我嘅大學生涯 (有甜): 叔叔

（含哂，去到宜家先記得出文）

無咗阿蓉嘅聖誕，就好似小朋友終於知道呢個世界無聖誕老人一樣，我亦都好耐無體驗過呢種失落感。
 
至少我知道自己原來仲有感覺，仲識心痛。
 
我用細帳打開阿蓉個IG，好想禁追蹤，好想DM同佢講對唔住，好想再見到佢頭像有綠色圈圈。
 
阿洛：「點解你仲唔去氹返佢姐，明明你仲掛住佢，點解唔去同佢講姐。」
 


我：「我想問下我可以用啲咩身份去同佢講我掛住佢？」
 
阿洛：「你甘心咩？雖然你出軌係唔啱，但一人做事一人當，做錯要認打就要企定。」
 
我個腦突然諗起一句說話。
 
「第時真係分手，我地去返個間車仔麵到食囉？但到時我唔會再加芝士腸。」
 
我直接拎袋離開間課室，Professor同其他人都嚇親，不過我宜家唔得閒理佢地感受。
 


我衝過去個間車仔麵到，個嗰阿叔對我嘅出現一啲都唔驚訝，好似一早估到我會黎咁。
 
阿叔：「終於黎啦咩？想食啲咩呀？」佢比咗張點餸紙我。
 
我：「佢係唔係到？」我無視張紙係間店到左望右望，嘗試搵阿蓉。
 
阿叔：「佢唔係到呀，你坐低食碗麵先啦。」佢捉住我坐低。
 
我點返上次叫嘅野之後，今次無叫芝士腸，唔洗十分鐘就有得食，之後個阿叔拎住罐藍妹坐係我對面。
 


我：「佢有黎過呢到？」
 
阿叔：「人地黎咗幾日啦，琴日都有黎添，我問佢我啲車仔麵有咁好食咩，洗唔洗日日都黎食，但佢次次都只係笑笑口，點點頭咁。」
 
我：「佢有無同你講啲咩？例如佢等緊一個人之類嘅野？」
 
阿叔：「無呀，但係阿叔我行走江湖咁耐，睇得出肯定係細佬你又激嬲人啦。」
 
我無出聲只係繼續食麵。
 
阿叔：「你覺得佢今日會唔會黎呀啦？」
 
我：「唔知，但係我會係到等，會唔會阻到你？」
 
阿叔：「唔阻，不過如果佢唔黎嘅話，你諗住點？」


 
我：「咁輪到我日日都黎食麵。」我好認真咁講。
 
阿叔：「哈哈哈哈，年輕真係好。」佢一啖飲哂罐藍妹就返廚房做野。
 
我由晏晝等到夜晚，睇哂成季紙房子都等唔到阿蓉。
 
我：「我諗佢今日唔會黎架啦，我唔阻你收鋪啦。」我心灰意冷咁起身準備走。
 
阿叔：「咁快放棄？宜家啲後生仔咁無耐性架咩。」
 
我：「仲快？天光等到天黑啦，佢黎嘅話一早黎咗啦。」
 
阿叔：「啱呀，所以人地一早黎咗囉，你睇下後面。」
 


我成個樣都係咪撚玩啦，我望過去後面，有個女仔企咗係到。
 
我衝過去攬住佢。
 
我：「對唔住。」
 
我背咗一大堆野，諗住如果見到阿蓉嘅話就同佢講，結果到真係見到嘅時候，我只係講得出對唔住。
 
阿蓉：「你咁肯定係我黎？」
 
我：「我唔會再認錯。」
 
阿蓉：「你唔認錯？」
 
我：「唔係我認錯，唔係...er...我...」比佢講一講我一時唔知自己想講啲咩。


 
我好努力嘗試重組緊句子，結果佢望住我望到忍唔住笑。
 
我：「喂你唔好笑啦。」
 
阿蓉：「你喂我？」佢扮嬲咁講。
 
我：「唔係，我...我愛你呀。」我再用力啲攬住佢。
 
阿蓉：「衰人...都唔知點解永遠都嬲你唔落。」
 
我：「你肯比多次機會我？」
 
阿蓉：「如果你再呃我或者同其他女仔一齊嘅話，我一定會剪斷你條賓州。」
 


我：「我唔會架啦。」應該。
 
咁我地宜家真係一齊啦喎。
 
阿叔：「夠啦夠啦，阿叔我睇到眼冤啦，你兩個快啲走啦。」佢比咗兩杯雪糕我地食。
 
我：「多謝你呀叔叔，不過點解你咁睇住我地嘅？」
 
阿叔：「睇住你地搞到我都忍唔住諗住自己當年追我老婆個陣，中途我都做錯好多野，所以我唔想細佬你好似我咁。」
 
我：「咁你老婆宜家...」阿蓉用隻手揞住我把口，再搖搖頭示意我唔好講。
 
阿叔：「佢因為Cancer走咗啦，我惟一可以做嘅，就係好好咁幫佢睇住間鋪。」佢苦笑咁講。
 
我：「多謝你，我會好好咁記住。」
 
佢揮揮手同我地講再見，我諗我呢一世都唔會忘記呢個阿叔。