【愛情】拜托，別再見: 23

今日嘅晚市唔算好忙，就係普普通通咁維持住有人嚟嘅狀況

喺只有零單兩、三台客人嘅時候，我唯有企喺中間、有條柱擋住嘅矮櫃前發呆

「做咩喺度發呆呀？」潘煦言唔知喺邊度彈出嚟

「暫時比較得閒嘛⋯」我托住頭，「今日好似唔算好忙⋯」

「呢啲時候唔好亂講嘢⋯！」潘煦言嘅食指抵喺唇前，「等到截單先再講。」





番工最怕就係開口中，呢頭講完好得閒，轉個頭忙到癲咗，但今日好好彩冇呢個情況發生

「最近出咗隻新口味嘅雪糕，你有冇睇到？」我將喺手機咁啱睇到嘅po比佢睇，「好想試，唔知有未呢⋯」

「樓下嗰間7仔好似有，嗰日經過見到佢話新品上架～」潘煦言雙手放喺櫃面上，愉悅放鬆嘅聲線喺耳邊傳嚟

「有啦？」我意外咁瞪大眼，「陣間收工去睇下先～」

「陣間收工就買嚟食啦！」潘煦言笑道，手摸一摸頭髮，「比你講到我都想食⋯」





「咁陣間就去食啦～」我抵抗唔到波子汽水味嘅雪糕嘅誘惑，加上隔離嘅惡魔低語，我直接投降

「陣間，一齊去食？」潘煦言又用期待嘅眼神望住我

「好呀，一齊去食囉～」我比咗個Okay手勢

潘煦言即刻露出燦爛嘅笑容，好啦，佢係真係好想食；佢一直喺我隔離望住我笑，我一望過去就見到佢嘅笑容

唔知點解每次見到佢呢個笑容都會覺得，佢係真係個好開朗好樂觀好活潑嘅人，會令身邊嘅人都會跟住佢一齊笑嘅人





喺收工打完卡之後，潘煦言已經一支箭衝去換衫，但換完衫都係要坐喺度等我

等我喺更衣室行出嚟嘅時候，潘煦言已經企起身行近我，帶住微微嘅抱怨：「你好慢呀！快啲啦！」

「有冇咁趕呀⋯！」我雖然係咁講，但都係跟住潘煦言小跑起嚟

「有𨋢啦！」潘煦言企喺餐廳外面嘅𨋢門前催我，但明明架𨋢都未上到嚟，「快啲啦！」

潘煦言行番轉頭行到我面前，一下拉住我嘅手腕拉住我行到𨋢門前等，𨋢門都未開晒就逼不及待拉住我入𨋢

「好快啦好快啦！」潘煦言一直㩒閂門制

「你㩒多兩下，佢都唔會閂得快啲⋯」我無奈咁笑

佢隻手仍然捉住我嘅手腕，我嘅手腕傳嚟佢嘅溫度，餐廳冷氣好大，所以我隻手成日都係好凍





就算係宜家我隻手都係冰冰涼涼，但潘煦言嘅手仍然暖粒粒，呢個明顯嘅溫度差⋯

「你可以放手啦⋯」我提起仍然比佢捉住嘅手喺佢面前揚一揚，「我唔會走失㗎～」

「哦、哦⋯！」潘煦言好似自己都冇察覺一士捉住我一樣，我咁樣一提佢即刻有啲慌張咁鬆開手

我同佢行到7仔，企喺放住各種雪糕雪條嘅冰櫃前面尋找目標，潘煦言嘅反應比我快，一眼就望到放喺角落嘅新口味雪糕

「呢度呢度！」潘煦言打開冰櫃，拎咗兩盒，遞咗一盒比我

「比埋我啦，我請。」我將潘煦言手上嘅雪糕盒拎到自己手中，然後行去比錢

「哦～你係會請食甜品嘅靚姐姐？」潘煦言跟上我嘅腳步，企喺我身邊探頭望我





「偶爾請一次都冇所謂，本來就係我想食先⋯」我將錢遞出去，眼睛總係忍唔住偷瞄雪糕

「多謝～咁我唔客氣啦！」潘煦言笑起嚟嘅時候眼睛都瞇成一條線

