我嘅大學生涯 (有甜): 點石

我：「喂呀，你唔好阻住我溫書啦。」
 
我係到溫書，Hidy就係我隔離係咁搞我啲頭髮，又咬我耳仔。
 
明仔：「係囉組媽，你搞到佢即刻搞到我，佢唔專心溫咁我都專心唔到架喎。」
 
Hidy：「你地唔好阻住我就真，專心溫書啦。」佢唔理我繼續玩。
 
溫溫下又好似上次咁樣，有人拍一拍我地。
 


Hanna：「同學可唔可以幫我...又係你？」一聽把聲我就知係佢。
 
我：「你又係到搵人填問卷？乜仲未做完咩？」
 
明仔：「乜你地識得架咩？」佢係我耳邊細細聲咁講，但其實係佢以為自己好細聲。
 
Hidy用力捉實我，個樣仲好似想殺咗我咁。
 
我：「上次佢搵我幫手填問卷咋。」我咁講佢先變返正常。
 


Hanna：「我要做用黎做project呀，唔該你地都幫幫手呀。」
 
因為我填過所以唔洗填，所以趁佢兩個填緊嘅時候就同Hanna吹吹水。
 
我：「我見你地前幾日好似去咗酒店喎。」
 
Hanna：「嗯，個間酒店想我地幫佢拍room tour。」
 
我：「咁你地有無...？」我唔好意思講「搞到」呢兩隻字出黎。
 


Hanna：「我無辦法。」佢無正面咁答我。
 
Hanna：「始終人到最後都係會變成自己最討厭嘅人。」
 
我話過會將佢由地獄救返出黎，但係我仲未諗到可以點做。
 
Hidy：「我地填好啦，你快啲走啦。」睇黎佢好唔想見到Hanna。
 
Hanna講完唔該哂之後就去搵其他人幫手填，而我留意到明仔隻眼一直望住佢。
 
我：「做咩望到人地眼甘甘咁，起痰呀？」
 
明仔：「無....無呀，純粹覺得佢好靚咪忍唔住望多兩眼囉。」
 
我：「你肯定又對人一見鍾情啦，不過你睇下先啦。」


 
我開咗Hanna個IG比佢睇，佢個表情仲灰撚過石灰。
 
我：「人地KOL黎架，你睇佢男朋友仲幾靚仔添。」
 
明仔：「得啦得啦，我知我高攀唔起佢啦，呀唔係，係攀一下就已經跌返落地下。」
 
我望一望明仔，再望一望Hanna個IG，再望一望Hidy。
 
我諗我有辦法。
 
我：「你頭先咪問做男神係咩感覺嘅，不如我教你做男神好無？」
 
明仔：「咪玩啦老友，又係你叫我做返明仔，宜家又教我做男神。」
 


我：「即係咁講姐，先天嘅野定咗就無得變，但如果有後天嘅努力，其實都可以贏到有先天優勢嘅人。」
 
Hidy：「吓？乜男神都有得靠後天架咩？佢唔靚仔就係唔靚仔架啦喎。」明仔聽完即刻哭撚咗。
 
我：「你又唔好咁直接先，呢個世界無野係無可能，正如變性人都可以參加奧運一樣。」
 
明仔：「唔好搞咁多野啦，發少啲夢溫多啲書啦。」佢睇返部IPAD。
 
我：「認真架，考完試之後我一定會將你由毒撚變成男神。」就好似Emily打造我一樣。
 
之後我就同Hidy走先，因為有Hidy係到我都唔洗旨意溫到書。
 
Hidy：「點解你咁執著要改變佢？學人搞毒撚改造營？」
 
我求其作咗個藉口話唔想佢咁毒之後就轉移話題。


 
我諗到嘅辦法，就係令到Hanna鍾意明仔，而明仔起碼都成為一個男神有啲人氣，去取代個嗰男仔。
 
由螢幕情侶變成真嘅情侶，一方面可以賺到錢，另一方面Hanna亦都得到幸福。
 
我唔知明仔做唔做到，但我相信如果有我幫佢嘅話，起碼都由無機會變成有機會。
 
你可以話我利用緊明仔，但既然明仔都對Hanna有好感，點解唔趁呢個機會去救Hanna。
 
你有信心令Hanna鍾意明仔？你有信心將明仔變成一個出名嘅人？
 
我就點石成金比你地睇。
 
改造係需要錢的，但係我無錢。