【愛情】拜托，別再見: 21

瞓咗唔知幾耐，由窗簾透入嚟嘅光可以判斷，宜家大概係半夜⋯

「哎⋯」我用力撐自己起身，坐喺床上面一陣就落地去廚房打算飲杯水

我打開雪櫃酙咗杯冰水飲，冰涼嘅感覺走遍全身，溫度好似都降低咗啲

「做咩半夜三更喺度飲凍水？」廚房門口忽然傳嚟嘅提問聲嚇咗我一跳，借住雪櫃裏嘅燈先睇到原來係我媽

「有啲燒，熱醒咗⋯」我閂上雪櫃門，連講嘢嘅聲音都顯得有氣無力





「真係有啲熱⋯你有冇食藥呀？」媽咪將手放到我嘅額頭上面

「食咗啦⋯」我疲倦咁點頭，好似連點頭嘅力都冇，「但都未退燒，我食多粒先再瞓⋯」

食咗粒退燒藥之後我又番咗房瞓，一灘低喺床就已經差唔多要瞓著

⋯

第二日晏晝嘅時候我打算再食多粒藥，灘喺床上拎起手機先發現琴日佢地send咗好多個message喺group





遠菁：@苒曈 你做咩冇覆group呀？你番到屋企未呀？

遠菁：你係唔係唔舒服？可能喺商場凍親啦

澤文：可能有啲燒瞓著咗啦，等佢睇到佢再覆group

木羽：有冇食藥？真係好唔掂嘅話就去睇個醫生啦⋯

澤文：瞓醒睇到就覆我地啦





「好啲啦已經，有啲燒，不過食咗藥」我睇起就覆，因為唔舒服，連打字嘅速度都慢咗落嚟，「應該都退咗啲，但都係有啲攰」

我見到程栩顥有另外再send message比我，都係問下我有冇食藥睇醫生嗰啲

「唔睇醫生啦，屋企都仲有藥，我都Okay嘅」我回覆佢

我懷疑佢真係一直拎住手機睇緊，如果唔係點可能瞬間已讀？

「瞓醒啦？」「醒啦，自然醒，好夠瞓」

「今日好啲啦？」「好啲啦～可能真係琴日入商場一冷一熱攝親」

「退咗燒就好啦，陣間再食藥啦」「比起食藥我想食午餐多啲，想煮麵食，但好似又冇咩胃口⋯」

「你唔舒服仲煮麵食⋯你唔買粥食？」「懶得出街」





「要唔要幫你買？」「唔⋯唔係幾好意思要你幫我買～」

「我啱啱食完嘢，喺街，可以順便幫你買」「咁我陣間比番錢你啦～Thank you so much～」

我望住佢回覆比我嘅Okay，好啦，咁我要起身啦，雖然都係覺得有啲冇力，手手腳腳都係有啲軟，但都要起身梳洗一下

我頹廢咁灘喺梳化上面，手機突然彈出新嘅message：「喺門口」

我即刻盡力快步行到門前開門，我企喺門後探頭，程栩顥企喺鐵閘外，提起拎住外賣嘅手示意，我伸手去開鐵閘

「快啲食嘢啦，食完嘢記得食藥。」程栩顥瞬柔和嘅聲線再三提醒我，「仲有冇燒？今朝有冇量體溫？」

「冇，未量，但應該好啲？」我唔肯定咁伸手摸摸額頭，的確冇琴日咁熱辣辣





我指一指我嘅額頭，程栩顥將手放到我嘅額頭上面，但我覺得佢隻手好似仲熱過我額頭⋯

「你隻手好熱！」我喺佢縮手之後握咗佢隻手一下笑道，「好似熱過我額頭⋯」

「出面好熱。」程栩顥無奈咁笑道，不過佢好似都冇咩出汗，「番去食嘢啦。」

「知道啦，陣間過番數比你啦～」我比咗個Okay手勢

