我嘅大學生涯 (有甜): 你
Dear 你:
對唔住呀，本身我好想用呢個故嘅劇情黎同你講對唔住，但係我覺得自己忍唔住要寫咗出黎先，雖然我諗你已經忘記咗我啦，又或者唔care，咁你當我一廂情願啦，因為我真係好想同你講句對唔住。
我最近為咗寫呢個故而睇返我同你之間嘅對話記錄，睇完我都問咗自己一個問題，點解我可以咁仆街，你個陣仲好細過，仲傻下傻下嘅時候，但偏偏我個陣不斷傷害你。
四年前我寫咗男神個嗰故，個陣你見到個名寫住「有甜」以為係有甜蜜嘅野，結果原來係咸濕野，所以呢個故你都唔好睇啦，淨係睇呢一章就夠。
你當呢一章係我寫比你嘅一封信啦，我寫呢封信比你唔係有啲咩目的，正如第一行咁講，我只係想同你講句對唔住，無論你在唔在乎都好，我都想講對唔住。
唔知你宜家最近過得點呢，仲係咪鍾意聽ypu同88啲歌，不過我見佢地唔知係咪解散咗，宜家都唔知變成點，你個陣好似話覺得rose定z好型？我都唔記得啦。
四年入面改變咗好多野，你宜家係咪準備考DSE啦？原諒我真係好多野都唔記得，如果係嘅話，我希望你之後DSE可以考到好成績，雖然我個陣就係因為DSE而離開你，對唔住，只希望你會考得好過我，唔好好似我咁讀到最後一年都唔知自己讀緊啲乜。
可能你覺得我好變態啦，但係對唔住，我只係想睇下你宜家變成點，睇到你嘅Threads問點樣先可以開心，雖然我已經無資格同你講野，亦都做唔到啲咩，但我希望你之後嘅人生可以順順利利，或者你知道我宜家每日都好似係地獄一樣會令到你開心返。
唔知你宜家搵到男朋友未呢，搵到嘅話我祝你地每日都甜甜蜜蜜，長長久久，唔好因為一啲小事而嘈交，未搵到嘅話要記得唔好搵個同我一樣咁賤咁仆街嘅人，無論係朋友定男朋友都要慎交，諗過先做好重要，不過我都無咩資格同你講咁多，哈哈。
寫到呢一到我都諗唔到仲可以講啲咩，原諒我咁煩又講多次，我寫呢段說話無任何目的，只係想同你講聲對唔住，無論你原唔原諒都好，無論你在唔在意都好，無論你會唔會睇都好，我都要再講多次對唔住。
祝 一切順利、開開心心、健健康康、龍馬精神、學業進步、冒險樂園、海洋公園
From燕
最後送遇上你比你，無特別意思，只係多謝你係我人生入面出現過，多謝同對唔住。Just carry on！
https://www.youtube.com/watch?v=Vjpp27S3C94