【愛情】拜托，別再見: 02

「耶～」

程栩顥睜開眼將蠟燭吹熄，本來佢唔想做許願呢種咁肉麻嘅事，但係喺大家嘅強逼下，佢都係半推半就咁許咗個願，大家喺隔離拍手助慶

「切蛋糕！切蛋糕！」關澤文將拎起蛋糕附送嘅木刀遞比程栩顥，「切到最底會娶唔到老婆㗎！」

「你就娶唔到老婆⋯！」程栩顥拎起木刀向下切，喺到底前嘅一厘米停低，「得啦！」

「苒曈分蛋糕啦。」關澤文翹埋雙手坐喺一邊，抬一抬下巴示意張苒曈行過嚟分蛋糕





「你坐喺隔離唔分⋯？」我覺得無奈，但都係捉住木刀，將木刀再往下壓，將蛋糕分成幾份放到碟上

「唔該苒曈～」關澤文裝模作樣咁笑住接過紙碟

我都冇佢咁好氣，關澤文向來都係咁樣，做自己該做嘅事，該懶嘅時候就懶，因為佢話人再努力都係都只會係人

「你做咩又恰苒曈呀？」遠菁推咗關澤文嘅膊頭一下，「你坐咁近都唔分蛋糕？咁懶嘅話以後會娶唔到老婆㗎！」

「我娶唔娶到老婆又關你事？」關澤文一臉嫌棄咁講，睇下，佢地兩個又開始啦，「我生日嘅時候你記得祝我GPA過3爆4！」





「到你生日嘅時候再講啦！」遠菁嫌棄咁捧起紙碟，佢聽到關澤文嘅反駁就忍唔住要回擊佢，「上到大學唔好掛住溝女唔做assignment呀！」

佢地兩個成日都好似小學雞一樣嘅鬥嘴，有時候都覺得佢地對對方嘅包容度真係好高，仲可以做朋友真係好難得

我都懶得理佢地嘅日常吵鬧，捧住碟食坐喺一邊蛋糕，望住佢兩個就會覺得就算下一秒佢地拎起蛋糕互掉都唔意外

「今日餐廳好忙咩？你就嚟瞓著啦。」程栩顥咬住木叉拎住手機幫已經自己碟上嘅蛋糕影相

「又唔係好忙，只係個人有啲冇電⋯」我舒服咁靠住櫈背頹廢食蛋糕，仲可以騰空一隻手去㩒相簿睇啱啱影嘅相





「我有USB線可以借比你。」程栩顥忍住笑，一臉認真咁指自己嘅背囊

「多謝你嘅好意，我心領啦⋯」我唔想理佢嘅冷笑話，調整咗一個舒服啲嘅姿勢坐好，「呢個假期好長，放假放到個人都頹晒⋯不過我都肯嚟同你食生日飯都算係咁。」

「你已經有番工，仲想點？」程栩顥坐低喺我隔離

「工都唔係成日番，都要預啲時間喺屋企灘下、出去玩下食下飯㗎～」我餘光留意到有人坐喺佢隔離睇緊佢嘅手機，「你地做咩個個都中意睇我個IG，你冇IG咩？」

「你有嘢唔比得人睇咩？」 程栩顥見我發現咗就睇得更放肆，直接靠過嚟用手指撥我嘅螢幕

「咁又冇⋯」我只好跟住佢嘅節奏嚟睇IG

「飲唔飲嘢呀？」遠菁問道，「其實雪櫃有嘢飲。」

今日係食程栩顥嘅生日飯，其實都唔算係生日飯，只係生日外賣





但係喺遠菁屋企，佢嘅爸媽都番咗工，所以屋企只有我地幾個，我地確保絕對唔會整污糟佢屋企，會收拾好一切先離開

「我要！」我即刻起身跟住遠菁行入廚房

望住雪櫃入面嘅嘢飲三心兩意咗一陣，我都係拎咗兩盒青提味果汁，其中一盒喺行到程栩顥隔離嘅時候放喺佢嘅面前

