我嘅大學生涯 (有甜): 人性
又係天地堂嘅時間，但今次我去咗圖書館到摺，因為有Assignment要做。
做做下無啦啦有條友拍我膊頭。
Hanna ：「同學唔好意思，我叫Hanna呀，可唔可以幫我做份問卷呀？」
個女仔幾靚，有啲似陳漢娜，我點點頭，佢就坐係我隔離。
我：「你做緊project要搵人填問卷定咩？」
Hanna ：「我做緊group project呀，個題目係香港援交問題，需要搵人幫手填問卷作為民意調查。」
啲題目大約係你認同援交應該合法化嗎？你認同只要雙方同意便能進行性交易的嗎？你認同進行性行為是出於個人意願，不應受到任何法律限制的嗎？
我全部填中立，我唔支持亦都唔反對，做一隻港豬就算。
Hanna ：「你全部都揀中立嘅？」
我：「係呀，我對呢方面無乜意見，咁你呢？」
Hanna ：「我係唔認同嘅，我覺得性唔可以係一種交易，因為性應該係出於愛而進行，而唔係金錢。」
我：「咁佢地都係個人意願姐，一個願打一個願挨，你有錢收我又有得爽，好似劉德華咁講，生意都係講供求架姐。」
Hanna ：「呢個世界唔係咩都可以買同交易，如果係嘅話，成個世界就玩完啦。」
我：「你錯啦，好似啲人咁講，每個人心入面都有一個價，只要有錢，根本咩都可以買同賣，人性可以賣，身體可以賣，就連自尊都可以賣。」
Hanna ：「世界就係有太多好似你呢啲咁嘅人，就連做人應該有嘅尊嚴都開始消失，當真係有人比錢買起你，乜你真心願意收錢做奴隸咩？」
我答唔出，或者你地都可以問下自己，如果有人比一百萬，甚至一千萬你，但係要你做咩就做咩，你又肯唔肯？
Hanna ：「無聲出呢，係咁先啦。」
佢企起身諗住走，但係我叫停咗佢。
我：「如果我想買起你兩粒鐘，又得唔得呢？」
Hanna ：「唔得喎。」佢單隻眼伸條脷咁講。
我：「咁比IG我都得啦掛，話哂我都幫咗你填問卷，公平啲好喎。」
Hanna：「唉怕咗你啦。」佢開咗佢個IG出黎，我就即刻加佢。
佢IG有成萬人Follow，原來佢係個啲model黎，有好多衫嘅牌子搵佢拍廣告，連名牌都有。
我：「哇，你明星黎架？連益力多都搵你拍廣告？」
Hanna：「明星就仲有排，人生得靚都無辦法，雖然你個樣都唔差。」
同人唔同命就係呢啲。
我：「呢個你男朋友黎架？」佢同一個男仔影咗好多張廣告相，仲有啲親密嘅動作。
Hanna：「哦，我同佢係螢幕情侶黎架姐，但其實佢好鍾意我，咁啲人又覺得我同佢一齊好睇可以make noise，所以我同佢咪扮一齊囉。」
「雖然我唔鍾意佢，但因為佢多fans，所以我惟有扮自己鍾意佢。」
我：「超，結果你咪又係玩緊交易，你宜家咪將自己感情同關係賣出去囉。」
Hanna：「係呀，但我無得揀，我唔同佢一齊我就無人氣， 無人氣就無job，無job就無錢。」
Hanna：「所以我一直都好憎我自己，唉我都唔知同你講咁多做乜，明明大家三唔識七。」佢微笑住講，然後擰轉身離開。
我好似愛德華咁講咗一句。
我：「遲早有日我會將你由地獄救返出黎。」
佢只係覆咗兩隻字。
「哈哈」
佢離開我視線，而我亦都開始後悔自己講嘅野。
將你由地獄救返出黎？我何德何能去救人？連自己都未搞得掂仲好意思話去救人？
鏡頭前面風光，後頭後面落魄。
我唔知自己可以做到啲咩，但望住一個女仔為咗維持人氣而去同一個唔鍾意嘅人一齊，試問有邊個唔心酸。
就好似派對咖孔明個隊AZALEA咁，簡單講就係有三個女仔夾band，但係唱自己嘅歌無人聽，跟住有人肯出錢幫佢地，而佢地三個係呢個人幫助之下成功出名，仲好紅。
但代價就係佢地每次表演都要戴面具唔可以show樣，要著性感露波衫，唔可以再唱自己嘅歌，要唱個嗰人幫佢地寫嘅歌。
最後，佢地好紅好多粉絲，但佢地無一個人開心。
將自己嘅人性，身體，自尊賣出去嘅代價就係咁，你得到一切，但唔會再感受到快樂。
就同係地獄無分別。
但係人地都無話要我救，我都唔識佢，根本唔應該對人地嘅野咁上心。
人就係咁，愈係唔關自己事嘅野就愈有興趣，好似有對情侶係條街到嘈交，明明唔關你事，你都會忍唔唔扮哂野行去隔離偷聽嘈緊乜。
Emily同我講過，如果你想成為一個Player嘅話，就預咗會傷害人。
我：「咁如果有人搵我幫佢呢？我應該幫定唔幫？定踩多兩腳落去？」
Emily：「踩多兩腳你都講得出，果然夠賤格，不過睇下個嗰人值唔值得幫啦，呢個世界唔係所有人都應該幫，一個強姦犯叫求救你估有無人會理佢？」
我：「咁唔會好矛盾咩，我地要傷害人，但有時又去幫人，咁我地到底傷害人定救人？」
Emily：「睇你自己點諗啦，就好似當初蔡煒燕都唔知點解會選擇幫我一樣，可能都只係直覺話比佢聽要幫我。」
我：「我都只係驚我到時唔知自己救咗一個殺人犯。」
Emily：「咁就好似我咁，邊個都唔好幫，由得佢地自生自滅。」
我：「唔係呢，你知我唔係啲咁嘅人黎架。」
Emily：「我淨係知你係個殺人凶手。」
佢講中咗我痛腳，我都只能夠無聲出。
Emily：「好好咁係人間到贖罪啦，係你欠佢架，準備呢世都徘徊係罪惡感同懺悔之間啦。」
「唔好唔要我，我求下你。」
我嘅情緒專員係我腦入面播放佢個日跳樓死嘅記憶球。
我嘅阿愁可能見我最近太幸福，播返我嘅罪孽出黎令我記返起我係一個賤人。
我親手害死人，直到Emily教我點樣去變一個男神，同我講我你以後要不斷傷害人，不斷加深你嘅罪孽，等到你死個日就係地獄入面慢慢贖罪。
確實，害死人呢個罪孽我係人間無可能彌補到，只有佢見到我係地獄受盡折磨先勉強係一個道歉。
如果你係到，你會唔會明白我？
可惜你唔係到，係我最需要你嘅時候，你離開咗我。
要我一個人去面對所有野，但我唔會怪你，因為係我自己攞黎，只係我好想親口同你講句我好掛住你。
我嘅老友，你宜家係邊？
「因為我在那時被拋下了所以，得追上去才行。」