我嘅大學生涯 (有甜): 平凡
開心嘅時間過得特別快，生日完之後要面對嘅就係考試。
成日聽人講要過三爆四，一開始聽都唔知係咩意思，升到黎大學先知係講緊GPA。
我：「話時話，你個晚同小拳石搞完之後有無一齊到？」
明仔：「你仲好意思問，你扔低我自己一個人，知唔知我個晚比佢搞到接近虛脫呀。」
我：「益咗你啦，你成日都話黎到大學唔想再做青頭仔，都唔知你嬲what。」
明仔：「不過個晚之後我就無再見過佢，我有試過搵佢，但佢同我講話小朋友唔好亂咁對人上心。」
睇黎小拳石都係嚮往一夜情嘅浪漫，而唔係阿念個種日久生情。
我：「都啱嘅，大家開心過咪算囉，唔洗咁留戀喎。」
明仔：「咁話哂我第一次比咗佢呀嘛，始終唔多唔小對佢都有種執著係到。」
我：「屌你當自己係基督徒唔可以婚前性行為咩，唔好將第一次睇到咁重要啦，大把人一早就搞過。」
好似黃子華咁講，搞野都只係為咗享受過程咋嘛，第一次同第三百五十四次都一樣，咪又係為咗射精同高潮個一刻。
除非好似基督徒咁樣將第一次當係神聖，唔能夠亂咁比人。
明仔：「唉，到底我幾時先可以搵到自己嘅真愛。」
我：「有啲野急唔黎嘅，成日諗呢啲野無意思，不如好好咁睇下宜家呢一刻你有啲咩先啦。」
明仔：「我宜家有啲咩？宜家有你係我隔離囉，唔通...？」佢含情脈脈咁望住我。
我：「我屌你老母死GAY佬。」
明仔：「不過我一直都好想問你一個問題，真心嘅，你咁靚仔，又識撩女仔，話你男神應該都無人會反對。」
明仔：「但其實做男神係咩感覺？我知自己無可能做到，但係我都好想知到底做男神係點。」
好似我之前咁講，如果可以成為一個與眾不同嘅人，邊個又會甘心只係成為一個普通人？
唔知大家有無試過睇演唱會，當個歌手一出場，所有人都即刻拍手歡呼。
所有燈光都打哂落佢到，所有目光都係哂佢到，所有掌聲歡呼聲都係為佢而起。
你望住個歌手，再望一望上面同台下嘅觀眾，個心忍唔住同自己講咗句。
「如果我都咁受歡迎就好啦。」
又或者只係睇IG見到啲人好似阿花，Hanna咁有成千甚至成萬人Follow，個心又會講「如果我都有咁多Follow就好」。
我都試過好似明仔咁樣，好想做一個特別嘅人，會比人見到比人留意到。
但現實大部分人都只係一個普通人，甚至死咗都唔會有人知有人Care嘅人。
好想被重視，好想否認自己只係一個平凡人，可惜根本就做唔到啲咩。
結果我地只係一個拒絕自己平凡嘅平凡人。
我：「唔好諗咁多，做好自己就夠啦，你宜家做去完廁所嘅明仔唔開心咩？」
明仔：「唔...都開心嘅，雖然無女，但係有你地一齊玩，又有中學啲Friend。」
我：「咁咪夠囉，而且男神呢樣野都係見仁見智架姐，世界咁大，可能會有人覺得你係男神呢。」
現實係殘酷的，由出世個刻已經決定哂你嘅之後條路會係點，所以我地可以做嘅就係享受呢段平凡得黎又獨一無二嘅人生。
「平凡像我亦可 做我的主角」
我同明仔行緊去圖書館溫書嘅時候，我地咁啱見到Hidy。
明仔揮揮手同佢打招呼，佢留意到我地，但係佢反而擰轉頭急急腳咁走。
明仔：「組媽又會唔理人都有嘅，唔通係我唔夠高所以佢睇唔到？」
我：「你入去霸兩個位先啦，我有啲野要搵佢。」我將個袋掛係佢個身到，跟住跑過去追Hidy。
好快我就追到，我係後面捉住佢隻手，佢嚇到成個人彈起。
我：「你想走去邊呀？」
Hidy：「你唔好理我。」佢嘗試用力鬆開我隻手。
我：「今日你唔同我講清楚我係唔會比你走。」
Hidy：「我係wts已經講得好清楚，我地做返朋友，以前係，宜家都係。」
我：「點解你無啦啦要講啲咁嘅野姐，我唔明呀。」
Hidy：「我唔想鍾意你呀，好攰好辛苦，但係我控制唔到自己呀。」佢好激動咁望住我。
我：「我都唔想呀，我夠呢一刻都掛住你囉，我又可以點姐。」
Hidy：「你知唔知上次我隻腳唔小心拗柴，跟住你又同我講你同你條女去科學館，你知唔知我係條街到喊咗出黎呀。」佢一直都無同我講過...
我：「對唔住...」
Hidy：「唔緊要，你唔洗同我講對唔住。」佢笑住咁講，但呢個笑容係接近心死嘅苦笑。
我：「個陣我太開心，想影比你睇等你呷醋，先會忽視咗你感受...」
Hidy：「我知呀，所以我無怪過你。」
Hidy：「個陣我死忍住唔喊出聲，忍到上咗架巴士先喊，好彩架巴士無乜人咋，唔係實瘀爆。」
我：「或者我真係唔應該存在，我嘅存在只係會令到你受傷。」我好無力咁講。
Hidy：「個陣仲有個姨姨比咗張紙巾我，超尷尬，不過...你唔理我，我只會更加唔開心。」
我：「但係你又話我地做返朋友...」
Hidy：「我都唔知自己想點...講得出但永遠都做唔到...」
如果呢個世界真係有上帝嘅話，可唔可以答我你令到人有七情六慾嘅目的係咩。
不如你地同我講，你地想我同Hidy嘅結局係點。