我嘅大學生涯 (有甜): 世一
Hea到咁上下都差唔多夠鐘去食飯，我同佢去咗鋸扒。
阿蓉：「其實唔洗食咁貴呀，我食便啲都得架，譚仔都可以架。」
我：「今日你生日呀，梗係要食好啲架啦，同埋一次半次都無所謂啦。」
阿蓉：「我唔想你洗咁多錢咋，我地仲係學生，邊有咁多錢喎。」
佢講得一啲都無錯，因為我都發現自己個銀包同個戶口愈黎愈少錢。
自從同咗阿蓉一齊之後，我為咗氹佢開心而成日買野送比佢，當然仲有Hidy，甚至有時識到其他女仔又會為咗撩人地而送野。
雖然話就話兩個人一齊唔係講物質上嘅野，但見到佢收到禮物個嗰開心樣，我就不由自主咁想望多幾次。
今次真係到空曠的地方去打吧。
為咗解決呢個問題，方法只有一個，就係惟有我去搵Part Time返，不過都係之後嘅事。
食到七七八八就上埋個甜品，我book個陣叫間餐廳幫我地整一個迷你黑森林蛋糕，寫住「Happy Birthday to 阿蓉。」
我：「生日快樂呀，我淨係準備咗呢個蛋糕咋，因為我驚如果買一個大嘅，宜家食到太飽到時會食唔哂。」
阿蓉：「唔緊要呀，呢個蛋糕睇落好好食，等我叫人幫我地影張相先。」
個侍應淨係見到阿蓉舉高部電話就get到我地想搵人幫手影相，我隻右手搭住阿蓉，而佢挨落我膊頭到。
食埋個蛋糕之後，我地就行去海濱到散步，順便消化一下。
行行下見到有好多人企咗係一個男仔到，我地八卦行埋去先知原來佢彈緊吉他Busking緊。
說到最愛你 請頒個世一給我
即使爸媽教我 謙虛些不會錯
愛你 非要第一不可 Yeah
我愛你愛到 高手全都輸給我
找好知己有我 找好歸宿有我
平時害羞的我
求第一因想你 安心倚靠我
變更好的我
我：「如果有一個排名係關於最愛阿蓉嘅人，我諗我應該都係世界第一。」
阿蓉：「口花花啦你，都唔知對幾多個女仔講過。」
我：「咪淨對你一個講過。」男人的嘴騙人的鬼。
世界太細了 請頒個宇一給我
因天公偏愛我 找一粒星照我
賜我 一世幸福花火
個個也愛你 可惜誰都輸給我
很感激這個你 只喜歡這個我
明明極黑的我
能鍍金只因你 偏偏選中我
這世一的我
我：「正如佢咁唱，我都好感激你淨係鍾意我，明明極黑的我。」
阿蓉：「極黑？個隻好難飲嘅極黑咖啡？」
我：「唉死得，跟得我太多開始變到我咁樣識得鳩up啦。」
阿蓉：「哈哈，鳩up下咪幾好，每次講野都要咁認真咩。」
阿蓉：「不過你黑唔黑我都鍾意架啦，如果你黑，我咪陪你一齊染黑。」
阿蓉：「最重要係你唔好唔要我。」佢講完呢句之後隻手拖得我特別大力。
我：「我驚到時變咗係你唔要我咋。」
如果你知道我真係個殺人犯嘅話。
阿蓉：「我先唔會唔要你。」
聽完首世一再行多陣，我地就返上酒店，不過係酒店其實都無乜野做，都係傾下心事。
唔知點解呢間酒店先進到可以比我地睇Netflix同Disney plus，唔洗睇電視台。
難得有Netflix當然就唔好執輸，我地揀咗套戲黎睇，亦係大家最鍾意睇嘅失戀戲，500 DAYS OF SUMMER。
有人話Summer唔鍾意Tom就唔應該同Tom行得咁近，亦有人話Tom只不過係孤獨得太耐，有個女仔突然出現仲主動同佢示幻令佢不自覺咁沉哂船，但偏偏忽視咗Summer嘅性格同諗法。
Summer本身就唔相信愛情，Tom本身就好需要愛情，一個唔信一個想要，最後大家係對方身上得唔到自己想要嘅野而分開都係無可厚非。
事實上Tom亦都無辦法令到唔信愛情嘅Summer對愛情有返信心，如果你對住一份自己唔想做嘅工都唔夠膽辭職嘅話，我又點能夠相信你可以令到我對愛情有返信心？
阿蓉：「我覺得你好似Summer。」
我：「吓？佢女人黎架喎。」
阿蓉：「唔係呀傻仔，我指緊你地嘅性格呀，兩個都係憑感覺行動，突然就問我去唔去街，突然就話掛住我，但有時話走就走，想叫都叫唔停。」
阿蓉：「而我就好似Tom，只係一心想留Summer係身邊，好好咁擁抱愛情，但偏偏留你地唔住。」
我：「點會呢，只要你一叫到，無論我係邊都會第一時間黎搵你。」
阿蓉：「雖然我第一次拍拖，但呢啲野氹細路女就得，而我亦都唔係想聽呢啲。」
我：「咁你想聽啲咩？我愛你呢啲咁老套嘅野？」
阿蓉：「呢句仲唔夠咩？」
我：「吓？咁無創意全部男仔都識講啦。」
阿蓉：「一句由心而發嘅我愛你已經好夠架啦，邊洗再講咁多野。」
就好似你做錯野，講咗一大堆原因去解釋，但其實人地只係想聽你真誠咁講一句對唔住，而唔係我都唔想，或者我都無辦法。
我：「可能係我太想將件事浪漫化啦，我一直都覺得我愛你同我掛住你呢兩句說話個嗰都識講。」
阿蓉：「但實際上做到嘅人少之又少呀嘛，與其講咁多野去讕浪漫，不如用行動黎證明你真係愛我啦。」
我：「你想我點證明呀？」
阿蓉：「對我好啲，唔好成日要我擔心就已經係一個證明啦。」
我：「話時話頭先唔記得問你許咗啲咩生日願望添。」
阿蓉：「講咗出黎就唔會實現架啦，不過...我有個願望想你幫我實現。」
我：「講黎聽下。」
阿蓉：「下個禮拜你生日要比返我同你過！」
我：「哈哈傻妹，我唔同你過我仲可以同邊個過。」我忍唔住笑咗出聲。
阿蓉：「喂呀唔比笑呀，瞓覺！。」
我：「係啦係啦，早抖，同埋...」我錫落佢額頭。
「生日快樂」