我嘅大學生涯 (有甜): 拍片

日本妹：「不如我地趁考試之前拍咗條片先囉？快快手搞掂埋佢。」明仔第一時間話ok，咁我都無所謂。
 
好彩嘅係臨時臨急都book到學校個啲溫書房，如果唔係就要係條街到拍了。
 
見到面之後，大家都好似有啲尷尬咁樣，左望右望唔知點好。
 
我：「Er...你地有無話想做咩主題？」
 
日本妹：「嗯...我見佢啲例子話可以傾下放假去邊到旅行，第時畢業想做咩，嗯...不如邀請去飲酒？好似比較有趣。」
 


飲酒？都唔出奇，感覺佢都係成日去蒲個啲黎。
 
我：「可以呀，喂你講下野啦。」
 
明仔：「大佬話事。」
 
之後我地就開始打份稿，不過主要都係佢地打，我日文都還是屬於初學階段，靠人carry就好了。
 
大約睇得明就係話考完試不如去飲酒鬆一鬆。
 


好快佢地就寫完，我就照讀佢地比我個Part就得，雖然話拍片個陣唔可以睇住稿讀，但我地只要善用鏡頭技術，睇唔到我地睇份稿就ok了。
 
不過我地都未開始拍，只係望到部手機自拍影住我地三個，我地已經笑到仆街。
 
我：「喂仆街，我個頭咁大嘅。」
 
日本妹：「哈哈哈哈，唔得呀，哈哈哈哈。」
 
明仔好努力係到較鏡頭，而我同日本妹就不斷係到笑。
 


過左十分鐘先終於冷靜返少少。
 
跟住我地都係拍下笑下，NG左起碼十幾次先成功三次，最後拍左成三個鐘。等明仔去埋廁所就拍多最後一次。
 
間房得返我同日本妹兩個人，再次有點尷尬。
 
我忍唔住開口問左佢一個我好想問嘅問題。
 
我：「其實...你平時都鍾意咁著架？」
 
日本妹：「係，有咩問題？」我以為佢會有啲驚訝，但係無，應該已經比人問慣問熟。
 
不過我感覺到佢有少少不爽我問呢個問題，我都明白，因為通常啲人咁樣問得，代表佢睇唔慣你嘅打扮，先會問點解你會咁著。
 
我：「無呀...純粹我覺得你咁著好好睇。」今次佢真係驚訝。


 
日本妹：「係咩...我都係第一次聽人咁講...」
 
日本妹：「啲人成日都覺得我著埋啲咁嘅衫，扮到自己成隻鬼咁為乜，但其實...我只係鍾意咁樣著姐。」
 
日本妹：「佢地睇唔慣唔代表我就要跟佢地個套，而且我知實有人會認同我。」
 
佢講得無錯，我地所做嘅野從來都唔係做比人睇，而係做比自己睇。
 
我寫故仔，無人想睇，唔緊要因為我寫得開心。
 
我著件衫，無人覺靚，唔緊要因為我覺得好靚。
 
我去唱歌，無人想聽，唔緊要因為我唱得過癮。
 


呢個世界唔係全部人都會認同你，無論你做啲咩都實有人睇唔過眼，所以只要自己覺得可以，咁就夠。
 
趁明仔仲未返黎，我仲順便抄埋佢IG，佢猶豫左陣諗緊比唔比我，最後都比左。
 
佢IG有成千人Follow，啲相都係佢自己好可愛咁擺Pose，試問平時見佢咁Cool，又點會諗到佢暗中係一個咁得意嘅小女孩。
 
我：「哇...」
 
日本妹：「喂呀你唔好係咁睇啦...佢返黎啦。」
 
好快我地就好順利咁拍埋最後一次，歷時四粒鐘大家終於都可以鬆一口氣，無咩我唔會再想拍片。
 
我：「咁我一陣就Send返所有片上Group喇。」
 
明仔：「仆街差啲唔記得我約咗阿洛跳舞呀，走先啦。」


 
我：「唉跳舞又唔叫，不過bye 9 bye。」
 
明仔：「byebye喇日本妹。」我即刻望住明仔，佢擘大眼望返我，心諗67。 
 
日本妹：「日本妹？你地唔係講緊我呀嘛？」 
 
明仔：「Er...一時口快快...而且我地見你成個日本妹咁...所以咪叫開你做日本妹...」 
 
我地以為佢會嬲，點知佢用返佢頭先好魔性嘅笑聲係到笑。 
 
阿花：「哈哈哈哈，笑死我，叫我阿花啦，唔好再叫日本妹。」
 
跟住明仔就急急腳走咗，得返我同日本妹，阿不是，得返我同阿花兩個係間房到。
 


阿花：「唉死啦，我都夠鐘要返工啦。」
 
我：「呢個時候返工？你返咩工？」
 
阿花：「唔...你真係想知...？」佢面有難色，好似唔係幾好意思咁。
 
我：「吓？你唔係...去賣毒品呀嘛...我要報警拉你！」
 
阿花：「唔係呀！你唔好咁大聲啦！」佢衝過黎用隻手禁住我個嘴。
 
阿花：「我返緊...」
 
「女僕Cafe 」