我嘅大學生涯 (有甜): 老蘭
Chris：「喂屌，頭先比條女煩住要我送佢去CCC，咁大個人都唔識行。」佢坐咗係阿洛隔離。
明仔：「上次要你送項鍊比佢個條女？」
Chris：「唔撚係呀，呢條琴日先識，我見佢隻腳幾撚正咪撩佢去飲野，之後就搞埋。」
阿洛：「癡線咁都得？你真係Fuck Boy黎架喎。」
我地四個約埋食個晏，無叫啲女仔同爸爸媽媽，純粹棍撞棍。
Chris：「屌都唔夠阿燕勁啦，麻呼又冧佢，連最撚正嘅組媽都成日埋佢身，呢啲先幸福jj。」
我：「講我就無意思啦，話時話阿洛你個show表演成點？」
阿洛：「唉，我唔小心跳跳下跳甩咗對鞋呀。」佢播條片比我地睇。
已經唔係跳甩咁簡單，差唔多直接飛向觀眾席到，好彩無飛到人。
明仔：「哇你都算勁喎，仲可以面不改容咁繼續跳。」
阿洛：「咁仲表演緊架嘛，就算幾柒都要跳完先架啦。」
咁佢又有道理，幾柒都要死頂埋佢先，無可能因為你一個柒搞到成隊都要陪你柒。
我：「唔緊要啦，下次跳返好咪得囉，一次半次。」
Chris：「係囉，一係我介紹條女比你識啦。」
阿洛：「唔洗啦，我自己靜一排應該無事。」
好似JFFT咁唱，大壓力係你太在意咩結果，會令你犯錯，我諗佢應該太著緊呢個Show先會一時失誤姐。
不過見到佢愁眉苦臉咁，我地三個都廢事再講呢個話題。
明仔：「其實你地覺得點，我地升到黎大學都三個月，好似過得幾快。」
我：「一開始仲成個on9仔咁周圍問人呢到點去個到點去，但宜家好似已經慢慢習慣咗大學嘅節奏。」
阿洛：「咁你地會唔會掛住中學個陣？或者同啲中同仲有無聯絡？」
Chris：「升到黎大學就唔好懷念過去啦，屌佢老尾以前頭髮淨係掂到條眼眉都比個訓導屌到飛起，同條女係街拖個手比佢見到又屌，我先唔會想返去呀。」見到佢好嬲咁切塊雞扒，睇黎佢中學應該係出名同訓導作對個啲黎。
明仔：「但係中學個陣成班人一齊玩喎，我宜家都仲同緊幾個friend一齊打機，佢地都話上到黎好難再識啲交到心嘅朋友。」
其實我覺得無得咁樣比，中學你一齊同班幾年好難唔熟，但係大學就係比機會你識更多嘅人，令到你嘅眼界唔再局限係同校嘅人，係其他學校，甚至外國人都有。
就好似你一直玩同一隻game，玩咗六年都覺得好好玩，直到隻game收皮，你迫於無奈轉玩另一隻game，先發現呢隻都勁好玩。
簡單講好多時我地停留咗係個舒適圈到，大學就係要你跳出去，接觸更加多嘅野，又或者係令到你有更多機會去搵你鍾意嘅野。
阿洛：「阿燕呢？你仲有無同中學啲人聯絡？」
我：「無啦，而且都無掛住中學個陣。」我飲啖熱朱古力再講。
我惟一嘅摯友離開咗我，中學回憶對我黎講已經可有可無。
要知道回憶嘅重點就係人，我個陣同邊個一齊玩，我個陣同邊個一齊食飯，我個陣同邊個一齊去旅行，所有回憶都離唔開人。
我老豆曾經講過，要好好維持中學嘅朋友，因為佢地會係你一世嘅朋友。
可惜我做唔到。
Chris：「啱呀，同埋宜家咩都過咗去，如果人一世都比啲霧氣遮住，咁我地永遠都唔會見得返個太陽。」呢句令我對Fuck Boy Chris另眼相看 。
明仔：「如果我有你咁識諗就好，我呢啲人只係會比過去所限制，過一排又會諗返以前，過一排又會後悔自己點解個陣無咁樣做，過一排又會開始懷念以前。」
阿洛：「不過都係算啦，過去同未來都唔重要，最重要嘅宜家呢一刻。」
Chris：「屌不如上完堂我帶大家去蒲下，有無Feel？」呢個主意其實不錯，我都想睇下Fuck Boy係點溝女。
明仔：「吓，你知我飲酒好屎架啦。」
阿洛：「得啦，我地三個會睇住你架啦，唔會比人食咗嘅。」
上完堂之後我地再Hea多陣，等到夜晚就直接去老蘭行轉，利申未去過，都是跟住阿Chris行。
佢帶我地去到一間club，入到去已經有好多人同佢打招呼，睇黎佢係呢到都幾出名。
成個場啲燈光閃下閃下，而且播緊一啲好撚輕快嘅音樂，我自己因為第一次黎唔係好慣，而且好多人搞到有啲迫。
男人：「唷呢個咪Chris仔，搞咩最近都唔見你呀。」
Chris：「近排忙呀嘛，見今日終於得閒咪帶埋啲朋友黎玩下。」我地同個男人點點頭打一打招呼。
個男人係Chris耳仔邊講咗啲野，Chris即刻係到淫笑，之後佢就走咗，而我地三個就呆下呆下咁。
Chris：「你地好彩啦，第一次黎就有正野。」
阿洛：「正野？呢到有啲咩正野？」我自己都好疑惑。
Chris：「你地睇下個邊。」
佢指住一個方向，有四條女坐咗係到傾計，四條都好撚正式但睇落去年紀同我地差唔多，第一個著住白Tee牛仔短褲，個波起碼有C，第二個金白色頭髮，隻眼係粉紅色，但個樣又唔似鬼妹，第三個矮矮地，成個小拳石咁，最後一個無乜特別，無話特別靚但又唔樣衰，正正常常。
頭先個男人都係個到，佢同個四條女講咗啲野，之後佢地都望住我地，笑笑口咁向我地揮手。
Chris：「喂你三個仲企係到做乜，人地同我地揮手啦，行啦。」佢打頭陣上前，我地就跟住佢。
我地去到去，啲女仔就即刻褪位，好似比我地揀咁，每人坐一條女隔離。
Chris就坐咗第一個隔離，一定係貪佢最大波，阿洛第二明仔第三，我最後就坐正常樣隔離。
男人：「難得有新人黎，今晚我嘅，大家玩得開心啲呀。」佢拎咗幾杯酒比我地。
最有料嘅Chris已經好快同大波妹好好傾，搭哂膊頭咁，隻手仲時不時Hi下佢個波。
明仔飲咗幾啖酒塊面已經紅哂，比小拳石笑佢好得意，係到摸佢塊面，搞到明仔紅上加紅。
反而阿洛表現唔錯，都傾到幾句，我仲以為佢會比條女啲頭髮同隻眼嚇親。