【愛情】拜托，別再見: 19

今日嘅我冇報更番工，同程栩顥放蛋撻散完步之後番到嚟就一直灘喺床上面

睇手機睇到一半嘅時候，突然收到潘煦言嘅message：「你隻手好啲未呀」

「好好多啦，唔紅亦唔痛啦」我望一望自己嘅左手，好彩唔係慣用手受傷，日常生活上都唔會有太多唔方便，「今日你番工呀？」

「冇番工，今日補課，晏啲同朋友出去玩」潘煦言好快就覆咗我，「你有養狗㗎？見你今朝早story」

「冇呀，係我個friend養嘅狗，我陪佢一齊放狗咋」我回覆，「好可愛，不枉我咁早起身」





「見你咁早就po story有啲意外」潘煦言嘅回覆仲要加咗兩個笑喊嘅emoji，「你居然有咁早起身」

「番嚟之後一直灘都冇郁過，好攰，所以今日唔番工係啱嘅」「你本來都冇報今日更⋯」

潘煦言直接戳穿呢個事實，不過本來我都係因為今日冇報更所以先出去同蛋撻散步

「好耐冇見你，幾時再見？」潘煦言問

「有幾耐⋯前日番工先見完⋯」我有啲無奈





時間有過得咁快咩？我反而覺得時間過得有啲慢，除咗番工嗰啲日子之外

我望住代表輸入中嘅三個灰點一直跳動，然後又冇咗三個灰點，過幾秒嗰三個灰點又跳番出嚟

過咗差唔多一分鐘先收到佢send出嚟嘅新message：「你食咗晏未？」

「未呀，仲灘緊喺床」我一個轉身夾住攬枕，仍然悠悠閒咁灘喺床上面睇手機

「一唔一齊食晏」「你唔係約咗朋友出去咩？」





「約咗食晚飯，宜家都要食嘢㗎」「你唔約佢地一齊食？」

「本來都係淨係約咗夜晚，咁你要唔要一齊食？」潘煦言再三追問我

「都得⋯幾點」我對於出去食嘢冇咩所謂，雖然實際上都冇好想出去，不過佢咁樣追問我，我都係答應佢，以免佢好似提我唔番工一樣次次見到都要講一次

⋯

喺我行入餐廳嘅時候，潘煦言已經坐喺卡位拎住手機，唔知同邊個send緊message，專心到完全都冇留意到我行到佢對面坐低

「嗨～」我伸手到佢面前左右一掃

「嘩，你幾時到㗎？」潘煦言一抬眼見到我就嚇咗一跳，唔知仲以為佢係唔係做咗啲咩虧心事

「啱啱到，啱啱坐低⋯」我伸手去拎餐牌，指尖都未掂到餐牌，潘煦言已經先一步將餐牌拎落嚟放到我面前，「唔該。」





我耷低頭都可以察覺到潘煦言一直望住我，我緩緩抬起頭，同佢對上眼，潘煦言耷低頭去望手機嘅螢幕

「你睇咗食咩啦？」我問

「睇咗啦～」潘煦言笑盈盈講道，拎起手機就去掃code，「咁我落單啦～」

佢著校服嘅樣我應該一隻手都數得晒，佢平時番工都係著T-shirt，見佢著校服白恤衫都下意識留意多兩眼；白裇衫同佢好合適，好青春好陽光

「見到我著校服係唔係好有新鮮感呢～」潘煦言忽然開口，佢掛喺臉上嘅笑容同雙眼中都係滿滿嘅期待，就好似期待緊我答啲咩一樣

「噗⋯都真係幾新鮮嘅⋯」我比佢一句突如其來嘅說話逗笑，「邊有人會咁樣問人地㗎？你啱啱放補課呀？直接過嚟？」

「嗯，見你應承我一齊食晏，我一放補課就即刻飛奔過嚟啦！」潘煦言繪形繪聲咁形容，聽完之後我更加想笑，「留喺學校多一秒都唔敢⋯你笑咩呀？我認真㗎！」





