【愛情】拜托，別再見: 31
我入門口之後都係send咗個message比程栩顥同佢講一聲，平時就算我地幾個一齊出去，各自到家之後都會同對方講聲，算係習慣性嘅報平安
我拎住衫褲去沖涼洗頭，番完餐廳係必須要洗頭，如果唔係，啲頭髮就會有餐廳廚房嗰陣味⋯
沖咗個熱水涼之後成個人都放鬆落嚟，不過吹頭就有啲懶，我將頭髮吹到半乾就放棄咗
我拖住腳步行番房，坐低喺書枱前打開電腦，拎起手機就見到一條新message：「番到屋企未呀？」
我啱啱先同咗程栩顥講我番到屋企，佢做咩又反問我⋯？
我正想要覆佢一個問號嘅時候，我先發現呢個問我嘅人唔係程栩顥：「咦⋯？」
係潘煦言問我番到屋企未，第一下反應我以為係程栩顥⋯
「番到啦～啱啱沖完涼～」我回覆道，「你番到屋企未呀？」
潘煦言send咗張圖比我，佢喺屋企飲緊湯，所以我問咗句廢話，佢都住喺商場附近，點可能未番到屋企⋯？
「有湯飲咁好呀？」「我媽留咗湯比我」
我冇再覆佢啲咩，曲起雙腳、戴住耳機坐喺電腦前睇片，我冇咩特別嘅興趣，所以平時冇約人唔洗出街嘅時候，我都係喺屋企睇片或者灘
大概係過咗一陣，放喺電腦隔離嘅手機螢幕一亮，彈咗一個新message：「你做緊咩？」
「睇緊片，好無聊」我回覆，message啱啱先send出去就變咗已讀，然後就見到輸入中嘅三個點，「你做緊咩呀？」
「睇緊手機」潘煦言嘅回覆好快，佢好似真係成日都拎住手機，只要send嘢比佢，佢都可以即刻覆
「難怪你可以秒回我」「我秒回都睇人㗎」
「所以我有幸比你秒回啦～」「我嘅學業仲要靠你啦，我點敢唔秒回你？」
「我又唔會因為你遲覆所以唔教你⋯」「唔得，你對我嚟講好重要！」
潘煦言好識講嘢，呢個係同佢熟咗之後先發現，佢好清楚要講咩說話令你放低戒心同心軟
「我先唔信你⋯」我掛住笑容打字回覆佢，「你太識講嘢」
「我唔係對個個都係咁㗎⋯」喺句子最尾嘅委屈表情，都可以估到潘煦言呢一刻嘅表情同呢個emoji表情一樣，「你誤會我啦」
「我冇誤會你」「我已經可以聽到你嘅心入面講緊「懷疑潘煦言係中央空調」之類嘅說話」
「你嘅想像力好豐富，雖然我真係有一刻懷疑過」「切，我唔係，我唔係啲好花心嘅人」
「哦⋯」「你又唔信我！！！」
同潘煦言傾計永遠都會令我笑出嚟，因為佢嘅回答有時好有趣，佢喺我面前嘅時候會直接露出失望委屈嘅表情，搞到宜家就算係睇字我都會諗到佢嘅委屈表情
喺我喺對話欄隨意打啲無意義嘅文字，思考緊要回覆啲咩嘅時候，潘煦言send咗一個有啲突然嘅提問：「聽日得唔得閒呀？」
「做咩？你想聽日加鐘補習？」「嗯嗯，你得唔得閒？唔得閒就算啦」
「又唔係唔得閒，不過我夜晚約咗人出去食飯」「平時嗰個男仔？」
「仲有另外兩個朋友一齊，都可以幫你補一陣」「哦，會唔會唔方便你呀？」
「晏晝都可以嘅，我約咗佢地7點，最晏可以同你補到6點」「好呀！咁就聽日2點見啦」
「你可以捱到四個鐘？」「我可以㗎！就想再補下啲基礎～」
⋯
我每次幫潘煦言補習嘅時候，我都有同樣嘅感覺，佢其實真係可以考得好，如果肯再努力啲嘅話，所以我都唔知我點解要幫佢補習，明明佢靠自己都可以
「啱晒～」我望住佢最後一題嘅答案，滿意咁點點頭，「咁就休息十分鐘啦。」
我都要休息啦，兩個鐘都冇停過，佢可以捱得住但我個腦捱唔住，都要腦閉塞啦⋯
「呼⋯」潘煦言伏低喺枱上，側住頭睇手機，「好攰呀⋯」
「我都話咗⋯你點捱四個鐘⋯」我拎咗樽水出嚟，擰開蓋飲咗一大啖
「我都想飲水⋯」潘煦言嘅目光落喺我手上樽水，「可唔可以比我飲一啖⋯」
我直接將樽水遞比佢，潘煦言擰開樽蓋準備要飲嘅時候動作一頓，然後又問我：「洗唔洗離口飲？」
「唔洗都得，我唔介意。」我冇所謂咁聳肩，潘煦言一啖都飲咗半樽水，幫我擰番好樽蓋放好喺我面前，「你都⋯好口渴⋯」
「呀⋯好攰呀⋯腦閉塞⋯」潘煦言頹廢咁趴喺枱上拎住手機覆message，「你陣間約咗人喺邊度食飯呀？」
「旺角。」我如實回答
「我陣間都落旺角，我啲朋友突然臨時約去食燒肉～」潘煦言笑容滿面，望住我嘅雙眼內都係期待，佢連眼入面都好似有星星一樣，「陣間同你一齊搭車呀～」
「好呀～」望到佢眼中嘅星星，我自然咁露出笑容答應，「你係唔係知自己笑得好睇？」
「我？我唔知呀～」潘煦言直接坦率咁否認，「都冇人話我知，不過宜家你話咗比我知，咁我就知啦～」
「咁我應該唔好同你講先係。」我拎起手機望時間，直覺話我知休息時間結束，「夠鐘啦，我地繼續啦。」
「係⋯」佢好睇嘅笑容瞬間消失，佢頭上好似會有同狗狗一樣，因為聽到冇得散步而耷落嚟嘅耳仔
到差唔多5點9嘅時候，我決定今日到此為止，無論係佢定我都已經冇辦法再用腦去思考，腦用太多直接閉塞
「好啦，今日就到呢度啦，你應該都頂唔順㗎啦。」我合埋佢嘅練習放喺佢面前，睇一眼時間都差唔多可以行
潘煦言好快咁執好晒枱上面嘅嘢，仲快過我孭起袋起身，仲可以伸手拉我催我快啲
「行得未呀？」潘煦言雙手撐喺枱邊望住我執嘢，我啱啱好將所有嘢收入袋，潘煦言就急不及待咁拎起我嘅手機拉我行
「你好趕咩⋯？」我望住佢匆忙嘅背影問道
「唔趕呀～不過好攰啦，想去玩～」潘煦言回頭朝我笑道
IG Link: https://www.instagram.com/nd_cotttoncandy/?hl=zh-tw