我嘅大學生涯 (有甜): 無悔
過晚之後，我同佢發展咗一段唔應該發展嘅關係。
佢會同我講佢男朋友送咗啲咩比佢，我會同佢講返我同阿蓉去咗邊到玩。
但每一次講完都係唔開心收場。
我由中學開始就一直都令自己唔好鍾意人，結果宜家同一時間鍾意咗兩個女仔。
但有時啲野，我地幾努力去避免都好，佢要發生就點都會發生。
就好似紅綠燈咁，整出黎係為咗減少交通意外，但總有人會比車撞死。
呢個世界無野係我地可以完全控制到，我地惟一可以做嘅野就係順其自然。
個天拎得你一樣野，佢就會比返一樣野你，你只要慢慢等到呢個時候就夠，唔洗刻意去做啲咩。
時間亦黎到Present嘅日子。
Spencer同Ruby好專業咁講咗LGBT係包括男女同性戀，雙性戀，跨性別嘅人，同埋講社會對佢地嘅接受程度，比人歧視同標籤嘅問題。
Candice就講希望幫LGBT爭取應該有嘅權利，例如政府應該比同性戀者結婚等等。
我就搵咗哥哥做例子，由一開始佢同毛姐求婚未果，再到佢同唐唐一齊嘅事。
哥哥曾經講過，如果我鍾意一個人，個嗰人又鍾意我，根本就唔洗care佢係男定女。
雖然我唔係同性戀，但係我覺得哥哥講得無錯，愛係一種感覺，性別只係驅體，你愛嘅係對方嘅靈魂，而唔係對方嘅驅體，所以先叫靈魂伴侶。
除非你同我一樣都係鍾意驅體，咁呢啲就係驅體伴侶，好似ERN9咁講，有聖無愛。
Professor話我地做得好好，而且答問題環節又有Spencer同Ruby答哂，我同Candice就輕輕鬆鬆完成大學第一個Presentation。
Spencer：「好啦，咁之後大家做埋份Report就得啦，有機會再合作啦。」佢揮揮手再搭住Ruby膊頭，不帶走一片雲彩咁離開。
原來呢啲先係男神，我已經係光速變gay愛上呢個男人。
Candice：「我又要。」佢夾硬將我隻手放落佢膊頭到。
我：「玩完未呀傻妹。」
因為佢根本就唔夠高比我搭膊頭，只可以係講掂膊頭。
Candice：「係喎，個晚你女朋友有無嬲呀？」佢指飲酒個晚。
我：「仲好意思講，嬲到仆街呀，氹咗勁耐先氹得返。」
Candice：「哈哈笑死，乜佢咁小氣呀。」
我：「試下你條仔po自己同第二條女單獨出去呀，睇你嬲唔嬲。」
Candice：「我唔會嬲，我會剪斷佢條賓州姐。」佢做咗剪嘅動作，我驚到即刻禁住下面。
男仔：「Candice？」有個同我差唔多高，睇落去毒毒地，但幾大隻嘅男仔係門口。
Candice：「BB~阿燕呢個係我男朋友呀。」
我：「Oh，師兄想問你條巨龍還在嗎？」我伸出右手。
男仔：「吓...？哦！！還在還在！！」佢好快get到我講咩，同樣伸出右手同我握手。
Candice：「阿燕你唔好玩我條仔啦，我地走先啦。」佢拖住巨龍還在兄係我面前消失。
又係天地堂嘅時間，唔知點解我個腦突然諗到一個我無去過嘅地方，就係Soc房。
Bella曾經話過無野做可以去Soc房到玩，所以我宜家就去睇下係咩一回事黎。
佢地嘅Soc房就係一間鏡房，不過都唔出奇，佢地係跳舞當然要望住自己跳舞嘅動作。
Bella啲莊員，同埋仲有幾個都有玩Ocamp嘅人都係到跳緊舞。
因為佢地好集中跳緊無留意到我，而我成個grad din毒撚咁企埋一面，廢事阻住佢地。
直到跳完之後，佢地係到抖氣，我就拍拍手掌聲鼓勵。
Bella：「阿燕？點解你係到嘅？」佢行到我面前。
我：「無呀，我記得你話無野做可以黎玩，做咩？唔歡迎我呢個跳舞新人？」
Bella：「梗係歡迎，你放低袋先啦。」
我同其他人打個招呼，宜家先見到原來阿洛同羅拉都係到。
羅拉 ：「yoyoyo，阿燕你又黎跳舞？」
我：「係呀，你唔記得我跳舞好勁架咩？」
阿洛：「我淨係記得你個陣跳到成個傻仔咁咋喎。」
我：「真野就唔好拎出黎講先，話時話咁你地又會無啦啦係到跳嘅？」
阿洛：「黎緊有個Show呀，我同羅拉都參加咗，不過好辛苦，成日要練到夜晚先有得走。」淨係聽都覺得辛苦。
羅拉 ：「唉唔好提啦，我都唔知幾耐無返屋企食飯，我阿媽問我係咪去咗盜墓添呀。」
我：「哇咁辛苦你地仲玩嘅，係我實頂唔順。」
阿洛：「阿燕你唔明架啦，真心鍾意跳舞就唔介意辛苦，而且我都想showcase個日表演得好啲。」
我一直都好羨慕搵到自己鍾意嘅野嘅人，唔似我呢啲乜都無所謂，無目標無夢想。
好似啲動漫展毒撚一樣，好多人會笑佢地毒，人又中二病，鍾意埋哂啲二次元，又原神啟動咁。
我覺得佢地其實好勁，可以全心全意咁鍾意動漫，買figure買福袋，邊啲動漫人物生日又去應援，甚至整埋應援巴士。
鍾意得一樣野，就係可以為個樣野無條件咁付出，佢地付出唔係想話比人聽佢有幾威幾有錢，而係佢地真心鍾意，真心想支持自己鍾意嘅角色。
我相信大部人都係渾渾噩噩，無憂無求得過且過，過得一日得一日，雖然我唔會話呢啲人錯，平淡有平淡嘅好。
但如果人生入面有機會可以為自己鍾意嘅野付出一切嘅話，咁都算無悔呀，係咪先？