【愛情】拜托，別再見: 32

喺我地到旺角嘅時候，距離我同佢地嘅約定時間仲有一段距離，所以話做咩要咁趕⋯

「你約咗你啲朋友幾點呀？」我問潘煦言，潘煦言正拎住手機睇唔知咩

「6點半～」潘煦言一講，我即刻拎起手機睇，都差唔多要6點半啦，「佢地都未到齊，未有咁快齊人啦，可以同你行一陣，等佢地到齊我再去匯合佢地～」

潘煦言好似已經睇出我眼中嘅慌張，畢竟遲到唔係好事，佢仲悠悠閒咁同我解釋，推住我行去商場嘅方向

「但會唔會唔太好⋯？」我有啲遲疑，都係覺得遲到唔係好事





「唔會呀～我地成日都係咁，好難準時就齊人㗎～」潘煦言一臉習以為常，「男仔嘛～」

「咁你預時間啦。」我有啲無奈

程栩顥同關澤文平時都好準時，反而有時係我同遠菁會遲少少到，比人話成日遲嘅係我地兩個女仔⋯

我同潘煦言喺商場行一陣，雖然我都冇咩特別想買，不過行一陣消磨下時間都好嘅

行咗差唔多半個鐘，我都差唔多夠鐘同佢地見面，佢地都話差唔多要啦，我諗我宜家喺商場落番地鐵站應該差唔多





「你嘅朋友仲未到？我會唔會連累你遲到遲太多啦？」我望向喺我隔離嘅潘煦言

「唔會啦～你唔洗咁擔心～」潘煦言笑笑口講，又拎起手機好似係覆緊message一樣打字，「佢地話都係喺餐廳等算⋯我轉頭過去㗎啦～」

再行前多啲，喺差唔多到我地約定好嘅出口嘅時候，我已經見到好熟悉嘅身影，果然程栩顥同關澤文都係最準時

「佢地到咗啦。」我下意識開口講咗句，同自言自語冇太大分別

程栩顥望過嚟呢邊嘅時候，我有一刻諗佢會唔會見到我，下一秒，我就同佢嘅視線對上





「我匯合啦，你都快啲同你啲朋友匯合啦～今日辛苦你啦～」我擰轉頭對潘煦言道，但潘煦言同我行同一個方向

「咁我地嚟緊番工再見啦～」潘煦言點點頭，扁一扁嘴，「拜拜～」

我對佢揮揮手，然後行去我嘅朋友身邊，程栩顥嘅目光仍然停留喺我身上

「你地好準時⋯遠菁到邊呀？」我企喺程栩顥同關澤文面前

「姜小姐就話下個站嘅。」關澤文面無表情咁點頭，但似乎佢嘅臉上寫住「我唔信」三個大字

「哦⋯咁應該都要再等下啦⋯」我撅起嘴，跟住關澤文點點頭

「佢仲喺度嘅？」潘煦言忽然開口，望向左邊微微頷首

我順住佢嘅視線望去，佢指嘅係企喺行人路中心嘅潘煦言，佢拎住手機放到耳邊，應該係同朋友講緊電話





潘煦言好似察覺到我地嘅目光一樣忽然望向呢邊，同我對上視線後佢嘅嘴角上揚勾起好睇嘅弧度，雙眼微微彎起，但有一個瞬間佢嘅視線落喺程栩顥身上

「拜拜～」我用口形對佢講，潘煦言笑笑就向前行

「你今日又同佢一齊嘅？」程栩顥收回視線問我，目光中帶住一份世事與佢無關嘅淡然

「邊個呀？」關澤文比我地嘅對話勾起咗好奇心

「喺餐廳番工嘅同事，佢今日咁啱都約咗朋友喺呢邊食飯。」我解釋道，我嘅餘光留意到程栩顥仍然望住我，我又再開口：「今日幫佢補習嘛，佢琴日突然間話想今日補，所以就幫佢加鐘補習啦～」

