【愛情】拜托，別再見: 22
去到夜晚我媽叫醒我食飯嘅時候，我先懶洋洋咁起身，感覺我嘅手腳都番番嚟啦，成個人都唔係好攰咁
潘煦言嘅message通知仍然留喺通知欄上，我坐低喺餐枱前先覆佢：「好好多啦，體感上退咗燒」
「啱啱瞓醒？」「咁都比你發現咗」
潘煦言send咗張相過嚟，地下嗰個明顯嘅湖水綠色地磚，一睇就知道佢企咗喺餐廳廚房偷懶
「你又偷懶」我send咗幾個笑喊表情
「今日個場意外地唔多人」潘煦言回覆，「聽日又可以見到你番工啦，我都番～」
「我知呀，今日有邊個陪你番？」「都係嗰啲可以長期報更嘅人⋯」
「今日好似有你個朋友」我刻意咁唔指名，只係喺最後加個歪嘴笑嘅表情，但我估潘煦言應該估到我講緊邊個
「你個朋友呀，我個朋友今日都冇番」「邊個？」
「你呀，你今日都冇番」「要有啲私人時間做下自己嘢㗎嘛，我一個星期番三日已經好勤力」
「我幾乎日日都番，我咪仲勤力？」「你好等錢洗咩？要咁搏命番工」
「又唔係好等錢洗，不過想賺下錢先，以後想搬出嚟住⋯」「但出面租樓都好貴，住屋企都幾好呀」
「唔想住屋企，不過以後再搵到錢先搬到出嚟住，雖然佢地都有比零用，但係我唔想靠晒佢地」「都好嘅，自力更生都係好事嚟，唔洗下下都靠屋企」
「我要番去做嘢啦⋯」淨係睇字都覺得佢講到有啲委屈，「聽日見」
⋯
第二日晏晝嘅時候，我攬住我袋衫落車，今日又係要番去餐廳番工嘅日子
一落車我就見到周念熹迎面行嚟，睇嚟佢今日都係番晏晝，不過我同佢都冇真係好熟，陣間喺斑馬線撞到嘅話都係扮唔識就係⋯
我先一步到達斑馬線前面，抱住扮見唔到，番到餐廳再算嘅想法耷低頭睇手機
「嗨～你今日都番晏呀？」我見到有人企喺我隔離，伸手拍拍我
佢今日心情做咩咁好，特登過嚟拍我同我打招呼呀⋯？我抬頭望佢嘅時候見到佢滿臉笑容，睇嚟係真係心情好⋯
「嗨⋯」我用微笑回應佢，心入面都係有啲唔習慣佢突然咁親切
紅燈轉成綠燈，我同佢同時邁步行，佢行喺我隔離嘅時候我覺得有啲唔自在，但大家嘅目的地都一樣，都唔知要點樣分開行
「你最近好似番多咗好多咁嘅？」周念熹親切咁問
「最近得閒啲所以可以番多啲。」我微微點頭
就算企喺度都可以感覺到周圍散發住唔自在嘅氣氛
一番到餐廳，我就加快腳步去廚房點餐，然後即刻急步行去更衣室換衫，同周念熹一齊嘅時候成日都會覺得唔自在
我啱啱將上身衫著好，周念熹就推門入嚟，眉開眼笑嘅佢同我對上視線，佢細聲咁哼住歌行到間格入面換衫，我一換完就即刻出去，一秒都唔多留
「你食完飯啦？」我將我嘅餐喺廚房拎出嚟，拉開潘煦言對面嘅櫈坐低
「食完啦。」潘煦言將耳機除落嚟，睇嚟啱啱嘅午飯時間好忙，忙到佢都冇力笑，「你又食呢個意粉。」
「我中意食～」我自顧自拎起叉，邊睇手機邊食我嘅開工飯
周念熹換完衫出嚟直接行去廚房拎嘢食，拎住碟出嚟嘅時候佢揀咗坐我對面嘅梳化位，潘煦言坐入咗一隔
本來我同潘煦言一直講緊嘢，但周念熹一嚟到，我地兩個就冇再開過口，我連頭都冇抬起一下
「做咩我一坐低，你兩個就咁靜嘅？」周念熹望一望我，然後望向潘煦言，「講我壞話呀？」
「邊敢講你壞話呀念熹姐～」潘煦言笑道
「你咁樣叫我叫到我好老⋯」周念熹聽到呢個「姐」字嘅稱呼就唔滿意，「我都冇大你好多！」
「係尊稱，我尊敬你嘛。」潘煦言露出佢嘅招牌笑容，陽光又可愛嘅笑容，「但唔知念熹姐介唔介意比條路我出去？」
潘煦言拎住佢嘅空碟起身要行出去，周念熹抬起頭望佢，然後默默咁讓位比佢出去
等到潘煦言番嚟嘅時候，周念熹準備起身讓位比佢番入去坐，但係潘煦言直接拉開我地隔離格張櫈坐低
我下意識就望一望佢，餘光見到周念熹默默咁坐番低繼續食嘢，兩秒後先開口：「以為你要行番入去，仲想起身讓位比你入。」
「唔洗啦，我坐出面都一樣，費事讓嚟讓去咁麻煩。」潘煦言托住頭睇手機
潘煦言睇睇下手機笑咗出嚟，佢拉一拉我嘅衫袖，喺我望過去嘅時候將手機遞過嚟比我睇，係貓咪嘅短片
「好得意⋯！」我笑道，「狸花貓真係好可愛～」
「我都想養，我以後搬出嚟一定會養一隻！」潘煦言望住短片，嘴角都冇跌過落嚟
「睇緊咩呀？」周念熹問
潘煦言將手機擰過去比周念熹睇，佢睇完之後大概係比貓咪可愛到，甜美嘅笑容掛喺臉上面
「話說你幾時得閒？」潘煦言突然間好正經咁問我，呢個話題轉移得有啲突然，「嚟緊又有小測，你要救我呀⋯！」
「吓⋯？咁、咁突然嘅⋯？」我比佢突然轉變話題嘅速度剎咗個措手不及，「你有嘢唔明咩？」
「有呀！」潘煦言理直氣壯咁點頭，「我有嘢唔明呀，而且想搵你幫我預習定下一課先！」
「我唔收錢仲要幫埋你預習，你都好著數啫⋯！」我開玩笑道
喺我將叉放到空碟入面，順手抽張紙巾抹嘴嘅時候，見到我地念熹姐嘅表情一沉，顯然同啱啱嘅笑盈盈唔一樣
「學費後補！」潘煦言同我同時起身
「你打卡啦？」我喺轉身嘅時候聽到周念熹問潘煦言
「係呀，夠鐘啦嘛～」潘煦言講完就跟咗上嚟
所以，我地念熹姐嘅心情就係咁難觸摸，上一秒笑盈盈，下一秒就唔高興
IG Link: https://www.instagram.com/nd_cotttoncandy/?hl=zh-tw