佢走咗之後我乖乖地坐喺房食午餐，雖然應該都唔會好飽，但係都好過餓住個肚嘅

「食緊啦」我對住碗粥影咗要相send比程栩顥

「食完再瞓下啦」程栩顥好快又覆我

「陣間瞓陣，瞓得著嘅話」「暑假拎嚟瞓覺好蝕底？」





「真係眼瞓先再瞓，全日都灘嘅話就咁就冇咗日」「病就休息下啦，仲有咁多日比你去玩」

雖然我口係咁講，話要睇多陣電腦先瞓，但其實食咗藥加上未完全好晒都係有啲攰，食完嘢睇咗陣電腦我就灘低咗喺床

「有冇嘢做緊」我側身瞓喺床度睇手機，send咗個message比程栩顥

「冇，拎緊零食比蛋撻食」程栩顥嘅回覆配咗一張蛋撻好乖咁坐喺一邊等零食嘅身影

「打唔打得電話？好悶」我問，等咗一陣，手機嘅頁面跳咗去來電顯示畫面，我即刻㩒接聽：「喂？咁快手嘅你？」

「咁啱拎住手機睇緊。」程栩顥平靜嘅聲線傳嚟，「食完粥啦？」

「食完啦⋯」我戴上耳機，一灘上床就有啲攰，「灘緊喺床睇手機。」





「所以你係預計好陣間你又會瞓著？」程栩顥嘅笑聲有啲明顯

「咩意思呀？我唔會嘅，應該⋯」我都想理直氣壯咁講，但講出口後嘅一秒我就忍唔住猶疑起嚟，「唉～你係最好㗎嘛～我知你唔會介意嘅～」

「多謝你嘅稱讚，我都習慣㗎啦⋯」程栩顥講道，「蛋撻都會咁樣，同佢講講下嘢佢就瞓著咗。」

「我又唔係蛋撻，而且蛋撻好可愛呀～如果係我，我會原諒佢～」我幻想到蛋撻嗰個偷偷地瞓着嘅樣就忍唔住覺得佢可愛，心都覺得甜咗

「蛋撻一向都可愛，佢宜家頂開咗我個房門入咗嚟啦，唉～」程栩顥忽然講道，語氣都明顯有啲唔一樣，「聽到比人讚就即刻過嚟啦⋯比你睇下佢宜家嘅得戚樣。」

「好呀！」我即時答應

程栩顥轉咗FaceTime，鏡頭一開就係蛋撻企喺佢嘅櫈邊，雙眼亮晶晶咁望住佢

「冇啦，零食你食咗啦，冇得再食啦～」程栩顥對蛋撻講嘢嘅語氣完全係氹小朋友嘅語氣

我望住畫面中嘅蛋撻，比佢可愛到嘴角上揚，佢一聽到冇零食即刻行前咗兩步，好似要上前質問程栩顥一樣

「冇啦，你食咗啦，冇得再食啦。」程栩顥狠心咁講，蛋撻好似真係聽得明一樣一臉失落，喺原地乖乖趴低

我一直拎住手機睇，望住蛋撻咁乖咁趴喺地下瞓，我嘅眼皮都愈嚟愈重

「你要瞓著啦。」程栩顥輕飄飄嘅一句，令雙眼本來都要自動合埋嘅我即刻睜開眼

「唔得啦，真係有啲眼瞓啦⋯」我強忍住突然襲嚟嘅睡意，「比你講中咗⋯」

「好啦快啲瞓啦，休息多啲先會快啲好。」程栩顥講道

「嗯⋯」我點點頭，對住螢幕揮揮手，「我今次冇直接瞓著⋯」

「知啦知啦，最叻係你啦⋯！」程栩顥無奈嘅稱讚令我盡力將嘴角喵起微笑，「好好休息啦。」

喺通話完結之後，我將手機放喺一邊正準備再瞓一陣嘅時候，見到彈咗一個嚟自潘煦言嘅新通知：你唔舒服呀？今日好啲未？




IG Link: https://www.instagram.com/nd_cotttoncandy/?hl=zh-tw