我嘅大學生涯 (有甜): 倒數

十二月三十一日，後生仔會當今日係倒數日，大人會當今日只係今年嘅最後一日。
 
但我仲係一個後生仔，一定係約人出黎夜晚倒數。
 
「黎到最後一日，你係咪都打算唔理我？」
 
雖然都知佢唔會覆，至少比我期望下會有奇蹟出現。
 
我黎到籃球場，自己一個人係到射波，因為每年嘅除夕，我同佢朝早都會係到打波吹水。
 


原來熟悉嘅唔係呢個球場，而係曾經一齊打波嘅隊友。
 
不過我都只係打咗個半鐘到，當懷念下以前個種熟悉嘅感覺。
 
阿蓉：「倒數你想去邊到玩呀？」
 
我：「我Ocamp個班話去其中一人屋企到BBQ喎。」
 
阿蓉：「吓，咁我點呀？」聽得出佢好似想殺咗我咁。
 


我：「不如你都一齊黎？我諗多一個人佢地唔會介意。」
 
阿蓉：「會唔會唔係幾好意思呀？」
 
我：「佢地唔緊要嘅，就咁話啦，我一陣同佢地講先。」
 
如是者我同阿蓉夜晚就去咗珍妮屋企，有時候貧窮真係限制咗我地嘅想像，邊估到真係有人屋企個廁所仲大過你個房。
 
珍妮：「黎咗啦阿燕，仲帶埋女朋友喎，你地放低啲野先，我拎杯野飲比你地。」然後佢就行咗去廚房。
 


阿蓉：「你個Friend間屋...會唔會太大...？」
 
我：「我知佢有錢，但估唔到有錢成咁。」果然係曾經嘅細龍太。
 
阿洛：「Hello阿燕，呀仲有燕嫂。」
 
其他人：「燕嫂好！」我留意到麻呼個樣，有少少不屑嘅感覺。
 
阿蓉：「燕嫂呢個名好難聽喎，叫我阿蓉得架啦。」
 
Chris：「係嘅燕嫂。」
 
時間仲有啲早，所以我地就係到玩啲Board game，但玩玩下我發現好似少咗個人。
 
我：「話時話點解好似唔見明仔嘅？」


 
羅拉：「你無睇wts咩？佢話佢病咗黎唔到。」
 
我睇返先知原句係「屌我腸胃炎屙到仆街，我諗我今晚黎唔到啦。」
 
我wts講句抵撚死，不過佢無覆我，肯定仲係到屙緊屎。
 
珍妮：「大家差唔多啦，工人姐姐幫我地準備好啲野食，我地可以上去天台到燒啦。」
 
唔知點解有一種空虛嘅感覺，明明係我地燒野食，應該我地去買野，買腸仔買丸買野飲買蜜糖個啲。
 
但宜家我淨係黎到等一陣就有得燒，不過分分鐘工人姐姐會幫我地燒埋。
 
或者有時候有錢都唔係一件好事，用返之前個例子，有錢叫外賣同堅持自己煮飯一樣。
 


我宜家終於明白個種浪漫就係追求緊儀式感。
 
只不過係坐享其成同親力親為嘅分別，雖然我都幾鍾意坐享其成。
 
所以結果就好似我咁講，我燒咗兩條腸之後就無燒過，大部分時間都係負責食。
 
阿蓉：「食粒丸呀。」
 
我諗都無諗就擺落口，一咬就知仆街，係粒芝士丸，入面熱撚到我著撚咗火。
 
我：「哇！好熱！！哇哇！！」
 
Chris：「你地睇下個傻仔，哈哈哈哈。」其他人都跟住笑。
 
麻呼好快手就比咗支野飲我，我無猶豫即刻拎黎飲，因為真係好熱。


 
我：「呼...唔該哂呀麻呼，我差啲就以為自己要比人燒死。」
 
麻呼：「唔洗，你食呢粒呀，呢粒唔熱架。」佢直接餵落我個口到。
 
我一路咬一路望住阿蓉個表情，已經係同我講你準備返去跪玻璃。
 
阿贏：「喂喂喂大家唔好燒住！就黎夠鐘啦！！」
 
大家第一時間一定係拎住部手機，開個IG準備Po動態，你估倒數真係為咗倒數咩，咪又係為咗Po IG講句Happy New Year。
 
「十！」
 
「九！」
 


「八！」
 
「七！」
 
「六！」
 
「五！」
 
「四！」
 
「三！」
 
「二！」
 
「一！」
 
「Happy New Year！」
 
除夕夜二十歲女跳樓自殺身亡，一名二十歲女大學生於一月一號凌晨十二時從大學天台一躍而下，警方於其手上檢獲遺書，由於死者於遺書表明要求將遺書內容公開，為尊重死者，以下為遺書內容。
 
「對唔住呀燕仔，我知所有野都係你係後面幫我，但原諒我捱唔到落去啦，你唔好怪自己，係我自己無用，祝你以後都開開心心。」
 
「多謝你。」
 
「From Hanna。」
 
I used to float, now I just fall down
I used to know but I'm not sure now
What I was made for
What was I made for?