢分手？」
 
明仔：「玩厭咗咪分囉，拍拍下覺得自己都唔係咁鍾意佢，所以咪分手。」
 
明仔：「唔好提佢啦，你睇下我條新女，正唔正呀？」佢打開另一個女仔個樣比我睇。
 
我：「佢啱啱先走咗，點解你完全唔覺得傷心？仲可以咁快搵另一個。」
 
明仔：「你教我嘅，感覺一係有一係無，我對佢都已經無感覺，不過係有少少Sad嘅，小小事就睇唔開。」
 


我：「我屌你老母！！」我忍唔住一拳打落佢塊面到。
 
佢呆咗咁望住我，我衝過去想再打多拳，但比佢避開咗，然後佢一腳踢落我個肚到。
 
明仔：「你癡撚咗線呀？！小小事係到打我？！！」
 
我：「小事？！！你宜家搞到Hanna死咗呀！！！」
 
我再衝過去，失哂控咁撞落佢到，但係我唔夠佢大力，比佢直接推落地下。
 
佢一拳一拳咁打落我塊面到，我嘗試反抗，不過已經無哂氣同力，只係不斷比佢打。
 
我：「Hanna永遠都唔會原諒你...」
 
明仔：「你估我唔知你個陣只係利用我？你利用我對佢嘅感情去達成目的，又有無考慮我想唔想？」


 
明仔：「要怪就怪你自己將所有野諗得太美好，人地嘅感情唔係你話點就點，你先係害死佢個嗰！」
 
佢企返起身好鄙視咁望住我，然後擰轉身離開，得返我一個瞓係地下望住個天。
 
「但係你又有無諗過人地想唔想你幫？而且我最擔心嘅係...你會越幫越忙。」
 
結果Emily講嘅一啲都無錯，我又親手害死人，我以為自己可以幫Hanna脫離地獄，但原來就係我將佢推落地獄。
 
我：「對唔住…」
 
我成個禮拜係屋企無出過街，就連阿蓉搵我都無理，佢上黎拍我門，我就帶耳機扮聽唔到。
 
我嘅出身就係一個錯誤，帶比其他人嘅只有不幸，選擇題次次都係揀中錯嘅答案。
 


同一時間失去咗兩位好朋友，我心痛點解Hanna諗唔開做傻事，亦都好心痛點解明仔最後會變成咁。
 
全部都係因為我。
 
「我終於明白你嘅感受，我有個朋友走咗。」
 
「想喊就喊唔好忍，有咩事搵我。」
 
呢個moment即使阿樹終於覆我，我都無太大感受，無論邊個搵我，無論我做啲咩，無論講幾多野。
 
Hanna都唔會再返黎。
 
Picture this, in bed, get a phone call
Girl that you fucked with killed herself
That was this summer and nobody helped


And ever since then, man, I hate myself
Wanna fucking end it
 
Hanna同我講過，佢好鍾意睇日落，所以我決定出發去佢成日去個嗰沙灘到。
 
去到嘅時候個沙灘到無乜人，好似專登比我可以靜靜地一個人，我坐係地下，啱啱好時間等到日落。
 
佢話覺得日落好靚，好似代表緊有始有終一樣，所有野都唔係永恆，個太陽升起照亮我地，但夜晚就會返屋企。
 
同我地條命一樣，轉瞬即逝。
 
我嘅記憶仲停留緊佢叫我幫佢做問卷個一日，明明好似只係前幾日嘅事，但係以後去圖書館我都唔會再見到佢。
 
Hanna多謝你，記住 我會。
 


我搭小巴準備返屋企，期間一路睇住Hanna IG之前啲Po，一路忍唔住喊。
 
直到五條悟一下比宿儺砍死。
 
BOOM！