我嘅大學生涯 (有甜): 成金

Chris：「考完試咁開心唔係唔落返轉老蘭呀嘛？」佢拎起支1664再講。
 
明仔：「又去？你同上次個嗰大波妹散咗啦咩？」
 
Chris：「搞完野就散架啦，喂你夾咗我舊牛呀。」
 
珍妮：「舊牛有寫你個名架咩？乜你地去咗蘭桂坊玩咩？唔叫我地嘅？」
 
阿洛：「Fuck Boy話帶我地去見識下呀嘛，個陣咁啱得我地四個。」
 


羅拉：「去乜鬼蘭桂坊呀，大家諗下聖誕節去邊到玩算啦。」
 
係喎，不知不覺又到聖誕，又到聖誕，好似好耐都無試過一大班人一齊過聖誕。
 
阿贏：「不如玩交換禮物呀？大概一百蚊至二百蚊？」大家都話可以。
 
阿洛：「阿燕呢？」原來得我仲未表態。
 
如果去咗就無得係聖誕節正日同阿蓉過，我唔知佢會唔會唔開心。
 


但宜家全部人都望哂落我到，呢種無形嘅壓力令到我只能夠講句。
 
我：「我都OK。」
 
珍妮：「就咁話啦，我到時再book返上次個間Party room。」
 
Chris：「咁叫唔叫埋組爸同組媽？」係喎我都唔記得仲有Hidy，不過佢都有男朋友陪啦...
 
羅拉：「唔洗啦，佢地到時應該都有Party，我地八個玩就夠啦。」
 


如是者我地就約咗聖誕節正日出黎交換禮物，我同咗阿蓉講，佢話唔緊要但係平安夜要同佢過。
 
打完邊爐之後就各散東西，而我咁啱同明仔行同一條路。
 
我：「喂，聽日我要係商場見到你。」
 
明仔：「吓？無啦啦做咩要出街，我諗住聽日係屋企Hea喎。」
 
我：「你唔記得咗啦咩？我話過要改造你去幫你追Hanna呀。」
 
明仔：「都係個句，你唔好玩啦，安安分分比我做個毒撚咪算囉。」
 
我：「等咗咁耐終於升到黎大學，你唔係仲想好似中學個陣呀嘛？」
 
我：「原地踏步無用架，有啲野你唔主動爭取嘅話就真係一世都得唔到架。」


 
我：「我估你之前聖誕都係同班Friend打住機過，你答我佢地宜家有無女呀？」
 
明仔：「大部分都有嘅...」
 
我：「咪就係囉，你唔想有女陪自己過聖誕咩？更重要嘅係我知你like哂Hanna啲IG Post，你明明就對人地有意思。」
 
佢將部手機收落褲袋，嘆咗一口氣再望住我。
 
明仔：「咁我可以點做呀？」
 
我：「聽日話你知。」
 
講咗咁耐佢終於有決心去改變，一個人最後會唔會成功，最重要嘅就係佢有無決心去令到自己成功。
 


時間黎到第二日，我一開始就帶佢我平時去開嘅Salon剪個頭毛。
 
明仔：「點解要剪頭髮呀？我呢個頭髮唔見得人咩？」
 
我：「我屌你啦，你個頭成個菠蘿咁鬼有女鍾意呀，Terry唔該你幫我搞搞佢。」Terry係我專屬髮型師。
 
然後Terry就提議幫佢燙個髮，我無講啲咩，淨係叫佢幫明仔整到好靚仔就得。
 
過咗兩粒鐘佢地亦都搞掂，我全程係隔離瞓著咗。
 
我：「OK喎Terry，呢個逗號頭即刻成個韓國Oppa咁。」
 
Terry：「我盡咗力架啦阿燕，你老友一句聲都唔出，搞到我都唔知佢想點整。」
 
我望一望明仔，佢係到照鏡照到傻咗，好似唔敢相信鏡入面個嗰係佢黎。


 
我：「點呀？呢個頭滿唔滿意呀？」
 
明仔：「滿意呀...但真係我黎架...？」
 
我：「係呀，但唔好再照啦，我仲要去幫你裝身呀。」
 
平時已經見佢成日著啲動漫人物嘅衫，宜家又係到睇緊星野愛個件黑色Tee。
 
我：「你唔好癲啦，你真係用盡方法做一個女性絕緣體架喎。」
 
明仔：「癡線不知幾靚呀，你到底有無睇我推架。」
 
我：「我宜家咪做緊真人版我推囉，你試下呢幾件。」
 


我幫佢揀咗件濤仔最鍾意著嘅黑色大褸，入面著件深黃色衞衣，下半身襯條啡色褲，跟住...我屌你老尾著拖鞋？
 
快快手同佢買完對鞋之後，淨係睇個Look已經比之前精神咗十倍，甚至開始有女會偷望下佢。
 
明仔：「喂喂喂，你見唔見到呀，頭先個女仔望住我呀！」
 
我：「見到，證明我執你個Look執得幾成功，已經完成咗大半架啦。」
 
明仔：「咁快？求其整個頭買幾件衫就做到男神？」
 
我：「梗係唔係啦，係嘅話周街都係男神啦，宜家就係教你最後個Part，亦都係最難個Part。」
 
思想、心態、行為同埋價值觀。
 
我將Emily教我同埋我自己領悟返黎嘅野教哂比明仔聽，佢就好似學識反轉術式個陣嘅五條悟一樣，打通哂任督二脈。
 
一個禮拜嘅時間，佢已經成為咗同我差唔多嘅男神。
 
我惟一無教到佢嘅野就係傷害人，亦都唔希望佢會好似我地咁傷害人。