程栩顥冇講啲咩，默默咁將飲管拆出嚟戳穿錫紙，佢都好似好習慣咁

「你個生日嘅朱古力牌未食。」關澤文指住放喺蛋糕盤上面嘅白朱古力牌，「壽星一定要食朱古力牌，祝福嚟。」

唔知由幾時開始，生日蛋糕上面嘅朱古力牌壽星一定要食，係對壽星嘅生日祝福

「但我生日已經過咗一個星期⋯」程栩顥無奈咁伸手拎起白色嘅朱古力牌，「而且太甜，我一個人點食晒成塊⋯不如一人咬一啖算啦？」





「你咬先，我地唔搶壽星嘅祝福。」我頷首示意，推咗佢隻手一下叫佢食先

程栩顥小心翼翼咁喺白朱力牌嘅一角咬咗一細啖，然後將朱古力牌遞咗比我，我喺另一邊嘅角落咬咗一啖後，程栩顥又將朱古力遞過去比關澤文

「你要餵我食呀？」關澤文假裝震驚咁用雙手掩住嘴

「本來冇咩所謂，但你咁樣講完我就有所謂⋯」程栩顥擺出嫌棄嘅表情，「拎住啦⋯」

「我唔要～」關澤文搖搖頭，捉住程栩顥嘅手腕，將朱古力牌嘅一角送到自己嘅口中

「嘩呀！！！」

我同遠菁即刻忍唔住大笑尖叫，睇完都覺得眼睛痛嘅關係所以同步咁伸手掩住眼

「你地兩個一齊坐啦！救命呀！」遠菁大聲嗌道，「睇完要洗眼呀！」





「你洗眼之前咬咗個朱古力先啦！」關澤文推一推遠菁

望住大家喺度講笑喺度玩，忽然間覺得好似唔經唔覺就行到中六，再過多兩個月嘅我地就唔會再好似讀中學嘅時候一樣，番到去見番同一班同學，座位亦唔會再固定，上堂睇手機都冇人理，亦唔會再著上中學嘅校服

時間一直喺你冇察覺到嘅時候流逝，到察覺到嘅時候都已經到咗章節嘅尾聲

我地幾個對於「食口水尾」呢樣嘢好似都已經習慣，總會有想食但又食唔晒可以分嚟食嘅時候，有時好慶幸，至少係好熟嘅朋友先可以做到呢個地步

「你聽日洗唔洗番工？」程栩顥忽然問起

「聽日要呀，聽日番夜晚。」我早就記熟咗自己嘅更表

「你做咩咁勤力？日日都番工，唔洗去玩咩？」程栩顥將自己碟上嘅蛋糕都清空，將空碟放番喺枱上





唔⋯佢講嘅呢句，好似喺今日番工先唔知同邊個人講過一樣，宜家比人問番轉頭⋯

「你地約我，我咪唔番工，而且我都唔係日日番～」我托住下巴，㩒開相簿揀緊陣間要po咩相

「等我日日都約你先～」遠菁聽到後即刻擺出認真嘅表情提議

「你會喺見咗我三日之後覺得厭倦，一定。」我笑住咁直接將我已知嘅結果講出嚟

「點會啫～」遠菁即刻小跑過嚟，兜到我嘅身後抱攬住我

遠菁本來就唔係好可愛嘅人，所以佢唔會成日咁樣嗲人，但偶然會好刻意嘅撒嬌，不過嚟緊開學就唔會有啦，每次諗到要識新朋友就會覺得好攰

我本來都唔係好外向嘅人，要成為熟人要花好一段時間先可以，慢熱係我嘅缺點，但有時都係一種優點，至少我可以喺嗰段時間入面識別到真心同假意

都唔知我地以後會變成點，唔知道會唔會因為識咗新朋友就慢慢疏遠

但我希望唔會




IG Link: https://www.instagram.com/nd_cotttoncandy/?hl=zh-tw