【愛情】拜托，別再見: 01

一切好似有啲難以置信，但認真諗嘅話，好似又唔係真係咁難接受

一切嘅一切，始於嗰一年嘅暑假，亦終於嗰一年嘅暑假

⋯

⋯

⋯





「24號枱埋單。」一男一女企喺收銀處前面，將單放喺枱上嘅長方形鐵盤中

「總共$138。」我企喺收銀機前面輕戳螢幕，心入面諗緊到底我距離收工仲有幾耐

眼前嘅男人從銀包中拎出$200遞比企喺收銀機前嘅我，睇起嚟食得好開心，臉上都係滿滿嘅笑意

「呢度收你$200，找番$62比你⋯」我為咗避免找錯錢，所以喺佢面前數齊錢先交到佢嘅手中，然後露出番工嘅專業笑容，「多謝晒，下次再嚟呀～」

喺客人轉第行出店舖嘅一刻，我瞬間就收起笑容，啱啱嘅笑容都只不過係營業笑容嚟，面對客人係必須要有





我只係一個嚟緊讀Year 1嘅人，已經要學識呢種職場求生本領，以後畢業之後都唔知仲有幾多呢啲時候⋯

我喺行出去之前，好順手咁整理一下放喺收銀機旁邊嘅雜物，然後就聽到有人拖住腳步走過嚟收銀處

「幫我睇下我部手機叉電叉到幾多⋯」

一抬頭就見到潘煦言行到過嚟，企喺我隔離懶洋洋咁伸咗個懶腰

「89%。」張苒曈喺一堆叉電線中搵到潘煦言嘅手機





「Okay，夠電啦，幫我呀唔該～」潘煦言滿意咁挺直腰，伸出手指住放喺下層櫃嘅手機，「唔該～」

公司嘅收銀櫃下面有好幾條叉電線，因為好多同事都會喺番到餐廳嘅時候先幫手機叉電，所以呢一堆叉電線長期都喺度

我一直喺外面，但宜家嘅人唔多，暫時都未有人落單；我行出收銀處行去廚房，打算睇下有冇菜擺喺劃單位要出

一行入廚房，劃單位空盪盪咩都冇，潘煦言企咗喺夾住更表嘅牌前面，專心咁睇更表

「張苒曈，你收幾點呀？」潘煦言嘅餘光或者有留意到我行入嚟，於是好順口咁問咗一句，但喺我開口前佢就先一步搶答，「呀⋯你今日番半日咋⋯」

「係呀～再過多一陣，我就可以收工啦～」我一臉欣慰咁點頭

我今日番咗半日已經好攰，所以見到就嚟收工，心情都會好啲

「你做咩唔番全日呀？你唔洗賺錢㗎咩？」潘煦言問我嘅語氣都有啲失望，「次次都番半日⋯」





「暑假嘛，日日都拎嚟番工好攰啫～」我望住企喺電磁爐前嘅同事將意粉裝碟，拎起筆將單劃走

潘煦言打開雪櫃拎出佢一早放咗入去嘅珍珠奶茶，靠住喺門框飲，睇起嚟佢先係就嚟收工嘅嗰個人

我送完餐，喺外面順便執咗張枱先番廚房，潘煦言仍然企喺同一個位置郁都冇郁，什至已經拎住手機睇緊

「你日日都番工，唔洗做暑期作業㗎咩？」我洗完手又企番喺劃單位睇手機，咁樣先係收工前嘅狀態

「吓？要做㗎咩？之後問人拎嚟比我抄得㗎啦～」潘煦言懶洋洋咁企好轉身，將佢飲咗一半嘅珍珠放番入雪櫃

佢平時都係咁樣懶懶閒嘅狀態，睇起嚟對所有嘢都冇咩所謂，唔會太執著，但該做嘅事都係會做

「你唔係嚟緊F.5啦咩？唔洗補課嗰啲咩？仲可以日日番工⋯」我靠坐喺劃單位嘅枱邊，感覺涼浸浸，悠閑咁睇手機偷下懶





潘煦言細我兩年，升F.5嘅佢日日都番緊工，我升F.5嘅時候，一個星期隔日補課，點解佢嘅F.5同我嘅F.5對比起嚟咁唔一樣？不過我覺得我考到上大學同F.5嘅努力補課冇咩太大關係

暑假期間嘅餐廳同平時都冇咩太大分別，都有比較得閒嘅時段，例如宜家

未到食晏時間人都唔會太多，大家都係扮下工偷下懶，平時仲未到暑假或者假期嘅時候，食晏時間都會好多學生過嚟，主要嘅客人都係學生，夜晚多數都係收工嘅人或者一家人嚟食飯

「你嘅暑假喺考完DSE就開始啦，但我嘅暑假先啱啱開始咋⋯」潘煦言行到我隔離，同我一樣靠坐喺枱邊，「睇緊咩呀？」

「睇緊IG。」我坐過咗少少騰位比佢

宜家擰轉頭望嘅話會見到喺廚房嘅人都係扮工緊嘅狀態，企喺同一個工位但都係睇緊手機

我感覺到隔離嘅人一直盯住我嘅手機望，八卦咗我嘅IG一陣，就抬頭望一眼掛喺廚房顯眼位置嘅時鐘，拎出手機睇自己嘅IG

我嘅眼一直留意住喺左上角嘅時間等待收工時間一步步靠近，而且我坐嘅呢個位置只要一轉身就係用嚟打卡嘅電腦





3分鐘⋯2 分鐘⋯1分鐘

50秒⋯30秒⋯20秒⋯10秒⋯收工！

一見到時間到，我飛快咁企起身，轉身去打卡收工

「收工～」我感覺到自己嘅聲線語氣都係愉悅嘅

「你就好啦～好羨慕你⋯」潘煦言都企起身，喺隔離望住我打卡收工

「你都番半日呀，唔番全日咪得囉～」我喺螢幕㩒一下紅底黑字嘅「下班」

「陣間去邊度玩？」潘煦言望住佢行出廚房嘅大門好奇咁問





「約咗人食飯～」我小幅度咁回頭回答佢，「拜拜啦～」




IG Link: https://www.instagram.com/nd_cotttoncandy/?hl=zh-tw