我同潘煦言企喺凍飲櫃前面，今日咁難得食到新上架嘅雪糕口味，當然要幫佢打個卡po上IG，等未食到嘅人羨慕下

「你做咩淨係影自己嗰個唔等我！」潘煦言本來已經打開咗雪糕蓋，下一秒佢即刻蓋番蓋，將雪糕盒放喺我嗰盒嘅隔離，「唔準你自私影～」

「咁影埋你嘅雪糕囉～」我舉起手機，將我同佢嘅雪糕都影入鏡，不過我冇即刻po出去，只係留咗個草稿，陣間食完再處理佢

「記得@我呀！」潘煦言見我影完就急不及待打開蓋食

我食咗一啖，波子汽水嘅味道好濃，汽水甜甜嘅味道啖口中擴散開，好香嘅味道，忽然間好掛住細個飲嘅波子汽水

「細個飲嘅波子汽水入面有粒玻璃珠，我次次都會打開個蓋拎粒波子出嚟留起留念⋯」潘煦言咬住木羹，將佢心中嘅波子汽水童年形容比我聽





「我每次飲完就會掉，唔會留。」我嘅腦海中描繪出佢形容嘅玻璃樽同玻璃珠，「好甜呀，個雪糕。」

「我上次食嘅時候都唔覺好甜，今次再食，突然間就覺得好甜⋯」潘煦言望向我，眼睛彎起嚟笑道

「味覺差異？」我聽完佢講嘅嘢忍唔住笑道，「因為食嘅時間唔一樣？」

「唔關事⋯」潘煦言默默咁反咗個白眼

潘煦言微微開口，目光落喺我身後冇幾遠嘅地方，我擰轉頭順住佢嘅視線望過去，見到低頭睇住手機行入嚟嘅周念熹

我冇想打招呼嘅想法，都已經收咗工，同事就係同事嘛，人際關係嘅嘢都係分清楚比較好

不過潘煦言同周念熹向來都熟，我擰轉頭望潘煦言，仲未嚟得切開口叫佢去打招呼，身後就傳嚟打招呼嘅聲音





「嗨～又會咁啱收工都見到嘅？」周念熹帶住微笑行近我地

我地喺同一個地方收工，落嚟都唔係差好多時間，做咩要講到好似撞到係啲咩大事一樣⋯？

「你兩個自私食～」周念熹望到我手上拎住嘅雪糕，「又唔預我！」

「我地都係咁啱講起先一齊食～」潘煦言嘅手撞一撞我，我疑惑咁望向佢

「下次預埋我嘛～」周念熹嘅笑容忽然一凝，然後又再次露出笑容，「下次見啦拜拜。」

「拜拜⋯」「拜～」

我同潘煦言同佢講聲拜拜，望住佢拎咗支嘢飲就去比錢後行出7仔，佢啱啱見到我嘅時候仲要打量我一次，所以我係真係懷疑佢係暗戀潘煦言⋯

「佢叫你下次請埋佢食。」潘煦言嘅嘴角上揚，手踭輕撞我一下

「念熹姐係叫你呀，佢係想同你一齊食，唔關我事～」我猶如旁人一樣聳肩

「唔好啦～我同念熹姐冇咩話題啦～」潘煦言朝外面望兩眼，睇嚟係要確定我地念熹姐行遠咗未

「你咁講㗎～念熹姐咁中意你，你點可以嫌棄？」我望住佢嘅一臉乖巧咁拒絕嘅表情笑出聲

「即係念熹姐中意我但你唔中意我？」潘煦言失望咁望住我，定睛直視我嘅雙眼

佢咁樣一問我就靜咗落嚟，喺安靜咗兩秒之後我先開口：「都中意，不過佢嗰種中意同我嘅中意應該唔太一樣。」

嗯，我都幾肯定，我地念熹姐對潘煦言嘅中意，同我對潘煦言嘅中意，唔太一樣




IG Link: https://www.instagram.com/nd_cotttoncandy/?hl=zh-tw