「信你。」我深呼吸然後抿住唇，認真咁回應佢同我食晏嘅誠意，「信你一定唔係本來就唔想喺學校補課，所以一落堂就即刻飛奔出學校門口。」

我感覺到冷氣一直吹到我嘅頭頂，抬頭一望就見到冷氣喺我頭頂嘅正上方，吹到我直接打咗個乞嗤；潘煦言即刻喺袋入面拎紙巾遞比我，仲喺書包入面拎咗件長袖冷衫比我

「唔洗啦，我Okay⋯」我伸手去接紙巾，喺佢將外套遞比我嘅時候搖搖頭

「唔緊要啦，你凍親就唔好啦⋯」潘煦言認真咁講完前半句體貼嘅說話，下一秒表情又變得有啲擔心：「陣間你病咗點番工⋯」

「哎呀！你做咩咁驚我唔番工啫！」我覺得自己聽完佢頭半句就覺得佢體貼實在太天真，「我報得更一定會番工㗎！」

「我都話我中意拍你一齊番工多啲⋯」潘煦言耷低頭睇手機，失望咁嘆氣，「你唔中意拍我番工嘅話我會好傷心⋯」

「咁我又唔呢個意思～」我怕佢誤會我嘅意思，連忙解釋，「我地念熹姐都好中意同你一齊番工㗎～」

「嗯⋯」潘煦言嘅眼神夾雜住無奈，點點頭後淡然咁補充咗一句，「我冇咩想法。」





「你好過份呀，念熹對你咁好～」我笑道，平日周念熹一番工就會去搵潘煦言，呢個係我觀察所得，十次有九次都會，佢特別中意同潘煦言講嘢，「你地之前唔係好熟㗎咩？我記得之前好似成日見你地一齊。」

「吓？幾時有？」潘煦言自己都一臉震驚，「係佢行過嚟同我講嘢，我冇理由唔答佢㗎嘛～你唔好笑住先啦！」

「我懷疑佢係唔係暗戀你⋯！」我忍住笑意，對佢講出我一直以嚟觀察所得番嚟嘅最終結論，「認真。」

「但係佢大過我⋯」「佢大過你同暗戀你係冇關係㗎⋯」

「我唔啱佢。」潘煦言直接搖頭，「完全唔啱！佢有時好得人驚，有啲怕佢⋯」

我唔太肯定潘煦言口中嘅「得人驚」嘅定義，但我個人相處起嚟只係覺得佢忽冷忽熱，態度都有啲零飄忽，佢心情好會對你好啲，心情麻麻就當你透明

「食嘢！好肚餓～」 潘煦言望住放喺佢面前嘅餐已經急不及待咁要開餐，「你都快啲食啦～」





我低頭食嘢冇講嘢，習慣咗就放手機喺隔離睇，睇手機嘅時候餘光會留意到潘煦言落喺我身上嘅目光，所以我都係默默咁唔睇手機

「你陣間食完番屋企，然後等夜晚先再出去？」我順口問一句

「嗯，我都要番去換衫，冇理由著住校服出去玩㗎嘛～」潘煦言拉一拉自己嘅裇衫，「所以都係要番去一轉。」

「感謝你特登搭車過嚟同我食晏。」我拎住鐵叉雙手合十，「如果唔係我就會一直喺屋企灘到今晚。」

「你又幫我免費補習、又教我做功課、又同我一齊番工，你對我咁好，我過嚟約你食晏都唔算咩大事啫～」潘煦言嘅說話聽起嚟有啲誇張，不過的確會令人好受落，我聽完之後嘴角都壓抑唔住咁上揚

「得啦得啦，唔洗擦鞋啦⋯！快啲食嘢啦！」我怕咗佢，收起笑容只留低淡淡嘅笑意

今日突然發現，佢真係好識講嘢，好識氹人開心，都唔知道咁樣係好事定壞事⋯




IG Link: https://www.instagram.com/nd_cotttoncandy/?hl=zh-tw