我嘅大學生涯 (有甜): 無求

自此我就多咗黎Soc房，有時會學下跳，不過大部分時間都係係隔離睇。
 
我：「Do you want a date？」我問阿蓉。
 
阿蓉：「今日我唔洗係Soc房當值，你想帶我去邊呀？」
 
我：「唔...不如去科學館囉？」
 
阿蓉：「無啦啦去咩科學館呀。」
 


我：「無野做呀嘛，去睇下宜家科學館變成點都好。」
 
然後我就同佢搭地鐵去尖沙咀，諗諗下最上一次去科學館已經係小學去參觀。
 
入到去成堆大陸人企係哂到，原來有幾個旅行團都返黎呢到。
 
好彩我同佢都好快買到飛，不過因為閒日，除咗啲大媽之外都無乜人。
 
同埋咁啱撞正佢地有 Pixar 嘅展覽，主要介紹下佢地整套電影時嘅幕後工作， 同埋有啲Figure比人影下相。
 


阿蓉：「你睇下隻大眼仔！好得意呀！」
 
當我諗緊大眼仔戴黑超會係點樣嘅時候，佢又拉咗我去睇第二樣野。
 
阿蓉：「阿燕你睇下，係inside out啲角色呀，你覺得我似邊個呀。」
 
我：「一定係阿燥啦，成日都發脾氣。」我講完之後佢又準備發脾氣。
 
我：「咁你覺得我似邊個？」我係佢個拳頭揮向我塊面之前講。
 


阿蓉：「唔...唔...我唔知喎。」佢諗咗陣。
 
阿蓉：「你成日都收收埋埋，無論發生咩事個樣都好似一樣咁，我又點睇得出你嘅情緒會係點。」
 
只係我覺得無必要將負面情緒呈現出黎，就好似你好唔開心，個樣成個死老豆咁款，咁你想人地比咩反應你。
 
安慰你又唔係，同你講野又唔係，陪住你又唔係，搞到人地都唔知你想佢點，又唔知你想佢陪定想佢走。
 
所有悲傷嘅情緒，由我一個人面對就夠，你地無必要同我一齊承受。
 
睇到呢個展覽最後，佢有得比我地畫畫，可以畫下啲角色。
 
人地全部都畫得勁靚咁貼哂係埲牆，咁我都惟有表演一下堪稱比得上達文西嘅畫功，達文燕。
 
我Google咗海底奇兵隻 nemo 跟住畫，唔洗三分鐘就已經畫完，但阿蓉仲係到畫緊。


 
佢畫緊隻大眼仔，而我忍唔住偷影佢個認真樣，大家都知認真緊嘅人係最型最靚。
 
阿蓉：「呼...終於都畫完。」唔知係對大眼仔定係畫功嘅執著，佢已經重新畫咗五次。
 
我：「你畫得好靚呀。」
 
阿蓉：「你個張呢？哇哈哈哈，你畫緊乜野呀，哈哈笑死我啦。」
 
佢笑到其他人都忍唔住偷望我個張，一見到即刻跟住笑。
 
我：「喂呀唔準笑呀，我呢啲藝術你唔識欣賞架啦。」貼埋上埲牆之後我就即刻急急腳捉住佢走。
 
跟住我地就返去上面，睇返真係科學館嘅野。
 


不過發現都係無變過，都係個粒離子波，中間有個好似過山車咁，跟住有兩粒波轉黎轉去，同埋有啲設施比我地玩下。
 
阿蓉：「哇，呢部機識得整個龍捲風出黎喎。」佢指住部龍捲風機，而我開始諗返起啲唔好嘅回憶。
 
跟住我同佢行到去鏡子世界，大家最鍾意打卡嘅地點。
 
阿蓉：「阿燕...我比人砍咗個頭...」佢企係個嗰遮住個身得返個頭嘅鏡到講。
 
我：「你死得好慘呀...阿蓉...嗚...」我即刻係出面跪低喊配合返佢。
 
阿蓉：「唔好喊...我係上面會好好睇住你... 再...見...啦... 」然後佢就斷氣，兩隻眼閉上。
 
我：「阿蓉！！」
 
我大叫一聲，跟住就比保安叫我先生請你唔好咁大聲，會騷擾到其他人，斷咗氣嘅阿蓉居然笑到翻生。


 
阿蓉：「我高過你啦。」我地係塊伸縮自如嘅鏡面前。
 
我：「係喎，但點解你肥咗咁多嘅，成個胖虎咁。」
 
阿蓉：「係咩，你睇我又瘦返啦。」
 
一秒鐘就由肥變瘦，如果大家減唔到肥嘅，唔好再信人地啲咩瘦身餐單或者做運動，試下黎科學館，可以光速變瘦。
 
佢拎部電話諗住影相，我就係後面攬住佢，一齊望住塊鏡咁影咗呢張羨慕死人嘅相。
 
然後又黎到個塊淨係望到自己背面嘅鏡。
 
我：「蓉小姐，其實我鍾意咗你好耐，可唔可以比次機會我？」
 


阿蓉：「唔好意思，我已經有男朋友架啦，你死咗條心啦。」
 
我：「我肯定我好過個嗰男仔，你離開佢同我一齊啦。」
 
阿蓉：「唔要，我淨係愛我男朋友一個，我同你係無可能。」
 
我：「點解...？佢有咩咁好，佢只係會一次又一次咁傷害你，令到你傷心，令到你難受，咁嘅人你要黎做咩姐。」
 
阿蓉：「或者佢唔係一個好情人，唔係一個好男仔，甚至唔係一個好人添。」
 
阿蓉：「但係我愛佢，如果佢係一個殺人犯嘅話，咁我自願做一個共犯，同佢一齊接受死刑。」
 
我同佢拎返轉面望住大家，呢一刻時間就好似暫停咗一樣，成個空間得返我同佢。
 
原來呢個就係人地所講嘅愛，無論有幾多人係隔離都好，我隻眼淨係望到你一個。
 
我：「好啦玩夠啦，係時候要走啦。」
 
阿蓉：「嗯。」佢翹住我隻手再講。
 
我：「你想食咩呀，打邊爐？食壽司？鋸扒？」
 
阿蓉：「無所謂啦，食麥當勞都得。」
 
「因為我今日真係好開心，可以同你咁樣玩一日，我已經咩都唔求啦。」