我嘅大學生涯 (有甜): 摯友

「同我落返黎。」有一把男仔聲係我後面傳黎。
 
我擰過去後面望住佢，我知佢係邊個，因為佢同我一樣係課室都係唔出聲個啲人黎，但我好驚訝點解佢會知我係到。
 
我：「點解你會係到？」
 
佢叫阿樹，因為佢好似Keroro入面嘅冬樹大人，而佢個名都有個樹字，所以大家都叫佢做阿樹或者阿Tree。
 
阿樹：「我知你最近發生咗啲咩事，估到你有可能會做傻事，頭先見到你急急腳咁走，就諗你一定會黎呢到。」
 


阿樹：「不過我諗你根本就唔夠膽跳落去，所以宜家乖乖地咁同我落返黎。」
 
哈哈，佢講得一啲都無錯，一個人即使有幾想死都好，去到最後望住下面嘅風景都唔會夠膽跳。
 
所以自殺真係需要好大嘅勇氣。
 
我聽佢講慢慢咁落返地面，行到佢前面，佢無講野直接一拳打落我個肚到，我痛到跪咗落地下。
 
阿樹：「小小事就係到學人自殺，你對唔對得你屋企人住？」
 


我：「你唔明...試下你比人日日係到恥笑...睇下你又會點。」
 
阿樹：「如果咁在意人地嘅目光嘅話，咁我地咩都唔會做得到。」
 
佢扶住我慢慢咁行到落小食部，請咗我飲包朱奶，而我地亦都傾咗好多野，例如動漫，學校有咩靚女師姐，鍾意聽咩歌。
 
我同阿樹成為咗好朋友，係佢嘅陪伴之下，我都開始唔再理其他人對我嘅目光，繼續寫我嘅故仔。
 
到有日我見到蔡煒燕，然後發誓自己要成為一個好似佢咁樣嘅男神，亦都成功變到溝死女。
 


每段關係我都會同阿樹分享，佢會比好多意見我，但係我永遠都唔會記得。
 
直至考完DSE個嗰暑假，你突然就走咗，WTS你唔覆，打比你唔聽，拍你門唔開。
 
「近排屋企有啲事，黎唔到食飯，我下次再約你。」
 
結果約定咗嘅野，你成年都仲未做。
 
「阿樹我十八歲啦，我仲係好掛住你，好想好想再見到你一次。」
 
「阿樹，前幾日我返咗中學，啲回憶真係返哂黎，仲記得我地係到睇啲師姐打排球，偷睇師妹跑步，明明好似只係琴日嘅事，但諗諗下其實已經過咗好耐。」
 
「阿樹，距離我地上次對話已經係半年前，我仲係好掛住你。」
 
「阿樹聖誕節快樂，我一朝早就比樓上鑽野嘈撚醒咗，屌佢老尾，邊有人聖誕朝早鑽野 都on9。」


 
「阿樹原來同你上次對話已經係一年前，你話想買海賊王Figure 買咗未呀？我諗你買嘅話唔係娜美就女帝架啦，呢一年發生咗好多野，好似我第一次拖起女仔隻手、第一次去Staycation、第一次返工、第一次電頭髮、第一次有消費劵、亦都係第一次同一個好朋友成年無玩過無傾過，甚至見都無見過，我仲係好掛住你，之前我唔開心個陣就走去搵你，雖然你無覆我，或者可能無睇到添，不過唔緊要，亦都因為咁，我學識咗自己面對好多野，以前我好驚一個人，咩都要搵你陪我，但原來我都有獨立嘅一面，我都慢慢開始成熟，雖然我唔知你近況點，但係我相信你已經平復咗心情重新出發，都係個句，你有野需要嘅我一定會幫你，你永遠都係我嘅好朋友，多謝你。」
 
不知你又有沒有 掛念這舊友 或者自己 早就想通透
來年陌生的 是昨日 最親的某某
總好於那日我沒有 沒有 遇過某某
 
阿魚比咗張紙巾我，我先知原來我喊緊。
 
我：「所以你知點解我寧願一世唔記得，唔想再諗返呢件事啦。」我笑住咁講。
 
某啲角度黎講，無咗另一半，甚至無咗屋企人，都唔會夠無咗一個好朋友更加心痛。
 
因為好朋友就係你對住佢可以想講咩就講咩，想做咩就做咩，想用粗口鬧佢就用粗口鬧佢。
 


佢地陪你一齊成長，見證住你人生所有嘅片段，一齊係球場打波，一齊係戲院睇戲，你仆街佢係隔離笑你，你失戀佢係隔離陪你飲酒，你地唔洗講野就知對方諗緊啲咩，你結婚佢做你伴郎，你死咗佢隔一段時間會黎睇你。
 
最了解你嘅人未必係屋企人或者伴侶，而係你嘅好朋友。
 
我同佢就好似鳴人同佐助一樣，佐助為咗變強話走就走，但最後鳴人成功搵返佐助，一齊並肩作戰。
 
可惜我搵唔返我嘅佐助。