我嘅大學生涯 (有甜): 過去

比分已經黎到30比31，時間仲有最後三十秒，大家都非常緊張，包括我。
 
最後十秒，阿魚拎到波，擦咗兩下花之後衝到籃底上籃得分。
 
32比31，對面隊博埋最後一次機會，可惜炒咗唔入，阿魚個隊贏咗。
 
阿魚第一時間衝過黎攬住我，今次亦都係我第一次現場睇中學學界，原來都真係幾熱血。
 
我：「你好叻呀MVP。」
 


阿魚：「洗乜講，咁你諗住一陣同我去邊到慶祝？」
 
我：「你唔係同佢地慶祝咩？」我指一指佢啲隊友。
 
阿魚：「就算慶祝佢地都會帶埋男朋友一齊，你唔係要我一個人望住佢地曬恩愛，然後自己喊住咁食野呀嘛。」
 
我：「咁我扮你男朋友咪得囉。」
 
阿魚：「吓？」
 


我：「唔好吓啦，再唔行佢地走架啦。」我拖住佢咁跑過去。
 
隊友：「少有喎阿魚都黎一齊食...咦...呢位係？」
 
阿魚：「佢係...」
 
我：「我係阿魚男朋友，你地好。」阿魚即刻用力捉實我隻手。
 
隊友：「哇！！阿魚你幾時識咗個咁靚仔嘅男朋友唔同我地講呀？！」
 


跟住我地一齊搭車去食飯，啲人不斷問我地問題，差唔多全部都係我答，阿魚就一直粒聲唔出。
 
作為一個男朋友，我大部分時間都係睇住阿魚，幫佢夾野食，問佢凍唔凍同埋拖實佢。
 
我留意到其他女仔都用羨慕嘅眼神望住阿魚，我嘅目的亦都達成。
 
食完飯之後我就送阿魚返屋企，係巴士到佢挨住我膊頭。
 
阿魚：「點解你要搞咁多野？」
 
我：「等你威下囉，你有個咁靚仔嘅男朋友，佢地宜家實羨慕死。」
 
阿魚：「之後練波佢地肯定有排問，唔係啦，我都係同佢地講你係我阿哥黎就算。」
 
我：「喂我宜家好失禮你咩。」


 
阿魚：「我唔係咁嘅意思，只係如果我拍拖嘅話我唔想咁高調周圍講比人聽，更何況我地都唔係一齊。」
 
我：「咁你想唔想同我一齊？」我隻右手搭住佢膊頭。
 
阿魚：「我...唔知。」
 
落車之後我地無行去佢屋企，而係行咗去籃球場到，不過太夜已經熄哂燈同鎖咗門。
 
但係阿魚唔知點解好輕鬆就解開咗個鎖。
 
阿魚：「你覺得熄燈同鎖門可以阻擋到一個熱愛籃球嘅人咩。」
 
我同佢坐咗係籃球場中間，我都係宜家先知原來籃球場可以睇到星星。
 


阿魚：「你中學個陣係點架？」
 
我：「中學？唔記得啦，我宜家係大學生涯，鬼記得中學點。」
 
阿魚：「你唔好扮啦，你先Year one，講到好似讀咗好耐大學咁。」
 
我：「哈哈，不過有啲野你會寧願一世都唔記得。」
 
阿魚：「講比我知啦，好唔好？」
 
阿蓉問過我，阿洛問過我，麻呼問過我，宜家到阿魚問我。
 
我嘅過去。
 
無記錯嘅話年少日記嘅主角比屋企人鬧同埋打，「我不是甚麼重要的人」最後自殺，而我就係比同學欺凌，亦都好似佢咁試過自殺。


 
以前嘅我係一個非常內向嘅人，無乜朋友，無乜興趣，每日淨係返學上堂，放學就返屋企。
 
但有日無意中，我發現一個可以睇故仔嘅網，任何人都可以係個網到寫故仔而且唔洗錢，甚至多人睇仲可以收錢添。
 
無興趣嘅我就好似搵到寶藏一樣，每日都沉迷係睇故到，正如我之前所講，睇故都只不過想搵一個寄託，搵緊一個共鳴，將現實無可能實現嘅野幻想出黎。
 
做金庸的男人同唉瘋人嘅故啟發咗我好多，有興趣嘅你都可以去睇下。
 
睇睇下我個腦有個諗法，就係如果我去試下寫嘅話，又得唔得呢。
 
因為一時嘅衝動，我係個嗰網到寫咗我人生第一個故，每日放學返到去就係不斷諗題材諗內容。
 
因為係第一次寫，所以寫得好差，我宜家睇返都覺得好尷尬，不過估唔到嘅係雖然唔多，但都真係有人會睇我個故，同我講覺得幾好睇，當然都有人問我係到寫乜鳩。
 


個陣係我一生第一次覺得開心，覺得自己嘅努力比人睇到，亦都係我第一次做自己鍾意做嘅野。
 
但當我以為一切都順順利利嘅時候，惡夢就黎搵我。
 
「喂你學人係到寫故呀？哈哈哈哈，係到寫自己係個男神周圍食女呀？你唔好笑大人個口啦，哈哈。」
 
我寫故嘅事唔知點解比人發現咗，啲人不斷係學校到傳黎傳去，我個陣好驚即刻收埋咗個故，但佢地已經有人backup咗。
 
每日返學識我嘅人都會對我眼望望，我行去廁所條路隔離都係對我嘅恥笑聲。
 
我個人好似跌到落谷底，不斷請假唔返學，因為我知一返學我就會比人笑。
 
我已經唔知我可以點做，每日都過得好辛苦，就連瞓覺發夢都好似聽到佢地嘅笑聲。
 
直到有日我終於頂唔順，我行上去學校嘅天台望住下面啲人，我好想直接跳落去。
 
Voices in my head 
Telling me I'm gonna end up dead