「加咗幾多個鐘？」程栩顥微微低頭，鞋尖踩一踩地板，語氣中聽得出帶住淡淡嘅笑意

「一口氣補咗四個鐘，命都冇咗半條，都要腦閉塞啦⋯」我拍拍自己嘅額頭，想將塞喺腦入面嘅嘢都拍晒出嚟





「下次唔好補咁耐就係啦⋯」程栩顥微微點頭，佢今日冇咩笑容好似對咩都冇咩興趣咁

「你今日好似冇咩精神咁嘅？」我打橫踏咗一步行到程栩顥面前，「今日去番工啦？」

「冇。」佢搖搖頭，今日嘅佢係同平時明顯嘅唔一樣，係明顯冇咩精神心情嗰種

「哦！同我地出嚟食飯你唔開心！」我指住佢，露出一個發現佢做壞事一樣嘅表情

「同你地一齊食飯就最開心啦，點會唔開心⋯」程栩顥唔知係敷衍咁笑定比我引到笑，但佢嘅笑容顯而易見咁冇平時開懷

「邊個激親你？」一直沉默嘅關澤文突然開口，「張苒曈呀？」

「關我咩事⋯！你唔好冤枉我呀！」我拍開關澤文嘅手，佢只係望住程栩顯笑

關澤文嘅笑容太刻意，刻意到我都察覺到好似真係有咩問題包裹其中





「我做咗咩激親你？」我側住頭問程栩顥

「你唔好聽佢亂講⋯」程栩顥將湊近到佢面前嘅關澤文嘅面一手推開，嫌棄咁望咗佢一眼

關澤文喺隔離偷笑，程栩顥直接就提手打咗關澤文嘅手臂一下，不過應該唔痛，比起突然比人用力過度搣

「呀嘶！」關澤文突然一下彈開縮開，原來係遠菁，佢嘅手仍然維持喺搣關澤文嘅動作，「姜遠菁！」

「呀！」關澤文伸手還搣，喺遠菁嘅前臂上搣咗一下，遠菁嫩白嘅手臂即刻紅咗一撻，「關澤文！我隻手呀！紅咗啦！」

我同程栩顥冇加入佢地嘅對戰局，默默咁行喺前面；關澤文話佢只係好細力，而且係以牙還牙，遠菁話佢皮粗肉厚同自己嘅皮膚嬌嫩唔一樣，佢地又喺度作出無意義可言嘅爭拗⋯

喺學校嘅時候成日都有人話佢兩個係一對，遠菁直接反白眼話佢對關澤文嘅啲小學生冇興趣，關澤文聽到之後就反駁話遠菁太粗魯，每日每星期都會因為各種無謂小事進行無謂爭拗





由嗰一刻開始，我就可以好肯定咁同大家講，佢兩個最好唔好喺埋一齊，雖然性格一凹一凸係好事，但喺佢兩個身上唔係，佢地一齊嘅話大概會令身邊嘅人好攰⋯

喺電梯級慢慢變成平路嘅時候，我追上去行喺程栩顥隔離，程栩顥望一望我但又冇講啲咩

「唔好心情唔好啦～陣間都食好嘢啦～」我探頭望佢

「冇心情唔好呀⋯！」程栩顥放慢語速，逐隻字講清楚比我聽，「你唔好聽關澤文喺度亂噏⋯」

「哦。」我點頭，但我冇真係信佢，因為睇起嚟完全唔似佢講嘅咁，「信你信你，我以為你今日又去咗補習咋。」

「我唔係你。」程栩顥忽然咁樣講咗句，「番餐廳仲要幫人補習。」

「舉手之勞啫～咁佢叫到唔通唔幫佢咩？」我無奈咁嘆氣

程栩顥好似諗唔到要講咩一樣，提手撥一下後尾枕嘅頭髮後微微點頭




IG Link: https://www.instagram.com/nd_cotttoncandy/?hl=zh-tw