【愛情】拜托，別再見: 20

炎炎夏日，當然要清涼消暑，今日曬又唔算好曬，因為有雲可以擋一擋，但確實好熱冇咩風

我地幾個約好喺巴士站等，我同遠菁企喺巴士站已經噴定防曬，噴霧形嘅感覺上可以覆蓋多啲範圍亦方便啲

「好熱⋯」遠菁已經拎住風扇吹緊，「就嚟溶⋯」

「我都差唔多啦⋯」我同遠菁平時一定會貼住企，但最近呢幾日嘅溫度開始上升，我地就分開企

去到沙灘嘅時候或者因為係暑假，好多小朋友同爸爸媽媽一齊嚟，我以前仲好細個嘅時候，我爸媽都會帶我去游水消暑





我地揀咗個冇咁曬嘅地方擺嘢，今日我同遠菁著嘅泳衣係閨密裝，兩件頭嘅入膊款配短褲，唔性感暴露又啱啱好足夠

程栩顥同關澤文好似感覺唔到地上面嘅沙嘅熱一樣，除咗上身衫就直接跑到水邊，我同遠菁對望一眼，跟喺佢地身後行近水邊

雙腳踩到水中，清涼嘅感覺傳嚟，腳下嘅沙隨住水嘅進退流走，喺從沙中提起腳嘅時候，可以感覺到細沙彈到腳上面嘅刺痛感，愈行愈出之後就冇再感覺到細沙彈上嚟嘅感覺

「兩位唔係識游水咩？做咩要帶住個水泡？」浮喺水面上嘅關澤文望住圈喺我同遠菁手臂上嘅水泡露出疑惑嘅表情，一個轉身企番好

「因為我地比較懶～」遠菁抱住水泡游出去腳仲可以掂到地嘅地方





程栩顥浸喺水中，只有頭浮喺水面上面，我經過佢隔離嘅時候輕力咁拍咗佢嘅頭頂一下

「嗯？」喺佢望向我嘅時候，我若無其事咁笑一笑

我將水抱當係浮板一樣攬住，果然水入面係比較涼，我都已經好耐冇游水，宜家只係抱住水泡浮喺水上面

「我地今日噴嗰隻防曬係防水㗎可？」遠菁突然游到我身邊拉我一下問道

「係呀，防水㗎～嘩！」我要講嘅嘢都未講完，關澤文就撥水過嚟





「關澤文！」遠菁將頭髮往後一撥，將水用力一撥，水好似瀑布咁由關澤文嘅頭頂落下，「哈哈哈哈哈！」

遠菁毫不留情咁大笑起嚟，我拉住遠菁後退，因為關澤文睇起嚟佢又雙倍奉還番嚟

「姜遠菁你唔好走呀！」關澤文想快步行過嚟，但礙於水嘅阻力想行得快都係有啲困難，一直朝遠菁撥水

「喂⋯！關澤文⋯！」遠菁嘅手擋都擋唔切，只好一隻手擋住另一隻手撥水，「幼稚鬼！」

呢兩個人落水三分鐘都冇已經好似落湯雞一樣，我同程栩顥好似局外人一樣望住佢地兩個，我悠悠閒咁坐到水泡上面喺水上浮

「你好Chill呀～」程栩顥游向我，伸手拉住我水泡上面嘅手柄

「今日出嚟玩梗係Chill啦～」我坐喺水泡上面，雙腳浸喺水中，我嘅手浸一浸水，輕彈指尖將水彈到程栩顥嘅臉上，「好彩今日唔算晒，不過都噴咗防水嘅防曬～」

「防曬都可以防水？」程栩顥唔理解咁笑問，「女仔用嘅嘢真係意想不到⋯」





「好涼，浸完水上嚟之後。」我坐喺水泡上感受住夾雜住海水咸味嘅微風，一隻手放喺程栩顥嘅膊頭上靠住

「你隻手擺得好舒服喎⋯」程栩顥望我放喺佢膊頭上嘅手一眼，「你咁樣吹風會唔會感冒？」

「你做咩咒我感冒⋯陣間我真係感冒點算？」我扶住水泡由側邊落水，用水泡圈住自己，雙手放鬆咁搭喺水泡上面

「咁咪⋯喺屋企休息唔好番工。」程栩顥輕鬆咁講，臉上掛住微笑

「好彩我聽日冇報更唔洗番工。」我將下巴靠喺雙臂上

「程栩顥，游唔游出去浮台？」關澤文喺呢個時候過嚟問程栩顥

我同程栩顥順住關澤文指嘅方向望去，係離呢度有一段距離嘅浮台，程栩顥微微點頭，然後拎轉望我同遠菁





「你地去唔去？」程栩顥問

「你地去先，我地殿後。」遠菁揚揚手，示意佢地兩人先行

「佢兩個攬住佢水泡，慢慢過嚟都唔怕啦。」關澤文比咗個Okay手勢，然後就同程栩顥朝住浮台嘅方向游過去

我同遠菁對望一眼，然後攬住水泡慢吞吞咁游過去，我地游到三分一嘅時候，佢兩個已經差唔多游到浮台

佢兩個坐喺浮台上面等我同遠菁游過去，我同遠菁冇去浮台，只係攬住水泡浮喺水中，喺浮台嘅位置，風好似更大

「你地唔上嚟呀？」坐喺浮台上嘅關澤文問

「一上水好凍⋯」遠菁搖搖頭，將水撥到關澤文身上，「你唔覺咩？」

「唔覺⋯」關澤文搖搖頭





程栩顥坐喺浮台嘅邊上，雙腳浸喺水入面，我伸手捉住佢嘅手腕，用力一拉將佢拉落水，佢反應唔切直接跌入水中

「我唔小心～」我挑起眉聳聳肩

「最好真係啦！」程栩顥用水彈我，「都真係好唔小心～」

程栩顥伸手捉住我水泡上嘅手柄，拉住我嘅水泡游番去，我掛喺水泡上面放鬆，咩力都冇出就可以番到去岸邊

一行出水就覺得今日嘅風好凍，吹埋嚟嘅時候凍到我打咗個冷震，我地喺沙灘留到黃昏就走，搭車番出去打算喺商場食晚飯

商場嘅冷氣開得好足，冰涼嘅感覺傳遍全身，一直去到食完飯，我都覺得好凍，可能加上今日又去咗游水，手腳都有啲軟

喺番屋企嘅時候我都攰到唔想開口講嘢，一直耷低頭拖住腳步行，雙眼都就嚟要直接合埋





「唔舒服？」程栩顥察覺到我嘅安靜一樣，靠過嚟細聲問我

「有啲頭痛⋯」我輕皺起眉頭，覺得成個頭都圍住痛

「番到去食粒藥早啲瞓啦⋯」程栩顥微微點頭，擔心咁探頭望我

「嗯⋯」我覺得自己連點頭嘅力氣都冇

一直去到沖完涼都覺得個人迷迷糊糊，拎住風筒吹頭嘅時候覺得可以原地瞓著，我灘低喺床，手摸自己嘅額頭

「嗯⋯有啲熱，應該有啲燒⋯」我喃喃自語同時手無力咁放低

我無力咁灘喺床上面，成個人都仍然昏昏沈沈，迷迷糊糊咁就瞓著咗⋯




IG Link: https://www.instagram.com/nd_cotttoncandy/?hl=zh-tw