我嘅大學生涯 (有甜): 時間
時間黎到十二月頭，期間主要都係溫書同考試，無乜太大特別。
但正如我上一章咁講，改造係需要錢，買野送比阿蓉同Hidy又需要錢。
為咗解決呢個問題，方法就只有一個，就係惟有我去搵Part Time返。
可能見我一啲工作經驗都無，好多人面完試之後都無咗搵返我，有啲甚至連面試機會都無比。
好彩嘅係最後都有一間補習社願意收留我。
老細：「細佬，我唔介意你無返過工，亦都唔介意你會做成點，我淨係在意你係咪有心想教好班學生，只要你有心嘅話，我就接受架喇。」
我：「放心，我會好努力去幫班學生。」
講就咁講，事實上我呢啲誤人子弟嘅老師，個學生係咪會聽我講野都係一個問題。
好快佢就安排咗一個中五叫阿魚嘅女仔比我，而我主要幫佢補數學同埋幫佢Prepare下一啲PastPaper比佢操。
我第一次同佢補習係星期六，佢著住件oversize嘅黑色衫同一條短褲，孭住gregory嘅背囊，隻手戴住綁頭髮個啲黑色橡筋，對鞋係Cros個啲可以插好多公仔嘅閪窿鞋。
簡單啲講，唔係打排球就係女版嘅籃波撚。
阿魚：「你就係我補習呀Sir？好靚仔呀。」佢個含春樣完全顯現哂出黎。
我：「係呀，我叫阿燕，你拎啲Note出黎比我睇下你宜家學緊啲咩。」
我好專心咁跟緊佢個進度，佢就係隔離不斷咁影我相。
阿魚：「阿Sir你有無IG架？等我Tag埋你呀。」
我：「唔好叫我阿Sir，叫返我阿燕或者燕哥哥都得，電話一陣先再玩，你宜家做咗呢幾題數先。」
佢好乖咁即刻收起電話，但係面對接近所有女仔都唔擅長嘅數學，佢惟一可以做嘅，就係R爆自己個頭然後撲低，開始諗緊點解人要發明數學呢樣野
我：「吓？呢啲初中數黎架咋喎，你咁都唔識？點考DSE呀。」
阿魚：「我由初中開始數學唔係啱啱好合格就係唔合格，我都唔想架，咁我聽極都唔明可以點喎。」
我：「係嘅係嘅，我地一步一步黎，佢要將A做主項呀嘛，咁你咪扔哂其他野去隔離，留返A係到咪得囉。」
我：「扔個B過去，扔埋C過去，D都唔差在扔埋過去，你睇，咁咪搞掂囉。」
阿魚：「乜咁簡單架咋咩？點解我上堂聽個陣聽到好似世界大戰咁嘅？」
我：「證明你無留心聽姐，你自己試下做埋個幾題啦。」
然後佢就好認真咁做，成功搵到答案個刻仲好開心咁望住我，我都忍唔住露咗個姨母...姨父笑先啱。
但佢基礎實在打得太差，我用咗好多時間同佢重溫返啲Concept。
我：「時間差唔多啦，唉都唔知點解你黎到中五都可以咁多野唔識，下年就考DSE架啦。」
阿魚：「車，其實我根本就唔洗靠DSE，我打學界好勁架，啲大學爭住收我啦。」
佢比咗張相我睇，係學界籃球精英賽MVP嘅獎。
我：「雖然睇得出你應該都係玩運動個啲人，但係睇唔出你咁勁喎。」
阿魚：「洗乜講，我黎補習都係比屋企人迫，話就算唔洗高分都起碼考個2返黎。」
我：「話事話咁你咪好多仔溝？我中學個陣見打波個啲女仔個嗰都有仔架喎。」呢個問題其實都擾攘咗我好耐。
阿魚：「我啲Friend係囉，佢地啲仔個嗰又係打學界嘅，勁靚仔勁高勁大隻！」
我：「咁你呢？你個樣都唔差，隻腳又咁長，肯定大把人追啦。」
阿魚：「係架，甚至連大學啲靚仔都專登去睇我比賽想溝我，但係我都無諗住同佢地一齊。」
我：「吓？你gay架？阿唔係，女仔應該叫咩...Les架你？」
阿魚：「我鍾意男仔架囉好無。」佢反一反我白眼。
我：「咁你同哥哥講，點解唔拍拖呀？明明中學拍拖咁青春。」
阿魚：「因為佢地根本就唔係鍾意我，有啲只係為咗話比人聽我溝到學界女神，有啲只係太孤單想有人陪，有啲甚至係為咗屌我添。」
阿魚：「呢啲帶有目的嘅愛我先唔稀罕， 我要嘅係真愛，慢慢咁用誠意打動到我，而唔係一黎就同我講不如我地試下。」
阿魚：「我都唔明點解傾咗幾日計就表白，都未好好了解對方又點會知大家係咪真係適合對方。」
咁係因為大家都重視結果而唔係著重過程。
當你好認真咁追一個人，你追咗佢足足一年，結果佢最後同另一個人一齊咗，你努力咗一年，為佢付出咗咁多野，日日諗話題同佢傾計，佢唔開心嘅時候你聽佢訴苦，生日情人節聖誕節你都買禮物送比佢，約佢一齊慶祝。
你將佢放係第一位，所有野都以佢為優先，但最後你得到咗啲咩？
你乜野都得唔到，因為另一個人得到。
大家就係驚我努力咗咁耐，換黎嘅係一場空白，咁我努力黎做咩？
如果我即刻表白，可能會有估唔到嘅結果，萬一個女仔真係應承咗我咁點？我咪可以唔洗係到浪費一年同你慢慢了解。
講到尾，大家都將時間睇得好重要，只係重要嘅角度唔同。
我唔想浪費一年時間，我想佢浪費一年時間。
我都唔知邊個啱邊個錯，我只係覺得浪費時間唔緊要，但係要浪費得有價值。
不過搵啱人浪費又係一個難題，唉我又扯遠咗好多。
我：「你講得啱，咁係你等到有個人了解你之前，記得後日要補習。」