【愛情】拜托，別再見: 33

喺餐廳坐低嘅時候，程栩顥坐低喺我對面同關澤文一齊坐，我同遠菁睇緊要嗌咩，今日打邊爐大概都係成為食肉獸

「我地兩個去拎嘢飲，你地飲咩？」程栩顥同關澤文起身行咗出去，企喺隔離問

「你地影番嚟比我地睇？」遠菁探頭對佢地講，「我同苒曈嗌嘢食，你地都係食嗰啲㗎啦～」

佢地兩個男嘅慢吞吞咁行去拎嘢飲，等咗一陣，遠菁就收到message，影咗雪櫃嘅嘢飲番嚟問我地飲咩

「白桃烏龍」「我要檸檬茶！」





我平時都係飲開白桃烏龍，但其實飲起嚟桃味唔係真係好重，我亦唔係十分中意，六分啦，只係抱住既定印象，覺得烏龍茶消膩所以先飲

「拎咗」程栩顥回覆得好快

我估佢喺行到雪櫃前面就已經第一時間拎咗，因為我平時飲呢個佢都係知道嘅，所以一早拎定唔出奇

「Thank you～～」我回覆，「就知你拎咗啦～」

佢兩個拎住嘢飲番嚟，程栩顥將我嘅茶放到我面前，仲順手拎咗支飲管番嚟





「唔該你呀～」我已經好口渴，拎起就要擰開蓋飲

但唔知道係咪因為喺雪櫃拎出嚟，蓋同樽身都有啲濕，擰極都擰唔開，坐我隔離嘅遠菁咔啦一聲就開咗罐檸檬茶

「係唔係開唔到？」程栩顥伸出手，指住我手上仲未開到蓋嘅樽

「嗯⋯幫我開呀～」我直接將樽茶遞比程栩顥

程栩顥穩穩接住，稍微用力一扭就擰開咗蓋，佢先將開咗蓋嘅茶遞比我，我先飲咗一大啖，然後先再伸手接個蓋





一眨眼枱上面就放滿肉，多到張枱都就嚟冇位放⋯關澤文好努力咁將肉放入湯入面，一熟咗就夾上嚟食

喺等緊肉熟嘅空檔大家都係食住小食先，佢呢度嘅油炸鬼係幾好食嘅，我同遠菁默默咁你一舊我一舊清枱上嘅小食

「你個friend做咩request follow我？」拎住筷子睇手機嘅程栩顥突然開口，然後將手機遞到我面前

喺佢嘅通知入面出現咗一個追蹤請求，時間顯示係啱啱，呢個icon一睇我就認得，係潘煦言

「佢做咩突然間follow你嘅？」我好奇咁問，但問完先諗到我都唔知佢點會知

「點知⋯可能見到有common friend就follow掛。」程栩顥聳肩表示佢都唔知道

「可能？佢應該知係你所以先㩒follow。」我從鍋中夾起一塊肉，吹兩下放下口，都係熱到我一直哈氣

「都好難唔知。」程栩顥低聲講咗句，我定睛望住佢





程栩顥拎住手機唔知㩒咗啲咩，但應該係比潘煦言follow啦，我都想知佢點解會突然間follow程栩顥⋯

程栩栩影咗枱上嘅嘢，再過幾秒我就見到佢po咗個新story，而且係@咗我地幾個

平時程栩顥都係最遲po story嗰個嚟，什至係等我地po晒佢再repo，今日佢做咩突然間一反常態咁早出個story？

唔通因為潘煦言follow咗佢，佢怕冇嘢睇所以想出個story比佢睇下⋯？嗯⋯？

「你今日去打邊爐？睇到你個friend嘅story」呢頭講完就收到潘煦言嘅message問

「係呀」我回覆同時抬頭瞄咗程栩顥一眼，佢啱啱夾咗生菜落碗，「你做咩無啦啦follow佢？」

啱啱send出去嘅message瞬間被讀，喺等回覆嘅時間入面我都係繼續食嘢先啦





「我想食金菇呀，啱啱冇拎？」遠菁拎住夾喺眼前裝滿菜嘅碗入面搵

「我去拎呀。」我放低手機就起身

「順便拎啲丸呀～」關澤文唔客氣咁點菜，「幫我拎多支茶唔該你～」

「我同你出去拎。」程栩顥放低筷子起身

我企喺放菜類嘅凍櫃前，凍櫃仲有陣冷氣同煙飄出嚟，拎起一隻鐵夾先夾兩下空氣再去夾遠菁想食嘅金菇

「手機，幫你拎住先？」程栩顥指一指因為冇手而放咗喺碗底嘅手機，「你出嚟夾菜做咩要拎埋手機？」

「順手就拎咗⋯」我將個碗遞咗比佢，自己拎住鐵夾，「咁你拎碗。」

「都得⋯」程栩顥嘅臉上浮出一絲笑意，「遠菁話要食金菇，夾多啲啦咁。」





「好呀⋯咁丸要咩呀？呢個？」我夾咗一大束金菇，然後就移到放丸嘅凍櫃前面，「呢個？呢個要唔要？」

最後我聽程栩顥講每樣常食嘅都夾咗兩粒，反正仲有咁多嘢食，都唔緊要啦

喺手中嘅手機微微震咗一下，我估係潘煦言覆我：「成日見到係建議嗰度，所以我就follow咗」

「佢同我講話你follow佢嘅時候我諗緊你點樣搵到佢」 我企喺原地回覆

「仲有冇嘢要食？」程栩顥問，我嘅餘光見到佢轉身面向我，然後行到我面前

「佢話佢見到你成日喺建議嗰度所以follow你。」我將手機遞到佢面前

「Okay。」程栩顥只係帶住微笑點一點頭，「咁都好幸運，咁多個建議入面揀咗我嚟follow。」





唔知點解，聽起嚟有啲奇怪，唔似佢平時會講嘅嘢，不過佢睇起嚟又同平時冇咩分別，可能只係我嘅錯覺⋯？

「仲有冇咩要食呀？」程栩顥問我

「應該⋯冇啦？」我拎住鐵夾又夾兩下空氣，然後踏一大步行去將夾放番喺膠盒入面

我同程栩顥行到番去嘅時候，關澤文拎住個湯殼搵緊肉，見到我地番嚟，佢伸手就要接住裝滿金菇同丸嘅碗

「你兩個拍拖呀⋯拎咩拎咁耐？」碗一到關澤文手上就比佢揶揄

「拎嘢呀！」我反咗個白眼坐低，「你要食丸嘛！喺出面揀比你食呀！」

「哦～揀咁耐呀～」關澤文轉移目標去程栩顥度

程栩顥仍然一個雲淡風輕，拎起關澤文嘅嘢像，飲管直接篤到關澤文個鼻尖：「飲水啦，一直講嘢唔口渴？」

「哎！篤落我個鼻度啦！」關澤文向後避開，後尾枕差啲直接撞落後面條柱度，「我飲我飲！」

關澤文拎住支茶飲咗兩啖，一直偷瞄程栩顥，程栩顥下一秒轉頭淡然咁望佢一眼，關澤文嘅視線即刻飄走




IG Link: https://www.instagram.com/nd_cotttoncandy/?hl=zh-tw