我嘅大學生涯 (有甜): 一晚

女仔：「喂，你當我死架？係咁望住佢地，我坐係你隔離架喎。」佢用隻手篤我塊面。
 
我：「SorrySorry，我仲以為我地可以唔洗講野添。」
 
女仔：「吓？出黎玩唔講野？」
 
我：「 因為你一直都住係我心入面，唔洗講野我都知你下一句會講啲咩。」
 
女仔：「我下一句會講啲咩？」
 


我：「咪呢句囉。」
 
女仔：「屌，你好無聊呀。」佢係到笑。
 
我：「氹到你笑咪得囉，我叫阿燕。」
 
阿念：「我叫阿念，懷念個念。」
 
我：「咁似男仔名嘅？你屋企人一開始以為會生個男仔？」
 


阿念：「唔知喎，但我記得我媽咪話佢地希望我會做到念茲在茲，唔好忘記每樣係我人生入面發生過嘅事。」
 
我：「咁你做唔做到？」
 
阿念：「邊有可能呀，我連前日食咗咩早餐我都唔記得啦。」
 
傾下傾下，其他人都走哂去出面跳舞，得返我同佢仲坐係原位。
 
我：「你要唔要都出去un下呀，雖然我唔識跳。」
 


阿念：「唔啦，其實我一直都唔明呢到有咩咁好玩，可以日日都咁多人黎。」
 
我：「咁你又黎？」
 
阿念：「陪佢地三個架咋，本身佢地同我講話打牌三缺一，結果行下行下帶咗我黎呢到。」
 
阿念：「而且你睇下，啲狗公成日行埋啲靚女隔離，周圍呃蝦條又或者等執屍。」佢指住幾個男仔再講。
 
我：「你唔明一夜情嘅快樂架啦，知唔知點解咁多人寧願日日落老蘭都唔願意真真正正搵另一半？」
 
阿念：「因為佢地鳩痕囉，男人都係用下半身黎諗野架啦，有閪屌就放紙鳶。」
 
我：「女嘅唔通又閪痕咩，講到尾大家都只係驚比人傷害架姐，一夜情就唔同，一個夜晚一段關係，第二朝起身就回復正常生活，唔洗好似拍拖咁煩，又要諗對方想點。」
 
阿念：「咁唔通一夜情一世咩？到最後咪又係想搵一個可以陪自己一世，而唔係一晚嘅人。」


 
我：「至少係搵到陪自己一世嘅人之前，有個人可以陪住自己渡過孤獨嘅夜晚，都未嘗唔係一件溫暖嘅事呀。」
 
我隻右手係後面推一推佢個頭等佢哄埋黎我到，我地之間嘅距離得返5cm，係佢隻眼嘅瞳孔入面見到我自己。
 
佢瞇埋雙眼，而我嘅嘴唇慢慢咁貼近佢，因為佢嘅唇膏而沾上鮮紅色，同時亦軟到好似棉花糖一樣，令我不自覺咁一啖接一啖。
 
Chris：「老友洗唔洗咁猴擒呀，呢到唔係酒店房呀。」佢搭住大波妹返黎。
 
其他人都跳完舞返黎，跟住金白色頭髮個女仔就話不如玩啲酒game。
 
金白女：「瞇埋眼先，呢個飲唔飲呀？」佢叫阿洛瞇埋眼，再指住Chris。
 
阿洛：「唔…唔飲。」
 


金白女：「呢個飲唔飲呀？」佢指住阿念。
 
阿洛：「都唔飲。」
 
金白女：「呢個飲唔飲呀？」佢指住阿洛。
 
阿洛：「飲！」
 
明仔：「飲啦傻仔，咁都可以揀得中自己，哈哈。」
 
玩咗幾轉，但因為呢隻game比較慢，難啲進入狀態，所以佢地又轉玩另一隻。
 
最容易出事嘅大排檔。
 
大波妹：「指人飲...就你啦。」佢指住明仔講。


 
Chris：「快啲啦，養金魚呀宜家？」明仔都開始有啲唔掂了，飲得好慢。
 
阿洛：「開Topic我右邊接，跳舞風格有乜野，locking。」
 
小拳石：「你玩野呀，我唔跳舞鬼知有咩風格。」佢自動自覺拎杯酒飲。
 
阿念：「oh...仆街啦...」佢抽中陪飲，其他人即刻癲哂。
 
金白女：「圍枚，聽枚啦喎，十呀。」
 
我：「十五。」
 
阿洛：「五呀，中！」
 


小拳石：「中呀，但阿念要陪飲呀，哈哈。」其他人都望住阿念黎笑。
 
玩咗幾轉都無人再抽中陪飲，而阿念差唔多round round都要飲，飲到塊面都已經紅哂，開始係到傻笑。
 
大波妹：「喂阿念陪飲呀。」
 
佢拎住杯酒，隻眼已經有啲飄忽，而我睇唔過眼，搶走佢隻杯。
 
我：「我幫佢飲啦。」
 
明仔：「哇...好型呀...」佢瞓係張沙發到講，對比阿念，呢個仲醉到仆街。
 
阿念：「邊個要你幫...」佢再係我手上搶返自己隻杯，一口氣飲哂杯酒。
 
結果就係同明仔一齊瞓低。
 
金白女：「阿念唔得啦，不如搵人送佢返屋企先啦，我驚我地掛住玩無人睇住佢。」
 
阿洛：「阿燕送人返屋企啦。」
 
我：「吓？咁明仔呢？」
 
小拳石：「放心啦，我一陣會好好睇咁住佢。」佢舔一舔自己條脷，睇黎明仔準備比人榨乾。
 
迫於無奈之下，惟有忍心送我好朋友入虎口，然後送阿念返屋企。