【愛情】拜托，別再見: 24

一大清早人都未完全醒晒就要番去中學，我其實仲有啲眼瞓就係啦⋯

早幾日收到之前中學嘅班主任通知，話有份優差比我做，就係學校初中嘅功課輔導班，我唔太明到底有邊個初中生會番學校做功課輔導班⋯

喺同一日我就知道，除咗我，仲有程栩顥，本來遠菁都有被邀請，但佢聲稱自己有兼職要做所以就唔番嚟學校，但我覺得佢只係唔想特登番學校浪費佢嘅暑假

我同程栩顥約好咗喺學校等，著住便服入學校有啲唔習慣，一個月前我仲著住校服番嚟行畢業禮

「你好慢呀⋯」一把聲音從我身後傳嚟，我一擰轉頭就見到程栩顥拎住包嘢飲慢悠悠咁行近





「咁早呀你⋯」我走向佢，指住佢手上嘅嘢飲，「仲要自私飲，都冇我份嘅⋯」

「真係呀⋯」程栩顥點點頭，然後拎出另一包嘢飲放到我手上，「又真係冇預你。」

「嘻嘻⋯我就知你唔會咁狠心㗎啦～」我笑嘻嘻咁轉身踏上樓梯

明明只係啱啱畢業，但感覺已經好耐冇番過嚟一樣，踏上梯級時迎嚟嘅熟悉感一湧而上

我擰轉頭望程栩顥，佢彷彿喺一個瞬間又變番之前著住校服嘅佢，一步一步行上樓梯，抬起頭望到我地喺前面等佢嘅時候，佢先會加快腳步追上嚟





前面有拉住我小跑嘅姜遠菁：「打鐘啦打鐘啦！快啲行啦！」

有喺後面講笑嘅關澤文：「姜遠菁你拉住張菁曈跑，陣間一齊跌呀～而且唔係仲有3分鐘咩！」

有安靜行喺最後嘅程栩顥，四人組啱啱好，唔算擠擁，只要四個人一齊就一定係開心嘅時候，每日都係打打鬧鬧、嘈嘈吵吵就一日

有時候會係我同程栩顥行喺後面，望住前面兩個已經係高中生但仲好似小學生一樣嘅人喺度打鬧

「笑咩？」程栩顥不知不覺咁行到我隔離，同我一齊行到去教員室搵我地之前嘅班主任





「諗起仲番緊學嘅事～」我嘅嘴角上揚起嚟

過去嘅事睇起嚟特別美好，因為擁有嘅當下唔會察覺，直到佢成為過去先開始懷念嗰份時光

「都唔係畢咗業好耐，但有時都會諗起。」程栩顥行到教員室門口，伸手㩒喺門外嘅鐘

我地嘅班主任喺教員室行出嚟，以前嚟教員室嘅次數都唔多，因為我唔屬於成日有嘢要問或者欠功課嘅人

「嗨～食咗早餐未呀？」Miss Chan一向都好親切，以我記得佢什至連鬧人嘅時候都好少

「食咗啦～」我點點頭

「陣間9點半先開始，知道時間嘛？去到12點半，得3個鐘啫～」Miss Chan行喺前面帶我地上輔導班嘅課室，我同程栩顥跟喺佢身後行，「今日兩班啫，人唔算多，琴日同前日都有以前隔離班嘅同學番咗嚟帶輔導班。」

以我所知我地同隔離班嘅同學番嚟嘅時間係隔住隔住嘅，呢個輔導班都只係為期兩星期，算好長時間啦





Miss Chan同我地講解下有咩要做，都係喺佢地番嚟嘅時候點個名，然後佢地有問題嘅時候幫助下咁樣

「啲師弟妹應該差唔多番到嚟㗎啦～」Miss Chan講道，「咁陣間，佢地就交比你地啦～」

Miss Chan講完再同我地傾多陣計就番咗教員室，我同程栩顥喺兩個唔同嘅課室，不過都只係喺隔離

我推開課室門入去開燈開冷氣，一樣嘅課室一樣嘅枱櫈，一磚一瓦都一樣，但都係覺得同未畢業前有啲分別

我將袋放喺老師枱嘅櫈上面，然後企喺課室門口探頭望出走廊，擰轉頭望一眼時鐘，先9點3，仲有15分鐘

喺我再次探頭望出去嘅時候，見到同我一樣探頭望出嚟嘅程栩顥，喺望到對方嘅瞬間已經默契咁笑起嚟

「你做咩咁鬼鬼鼠鼠？」程栩顥左右張望後行出課室，行到我所在嘅課室門前





「你自己都係啦！」我笑道，「好彩佢地輔導班嘅課室喺2樓⋯如果喺5樓6樓就真係太慘⋯」

「人地都未正式番學就要行5、6層樓梯都太過份啦掛。」程栩顥背靠住矮牆

「係我慘呀，好耐都冇上過5、6樓呢啲高層啲嘅地方⋯」我輕嘆一口氣，然後問：「陣間一唔一齊食晏呀？」

「你都未開始番工就諗食晏啦？」程栩顥一臉無奈，「你想食咩？」

「唔知呀⋯呢邊有咩好嘢食？」我有啲迷惘，「好似食嚟食去都係嗰啲⋯」

「番到去先食囉。」程栩顥冇咩意見，「睇下放學嘅時候想食咩。」

「嗯，好呀～」我點點頭

我見上輔導班嘅師弟妹都差唔多到齊，我按住Miss Chan嘅要求點一點名、介紹一下自己，然後就坐喺老師枱前





番學嘅時候根本就唔會坐呢個位，坐喺自己嘅座位望黑板，就算周圍望都會有睇唔清楚嘅地方，但原來老師枱呢個位真係睇得好清楚，每一個位都可以睇到，唔存在坐後啲就睇唔到呢個問題

呢班輔導班嘅同學都算乖，有嘢唔識都會即刻問，大家都會乖乖地一齊聽，係因為啱啱上中學？

「師姐，呢個要點寫？我咁樣寫啱唔啱？」一個短髮及肩嘅女仔拎住功課行出嚟，細聲又禮貌咁問我

「我睇睇⋯」我伸手去接佢嘅功課，萬幸嘅係我讀嘅內容都未完全消失，所以係喺還可以嘅狀態

我唔似程栩顥可以將好難嘅內容簡單化，用最快嘅時間令對方明白，不過我都係盡力講解，望住佢似懂非懂嘅表情，我只好舉例子說明

三個鐘嘅時間唔算好長，亦唔可能做得晒所有暑期功課，而且喺我眼中，暑期作業其實都唔係真係咁重要，當然我喺呢度唔會講出嚟

喺解答完佢地嘅問題之後，課室內又回歸寧靜，只係留低天花板有啲舊嘅吊扇嘎嘎作響嘅轉動聲音





喺我拎住手機開IG po番琴晚收工之後食嘅雪糕嘅相嘅時候，上方彈咗一個新通知出嚟

「諗好收工食咩未？」程栩顥嘅message出現喺通知欄上，然後又收到佢喺IG like我嘅story嘅通知：「原來係你自私食」

「邊有自私食，收工獎勵下自己唔得嘅～」我帶住淡淡嘅笑意拎起手機回覆，「收工同你講食咩」




IG Link: https://www.instagram.com/nd_cotttoncandy/?hl=zh-tw